Tse hlollang tse bonoeng ke Paulosi
1Ke tlameha ho ithorisa, leha ho sa thuse letho, 'me ke fetela liponong le ho tseo Morena a ntšenoletseng tsona. 2Ke tseba motho oa Mokreste, eo ho seng ho fetile lilemo tse leshome le metso e mene a kile a nkeloa leholimong la boraro. Le haeba e ne e le ka 'mele kapa e se ka 'mele, ha ke tsebe; ho tseba Molimo. 3Ke tseba hore motho eo, le haeba e ne e le ka 'mele, kapa e se ka 'mele, ha ke tsebe, ho tseba Molimo, 4o kile a nkeloa paradeising, a utloa mantsoe a ke keng a buuoa, ao motho a sa lumelloang ho a bolela. 5Ke tla ithorisa ka motho eo, empa nke ke ka ithorisa ka bonna, haese ka bofokoli ba ka. 6Leha nka rata ho ithorisa, ke tla be ke se sethoto, hobane ke tla be ke bua 'nete. Empa ha ke etse joalo, esere e mong a nkuka ke feta seo a se bonang ho 'na, kapa a se utloang ka 'na.
7Hore ke se tšohe ke ikhantša ka baka la boholo ba tseo ke li senoletsoeng, ke hlabiloe ka moutloa 'meleng, e leng morōmuoa oa Satane, hore a 'ne a ntjabele, esere ka ikhantša. 8Ke rapetse Morena hararo hore ntho ena e tlohe ho 'na, 9empa a re ho 'na: “Mohau oa ka o u lekane, hobane matla a ka a phethahala ka ba fokolang.” Ha ho le joalo, ke tla ithorisa ka bofokoli ba ka ka thabo e kholo, hore matla a Kreste a tle a be ho 'na. 10Ka baka leo, ke thabela bofokoli, mahlapa, litsietsi, litlhoriso, le mahlomola, ka baka la Kreste, hobane ha ke fokola, eba ke hona ha ke le matla.
Ngongoreho ea Paulosi ka Kereke ea Korinthe
11Ke fetohile sethoto, hobane ke lōna ba ntlamileng ho ba joalo. Ke ne ke lokela ho pakoa ke lōna, etsoe leha ke se letho, baapostolahali bao ha ba mphete ka letho. 12Tse bonahatsang hore ke moapostola oa 'nete li entsoe har'a lōna ka mamello eohle: ke mehlolo, limakatso, le liketso tse matla. 13Ebe likereke tse ling li le fetile ka'ng, haese feela hore 'na ha kea ka ka le khōka? Ntšoareleng phoso eo. 14Bonang, lena ke khetlo la boraro leo ka lona ke itokisetsang ho tla ho lōna, 'me ha ke na ho le khōka, hobane ha ke batle tsa lōna, ke batla lōna. Hase bana ba fepang batsoali, ke batsoali ba fepang bana. 15Ke tla thabela ho sebelisa tsa ka le ho sebelisoa ka baka la lōna. Na ha ke le rata haholo, le tla nthata hanyenyane? 16Leha ho ka ba joalo, ha kea le imetsa ka letho. Empa motho a ka re, kaha ke le masene, ke le qhekeletse ka mano. 17Na nkile ka le qhekanyetsa ka e mong oa bao ke ba rōmileng ho lōna? 18Ke kōpile Tite, 'me ka mo rōma le ngoan'abo rōna e mong. Na Tite o le qhekanyelitse? Na ha rea ka ra sebetsa ka moea o le mong, ra tsamaea mohlaleng o le mong?
19Na haesale le ntse le nahana hore re batla ho itšireletsa mahlong a lōna? Re bua pel'a Molimo re le ba Kreste, 'me, baratuoa, tsohle li etsetsoa ho le matlafatsa. 20Kea tšaba, esere ha ke fihla, ka le fumana le se kamoo ke lakatsang kateng; le lōna la mphumana ke se kamoo le lakatsang kateng, 'me mohlomong ho e-na le liqabang, mohōnō, khalefo, likhang, liketseletso, litšebo, boikhōhōmōso, le meferefere. 21Hape, esere ha ke fihla, Molimo oa ka a nkokobetsa har'a lōna, ka tla ka llela ba bangata ba ileng ba etsa sebe ka nako e fetileng, empa ba e-s'o bakele litšila, le bohlola, le liketso tse manyala tseo ba li entseng.
