2 BAKORINTHE 10

₁'Na Paulosi, eo ho thoeng ke konyana ha ke le har'a lōna, empa ke tau ha ke le hōle le lōna, ka bonna ke ipiletsa ho lōna ka mosa le ka bopelonolo ba Kreste. ₂Joale ke le kōpa hore, ha ke le teng har'a lōna, ke se ke ka ba tau eo ke ikemiselitseng ho ba eona ka sebete, ho ba reng re laoloa ke botho. ₃Le hoja re le batho, ha re loanele tsa botho. ₄Lihlomo tseo re loanang ka tsona hase tsa botho, ke tse matla, tsa Molimo, tse heletsang liqhobosheane. Re shanofatsa lipolelo tsa bohata, ₅le tsohle tsa boikhantšo tse loantšang ho tseba Molimo, 'me re tlamella merero eohle hore e ikokobeletse Kreste. ₆Mohla lōna le seng le mamela ka mokhoa o phethehileng, re ikemiselitse ho khalemela ho se mamele hohle.

₇Talimang litaba ho ea kamoo li leng kateng. Haeba e mong a ikholisitse hore ke oa Kreste, a ke a nahane le hore le rōna re ba Kreste joaloka eena. ₈Leha nka ithorisetsa matla a rōna haholoanyane, ao Morena a re neileng 'ona ho le matlafatsa, e seng ho le felisa, ha nka ke ka hlajoa ke lihlong. ₉Ha ke rate ho bonahala eka ke le tšosa ka mangolo, ₁₀hobane e mong o re: “Ruri mangolo a hae a boima, a matla, empa ha a le teng ka seqō ke likobo feela, le puo ea hae ea nyeliseha.” ₁₁Ea joalo a ke a hopole hore seo re leng sona mangolong ka lipolelo ha re le sieo, leha re le teng re ntse re le sona ka mosebetsi.

₁₂Ho hang ha rea lokela ho ikopanya kapa ho itšoantša le ba bang ba ikemelang. Empa ke lithoto, hobane tekanyo eo motho oa bona a itekanyang ka eona ke eena ka boeena, o ipapisa le eena ka boeena. ₁₃Rōna ha re ka ke ra ithorisa ho feta tekanyo, haese ka ho ea ka tekanyetso ea mosebetsi oo Molimo a re abetseng oona, esita le ho tla fihla mona ho lōna. ₁₄Ha rea tlōla moeli oa rōna, e leng se ka beng se etsahetse haeba a ne a sa akareletsa le lōna, hobane re bile re fihlile le ho lōna mona ho bolela molaetsa o molemo oa Kreste. ₁₅Ha re ithorise ho feta tekanyo ka mosebetsi o entsoeng ke ba bang, empa tšepo ea rōna ke hore ha tumelo ea lōna e hōla har'a lōna, le mosebetsi oa rōna o tla hōla, feela re sa tlōle moeli oa rōna. ₁₆Re tla bolela molaetsa o molemo le linaheng tse ka nqane ho lōna, re sa ithorise ka mosebetsi o seng o entsoe libakeng tsa ba bang. ₁₇Empa ea ithorisang a ke a ithorise ka Morena, ₁₈hobane ea amohelehang hase ea ikemelang, empa ke ea emeloang ke Morena.