Puso ea Manase, khosi ea Juda
1Manase o ne a e-na le lilemo tse leshome le metso e 'meli ha a qala ho busa. A busa ka lilemo tse mashome a mahlano a metso e mehlano, a le Jerusalema. 2A etsa bobe mahlong a Morena, a latela manyala a balichaba bao Morena a neng a ba leleke kapele ho bana ba Iseraele. 3A boela a haha libaka tseo ho rapelloang melimo ea bohata ho tsona, tseo ntat'ae Hesekiea a neng a ile a li heletsa. A tsosa lialetare tsa bo-Baale; a etsa litšoantšo tsa Ashera, a khumamela letsatsi, le khoeli, le linaleli, a li sebeletsa. 4A haha le lialetare ka Tempeleng ea Morena, eo Morena a neng a bue ka eona, a re: “Ke tla khumamelloa Jerusalema kamehla eohle.” 5A hahela letsatsi, le khoeli, le linaleli, lialetare mabaleng a mabeli a Tempele ea Morena. 6A etsa sehlabelo sa secheso ka bara ba hae, ka khohlong ea mora oa Hinome. A loea, a nōha, a sebelisa baloi, le ba buang le bafu, le linōhe. A etsa bobe bo boholo mahlong a Morena, a mo halefisa.
7Setšoantšo se betliloeng sa molimo oa bohata, seo a neng a se entse, a se hloma ka Tempeleng ea Morena, eo Morena a neng a bue ka eona ho Davida, le ho mora oa hae Solomone, a re: “Ka Tempeleng ena, le mona Jerusalema eo ke e khethileng har'a melōko eohle ea Iseraele, ke moo ke tla khumamelloa teng kamehla eohle. 8Haeba Baiseraele ba hlokomela ho phetha tsohle tseo ke ba laetseng tsona, ho ea ka molao oohle, le litaelo tsohle, le melaoana eohle, tseo mohlanka oa ka Moshe a ba laetseng tsona, nke ke ka hlola ke etsa hore ba tsoe naheng eo ke neng ke e nee bo-ntat'a bona.” 9Manase a etsa hore sechaba sa Juda le baahi ba Jerusalema ba etse sebe, le hore ba etse bobe bo fetang ba lichaba tseo Morena a neng a li timetse mahlong a bana ba Iseraele.
10Morena a bua ho Manase le ho sechaba sa hae, empa ba se ke ba mo mamela.
Manase oa inyatsa
11Ka baka leo, Morena a rōmela balaoli ba mabōtho a khosi ea Asiria, ba thōpa Manase, ba mo kenya khoathatha, ba mo tlama ka mahlaahlela a lethose, ba mo isa Babilona. 12Eitse ha Manase a le litlokotsing, a batla Morena Molimo oa hae, a ikokobetsa haholo kapele ho Molimo oa bo-ntat'ae. 13A mo rapela, 'me Molimo a rapeleha, a mamela thapelo ea hae, a mo khutlisetsa Jerusalema, 'musong oa hae. Joale Manase a tseba hore Morena ke eena Molimo.
14Kamora' tsena Manase a haha lerako le pota-potang Motse oa Davida kantle, a le haha ka khohlong, ka bophirimela ho Gihone, la ea fihla Khorong ea Litlhapi, la teela Ofele hare, la phahama haholo. Metseng eohle e hahelelitsoeng ea naha ea Juda a bea balaoli ba mabōtho. 15A tlosa melimo ea balichaba, le litšoantšo tse betliloeng tsa melimo ea bohata ka Tempeleng ea Morena. A heletsa le lialetare tsohle tseo a neng a li hahile thabeng eo Tempele ea Morena e neng e hahiloe ho eona, le Jerusalema; a li lahlela kantle ho motse. 16A tsosa aletare ea Morena, 'me holim'a eona a etsetsa linyehelo tsa teboho. Eaba Manase a laela ba morabe oa Juda hore ba sebeletse Morena Molimo oa Iseraele. 17Leha sechaba se ne se ntse se etsetsa mahlabelo libakeng tseo ho rapelloang melimo ea bohata ho tsona, empa se ne se a etsetsa Morena Molimo oa sona.
Qetello ea puso ea Manase
18Liketso tse ling tsa Manase, le thapelo eo a neng a rapele Molimo oa hae ka eona, le lipolelo tsa baporofeta ba neng ba rōmiloe ke Morena Molimo oa Iseraele, li ngotsoe Bukeng ea Likhosi tsa Iseraele. 19Le thapelo ea hae, le kamoo Molimo a ileng a mo mamela kateng, le libe tsa hae tsohle, le ho se tšepahale ha hae, le libaka tseo a ileng a haha libaka tseo ho rapelloang melimo ea bohata ho tsona, a ba a hloma litšoantšo tsa Ashera, le litšoantšo tse betliloeng, pele a ikokobetsa, tsena tsohle li ngotsoe Bukeng ea Liketsahalo tsa Baporofeta. 20Manase a shoa, 'me ba mo epela ka tlung ea hae. Amona, mora oa hae, a mo hlahlama.
Puso ea Amona, khosi ea Juda
21Amona o ne a e-na le lilemo tse mashome a mabeli a metso e 'meli ha a qala ho busa. A busa ka lilemo tse peli, a le Jerusalema. 22Empa a etsa bobe mahlong a Morena, joalokaha Manase, ntat'ae, a ile a etsa. Litšoantšo tsohle tse betliloeng, tseo Manase, ntat'ae, a neng a ile a li etsa, Amona a li etsetsa mahlabelo, 'me a li sebeletsa. 23Ha aa ka a ikokobetsa kapele ho Morena, joalokaha Manase, ntat'ae, a ile a ikokobetsa. Amona a 'na a eketsa molato oa hae.
24Eaba bahlanka ba hae baa mo rera, ba 'molaela ka tlung ea hae. 25Empa sechaba sa naha eo sa bolaea bohle ba ileng ba rera Amona, 'me sa bea Josiea, mora oa hae, hore e be khosi.
