Ho lokisetsoa Paseka ea Morena
1Hesekiea a rōmela molaetsa ho Baiseraele bohle, le ho sechaba sa Juda, a ba a ngolla le ba morabe oa Efraime le oa Manase, a ba memela hore ba tle Tempeleng ea Morena, Jerusalema, ho tla etsetsa Morena Molimo oa Iseraele, mokete oa Paseka. 2Khosi e ne e ile ea rerisana le mahosana 'ohle a eona, le sechaba sohle se Jerusalema, ho etsa mokete oa Paseka ka khoeli ea bobeli. 3Ba ne ba ke ke ba etsa mokete ona ka nako ea teng, hobane baprista ba ne ba e-s'o itlhoekise ka mokhoa o phethahetseng, 'me le sechaba se ne se e-s'o phuthehele Jerusalema. 4Hona ha thabisa khosi le sechaba sohle. 5Ba etsa taelo ea hore naheng eohle ea Iseraele, ho tloha Beeresheba ho ea fihla Dane, ho phatlalatsoe hore batho ba tle Jerusalema ho tla etsetsa Morena Molimo oa Iseraele, mokete oa Paseka, hobane e ne e le ba 'maloana feela ba neng ba e keteka joalokaha ho ngotsoe.
6Ka taelo ea khosi, maqosa a ea hohle naheng ea Iseraele le ea Juda, a isa mangolo a tsoang ho khosi le ho mahosana a eona, a reng:
“Lōna bana ba Iseraele, khutlelang ho Morena Molimo oa Aborahama, le Isaka, le Iseraele, 'me le eena o tla khutlela ho masalla a lōna a phonyohileng matsohong a likhosi tsa Asiria. 7Le se ke la etsisa bo-ntat'a lōna, le bana babo lōna, ba ileng ba siteloa Morena Molimo oa bo-ntat'a bona, ea ileng a ba etsa lintho tse tšabehang joalokaha le bona. 8Le se ke la satalatsa melala ea lōna joaloka bo-ntat'a lōna, le ineele Morena, le kene ka Sehalalelong sa hae seo a se halalelitseng kamehla eohle. Sebeletsang Morena Molimo oa lōna, e le hore khalefo ea hae e tlōkōmang e tle e le fapohe. 9Haeba le khutlela ho Morena, bana babo lōna, le bana ba lōna, ba tla fumana mohau ho bathōpi ba bona, 'me ba tla khutlela naheng ena, hobane Morena Molimo oa lōna, o mosa, o mohau. A ke ke a le furalla, ha le khutlela ho eena.”
10Maqōsa a ea le metse eohle ea ba morabe oa Efraime, le ea ba morabe oa Manase, ho ea fihla ho ba morabe oa Sebulone, empa batho ba a tšeha, ba a soma. 11Leha ho le joalo, ba bang ba morabe oa Ashere, le oa Manase, le oa Sebulone, ba ikokobetsa, ba ea Jerusalema. 12Le naheng ea Juda Molimo a etsa hore sechaba sa teng se be pelonngoe, ho phetha taelo ea khosi le ea mahosana, ho ea ka polelo ea Morena.
Ho ketekoa mokete oa Paseka
13Ka khoeli ea bobeli sechaba sa phuthehela Jerusalema ka bongata, ho ea keteka mokete oa mahobe a sa lōmōsoang. 14Batho ba tlosa lialetare Jerusalema, ba tlosa le lialetare tsohle tsa mokubetso, ba li lahlela ka molatsoaneng oa Kiderone.
15Ka letsatsi la leshome le metso e mene la khoeli ea bobeli, ba hlaba konyana ea Paseka. Baprista le Balevi ba hlajoa ke lihlong, 'me ba itlhoekisa, ba tlisa linyehelo tsa secheso ka Tempeleng ea Morena. 16Ba ema litulong tsa bona ho ea ka tloaelo ea bona, ho latela Molao oa Moshe, mohlanka oa Molimo. Baprista ba fōka ka mali ao ba a neiloeng ke Balevi. 17Kaha ba bangata, har'a sechaba, ba ne ba sa itlhoekisa, Balevi ba hlabela e mong le e mong oa bona konyana ea Paseka, ho e hloekisetsa Morena.
18Le hoja batho ba bangata, ba neng ba e-tsoa morabeng oa Efraime, le oa Manase, le oa Isakare, le oa Sebulone, ba ne ba sa itlhoekisa, le bona ba e-ja Paseka, ho fapana le kamoo ho ngotsoeng kateng. Empa Hesekiea a ba rapella, a re: “Morena ea lokileng a ke a tšoarele e mong le e mong oa bona, 19ea felang a ikemiselitse ho batla Morena Molimo oa bo-ntat'ae, leha a sa hloeka ho ea ka melao ea Sehalalelo.” 20Morena a mamela thapelo ea Hesekiea, a tšoarela sechaba.
21Bana ba Iseraele, ba neng ba le teng Jerusalema, ba keteka mokete oa mahobe a sa lōmōsoang ka matsatsi a supileng, ka thabo e kholo. Balevi le baprista bona ba 'na ba rorisa Morena ka tsatsi le leng le le leng, ba 'minela ka cheseho e kholo.
22Hesekiea a khothatsa Balevi bohle ba neng ba bonahala ba utloisisa tšebeletso ea Morena. Ka matsatsi a supileng ba e-ja, ba etsa linyehelo tsa teboho, 'me ba boka Morena Molimo oa bo-ntat'a bona.
Paseka e ketekoa khetlo la bobeli
23Sechaba sohle sa lumellana hore se boele se keteke ka matsatsi a supileng, 'me sa boela sa keteka ka thabo, ka matsatsi a mang a supileng. 24Hesekiea, khosi ea Juda, a nea sechaba lipohoana tse sekete, le likhutšoane tse likete tse supileng. Mahosana le 'ona a nea sechaba lipohoana tse sekete, le likhutšoane tse likete tse leshome. Baprista ba bangata ba itlhoekisa. 25Sechaba sohle sa Juda sa nyakalla hammoho le baprista le Balevi le bohle ba neng ba phuthehile, ba e-tsoa naheng ea Iseraele, le balichaba ba neng ba e-tsoa naheng ea Iseraele, le ba neng ba phela naheng ea Juda. 26Thabo ea e-ba kholo Jerusalema, hobane haesale ho tloha mehleng ea Solomone, mora oa Davida, khosi ea Iseraele, ho ne ho e-s'o ka ho e-ba le ntho e tšoanang le ena, Jerusalema. 27Joale baprista, e leng Balevi, ba ema, ba hlohonolofatsa sechaba. Mantsoe a bona a utloahala, 'me thapelo ea bona ea fihla leahong la Molimo le halalelang, le leholimong.
