Puso ea Akase, khosi ea Juda
1Akase o ne a e-na le lilemo tse mashome a mabeli ha a qala ho busa. A busa ka lilemo tse leshome le metso e tšeletseng, a le Jerusalema. Empa ha aa ka a khahlisa Morena Molimo oa hae, joalokaha Davida, ntat'ae-moholo, eena a ile a khahlisa Morena. 2A tsamaea mehlaleng ea likhosi tsa Iseraele; a etsa melimo ea bohata ea bo-Baale. 3A chesetsa le mokubetso ka khohlong ea mora oa Hinome, e etsa sehlabelo sa secheso ka bara ba hae, ho latela manyala a balichaba bao Morena a neng a ile a ba leleka kapele ho bana ba Iseraele. 4A etsa mahlabelo, a chesetsa le mokubetso libakeng tseo ho rapelloang melimo ea bohata ho tsona, le holim'a maralla, le katlase ho lifate tsohle tse talana.
Ntoa ea Baarame le Baiseraele
5Ka lebaka lena, Morena Molimo oa hae, a neelana ka Akase matsohong a khosi ea Arame. Khosi ena ea mo hlōla, 'me ea thōpa letšoelehali la sechaba sa Juda, ea le isa Damaseka.
Hape ha neelanoa ka eena matsohong a khosi ea Iseraele, e ileng ea mo hlōla, bahlabani ba hae ea ba etsa mofela. 6Peka, mora oa Remaleea, a bolaea ba sechaba sa Juda ba likete tse lekholo le mashome a mabeli ka letsatsi le le leng feela. Bana bohle e ne e le bahale. Ba bolaoa kahobane sechaba sa Juda se ne se furaletse Morena Molimo oa bo-ntat'a sona. 7Sikeri, mohale oa ba morabe oa Efraime, a bolaea Maasiea, mora oa khosi, le Asarikama mookameli oa ntlo ea khosi, le Elekana, letsoho la khosi. 8Bana ba Iseraele ba thōpa bana babo bona ba likete tse makholo a mabeli, e le basali, le bara, le barali. Ba hahara le khapo e ngata, ba e isa Samaria.
Moporofeta Odede
9Moporofeta oa Molimo o ne a le teng moo, lebitso la hae e le Odede. A ea khahlanyetsa lebōtho le fihlileng Samaria, a re ho lona: “Bonang mona: Kaha Morena Molimo oa bo-ntat'a lōna, a ne a halefetse sechaba sa Juda, o neelane ka sona matsohong a lōna. Le se bolaile le halefile haholo, 'me khalefo ea lōna e fihlile leholimong. 10Joale sepheo sa lōna ke hore banna le basali ba sechaba sa Juda, le ba tsoang Jerusalema, le ba etse makhoba a lōna. Na lōna ha lea siteloa Morena Molimo oa lōna? 11Ka baka lena, 'mameleng, 'me le khutlise bathōpuoa bao le ba thōpileng e le bana babo lōna, hobane Morena o le halefetse.”
12Ba bang ba lihlooho tsa bana ba Iseraele, e leng bo-Asariea, mora oa Johanane, le Berekiea, mora oa Meshilemote, le Jehesekiea, mora oa Shalōme, le Amasa, mora oa Hadelai, ba bolella ba tsoang ntoeng sefahla-mahlo, 13ba re ho bona: “Le ke ke la tlisa bathōpuoa bana mona! Ere re s'e ntse re sitetsoe Morena, joale le batla ho eketsa libe tsa rōna le melato ea rōna! Tšito ea rōna e kholo, 'me Baiseraele ba halefetsoe ka khalefo a tšabehang!”
14Eaba bahlabani ba tlohela bathōpuoa le khapo kapele ho mahosana le sechaba sohle.
15Banna ba ileng ba thonngoa ka mabitso ba ema, ba nka bathōpuoa. Ka thepa e hapiloeng ba apesa bohle ba neng ba hlobotse; ba ba apesa, ba ba roesa lieta, ba ba fepa, ba ba fa se nooang, ba ba tlotsa ka ole. Ba fokolang ba bona ba ba palamisa litonki, ba ba isa Jeriko, motseng oa lipalema, ho bana babo bona, ba nt'o khutlela Samaria.
Akase o kōpa thuso ho Baasiria
16Ka eona nako eo, khosi Akase a rōmela molaetsa ho likhosi tsa Asiria, hore li tl'o mo thusa. 17Baedomo ba ne ba ile ba futuha hape, ba fihla ba hlōla sechaba sa Juda, 'me ba thōpa batho. 18Le Bafilesita ba ne ba se ba futuhetse metse e ka mabalane, le e ka boroa ho naha ea Juda, ba hapile Bete-Shemeshe, le Aiealone, le Gederote, le Sōkō le metsana ea eona, le Timina le metsana ea eona, le Gimeso le metsana ea eona, 'me ba se ba ahile moo. 19Ka lebaka la Akase, khosi ea Iseraele, Morena a kokobetsa sechaba sa Juda, hobane Akase a ile a tōtisa bokhopo naheng ea Juda, 'me a se ke a tšepahala ho Morena. 20Tigelate-Pilesere, khosi ea Asiria, a fihla ho Akase, 'me sebakeng sa hore a mo thuse, a mo tšoenya. 21Eaba Akase o nka karolo ea lintho tse ka Tempeleng ea Morena, le tse ka tlung ea khosi, le tse ka matlung a mahosana, o li nea khosi ea Asiria, empa ea se ke ea mo thusa.
Libe tsa Akase
22Ka nako ea litsietsi tsena tsa hae, eena khosi Akase eo a siteloa Morena le ho feta. 23Akase a etsetsa melimo ea bohata ea Damaseka, mahlabelo, e leng eona e ntseng e mo timetsa, 'me a re: “Kaha melimo ea likhosi tsa Arame e li thusitse, le 'na ke tla e etsetsa mahlabelo, e le hore e tle e nthuse.” Empa ke eona melimo eo e ileng ea mo timetsa, ea timetsa le naha eohle ea Iseraele.
24Akase a bōkella thepa ea Tempele ea Molimo, a e pshatla, a koala menyako ea Tempele ea Morena, 'me mateanong 'ohle a litsela tsa Jerusalema a ikhahela lialetare. 25Metseng eohle ea naha ea Juda, a haha libaka tseo ho rapelloang melimo ea bohata ho tsona, hore ho chesetsoe melimo ena mokubetso ho tsona, 'me ka hona a halefisa Morena Molimo oa bo-ntat'ae.
26Liketso tse ling tsa Akase, le mesebetsi ea hae eohle, ho tloha qalong ho isa qetellong, li ngotsoe Bukeng ea Likhosi tsa Juda le tsa Iseraele.
27Akase a shoa, 'me ba mo epela motseng oa Jerusalema. Empa ba se ke ba mo epela mabitleng a likhosi tsa Iseraele. Hesekiea, mora oa hae, a mo hlahlama.
