2 LIKETSAHALO 26

₁Sechaba sohle sa Juda sa bea Usiea setulong sa Amasiea, ntat'ae. O ne a e-na le lilemo tse leshome le metso e tšeletseng. ₂Ke eena ea ileng a haheletsa Elate, a ba a e khutlisetsa ho sechaba sa Juda. Kamorao ho moo khosi Amasiea a shoa.

₃Usiea o ne a e-na le lilemo tse leshome le metso e tšeletseng ha a qala ho busa. A busa ka lemo tse mashome a mahlano a metso e 'meli, a le Jerusalema. Lebitso la 'm'ae e ne e le Jekoleea, eo hahabo e neng e le Jerusalema. ₄A khahlisa Morena joalokaha ntat'ae, Amasiea, a ile a etsa. ₅Mehleng ea Sekariea, ea neng a e-na le kutloisiso ea lipono tsa Molimo, Usiea a phetha thato ea Molimo. Ka nako eohle ha a ntse a phetha thato ea Morena, Molimo o ile a mo atlehisa.

₆O ile a tsamaea, a futuhela Bafilesita, a thua lerako la Gate, le lerako la Jabene, le lerako la Ashedode; a haha le metse Ashedode le har'a Bafilesita. ₇Molimo a mo thusa ho hlōla Bafilesita, le ho hlōla Maarabia a neng a ahile Gure-Baale, a ba a hlōla le Bameune. ₈Baamone ba thèlla Usiea. Lebitso la hae la tuma ho ea fihla meeling ea Egepeta, kahobane o ne a ile a imatlafatsa haholo.

₉Ho feta mona, Usiea a haha litora Jerusalema, Khorong e Hukung, le Khorong e ka Khohlong, le moo lerako le fellang teng, 'me a li haheletsa. ₁₀A haha litora tse ling lehoatateng. A cheka liliba tse ngata, hobane o ne a e-na le mehlape ea liphoofolo liphuleng le lithōteng. O ne a e-na le bahlanka ba lemang masimo, le ba lemang lifate tsa morara lithabeng le Karamele. O ne a rata temo haholo.

₁₁Hape Usiea o ne a e-na le lebōtho la bahlabani, le neng le futuha ka mekhahlelo, ho ea kamoo ba neng ba baloa kateng ke Jeiele, eo e neng e le mongoli, le ke Maasiea, eo e neng e le molaoli ea katlas'a Hananiea, e mong oa baokameli ba mabōtho a khosi. ₁₂Palo ea baokameli ba bahale, ho ea ka malapa abo bona, e ne e le likete tse peli le makholo a tšeletseng. ₁₃Baokameli ba ne ba laola lebōtho le matla la bahlabani ba likete tse makholo a mararo a metso e supileng le makholo a mahlano. Ba ne ba ka futuha ka matla a tšabehang ho thusetsa khosi ho lira tsa eona. ₁₄Usiea a etsetsa mabōtho ana 'ohle lithèbè, le marumo, le likatiba tsa tšepe, le libaki tsa tšepe, le liqha, a ba nea le majoe a tla betsoa ka matjeketjane. ₁₅Mane Jerusalema a etsa mechine e qapiloeng ke banna ba hlalefileng, eo ho betsoang metsu le likakaoehali tsa majoe ka eona. E ne e beiloe holim'a litora le holim'a marako a motse. Lebitso la hae la tuma hohle, 'me a fumana lithuso tse makatsang, ho fihlela a matlafala haholo.

₁₆Ha Usiea a se a matlafetse a ikhōhōmōsa, 'me hona ha etsa hore a oe. O ne a ile a siteloa Morena Molimo oa hae, a kena ka Tempeleng ea Morena ho ea chesetsa mokubetso holim'a aletare ea mokubetso. ₁₇Moprista Asariea a kena a mo setse morao, a e-na le baprista ba Morena ba mashome a robeli, bao e neng e le bahale. ₁₈Ba bolella khosi Usiea sefahla-mahlo, ba re ho eena: “Usiea, ha u na tokelo ea ho chesetsa Morena mokubetso; ke baprista feela, e leng bara ba Arone, ba ileng ba halaleletsoa ho chesa mokubetso. Tsoa ka mona ka Sehalalelong, hobane u sitiloe; ebile Morena Molimo a ke ke a u tlōtla!”

₁₉Usiea, ea neng a ntse a tšoere pitsana ea ho chesa mokubetso, a halefa haholo. Eare a sa ntsane a halefetse baprista joalo, a tsoa lepera phatleng, a le kapele ho baprista, ka Tempeleng ea Morena, pel'a aletare ea mokubetso. ₂₀Ha Moprista e Moholo Asariea le baprista bohle ba mo talima, ba bona hore o tsoile lepera phatleng, ba mo sutumeletsa kantle, 'me le eena a tsoa ka potlako, hobane Morena o ne a mo otlile.

₂₁Khosi Usiea ea e-ba molepera ho fihlela a e-shoa. A phela a le inotši tlung e kathōko, hobane o ne a ke ke a hlola a kena ka Tempeleng ea Morena. Jotame, mora oa hae, ea e-ba eena mookameli oa lelapa la khosi, a busa sechaba sa naha eo.

₂₂Liketso tse ling tsa Usiea, ho tloha qalong ho isa qetellong, li ngotsoe ke moporofeta Esaea, mora oa Amose. ₂₃Eaba Usiea oa shoa, ba mo epela le bo-ntat'ae, setšeng seo ho epeloang likhosi ho sona, hobane ba ne ba re: “Usiea ke molepera!” Jotame, mora oa hae, a mo hlahlama.