Puso ea Jōoashe, khosi ea Juda
1Jōoashe o ne a e-na le lilemo tse supileng ha a qala ho busa. A busa ka lilemo tse mashome a mane, a le Jerusalema. Lebitso la 'm'ae e ne e le Sebiea, eo ha habo e neng e le Beeresheba. 2Jōoashe a khahlisa Morena ka nako eohle ea ho phela ha moprista Jehoeada. 3Jehoeada a mo nyalisa basali ba babeli, 'me a tsoala bara le barali.
4Kamora' nako e itseng, Jōoashe a rera ho lokisa Tempele ea Morena. 5A bitsa baprista le Balevi, a re ho bona: “Tsamaeang, le ee metseng ea Juda, 'me le ntšise Baiseraele bohle chelete ea lekhetho ea selemo se seng le se seng, e tla lokisa Tempele ea Morena, 'me taba ena le e potlakise.” Leha ho le joalo, Balevi ba se ke ba e potlakisa.
6Eaba khosi e bitsa Moprista e Moholo, Jehoeada, 'me ea re ho eena: “Ke ka baka la'ng u sa kang ua qhoqha hore Balevi ba tlise chelete ea lekhetho eo Moshe, mohlanka oa Morena, 'moho le sechaba sa Iseraele, a ileng a laela hore sechaba sa Juda le baahi ba Jerusalema ba e ntšetse Tente ea Morena?”
7Bara ba Ataleea, mosali eane ea khopo, ba ne ba ile ba thua Tempele ea Molimo, le limpho tsohle tse halalelang tsa Tempele ea Morena, ba li abela tšebeletso ea bo-Baale.
8Ka taelo ea khosi ba etsa letlōle, 'me ba le bea monyako oa Tempele ea Morena. 9Ba phatlalatsa har'a naha eohle ea Juda le Jerusalema, hore ho tlisetsoe Morena chelete ea lekhetho, eo Moshe, mohlanka oa Molimo, a ileng a re Baiseraele ba tle ba e ntše, ha a ne a le lehoatateng. 10Mahosana 'ohle le sechaba sohle sa nyakalla, 'me sa tlisa limpho tsa sona ka letlōleng, ho fihlela le tlala. 11Ha Balevi ba ne ba tlisa letlōle lena ka tlung ea khosi, 'me ba fumana le e-na le chelete e ngata, mongoli oa khosi, le mohlanka oa Moprista e Moholo, ba ne ba ee ba ntše chelete ka letlōleng, 'me ba le busetse hape sebakeng sa lona. Ka letsatsi le leng le le leng ba ne ba etsa joalo, 'me ba bōkella chelete e ngata.
12Bo-khosi le Jehoeada ba ne ba ee ba e nee ba lokisang Tempele ea Morena, bao ba hire libetli tsa majoe, le libetli tsa mapolanka, ho lokisa Tempele ea Morena; ba hire le ba sebetsang ka tšepe, le ka lethose, ho thiba likheo tse Tempeleng ea Morena.
13Basebetsi ba sebetsa ka thata, ba phetha mosebetsi, 'me ba khutlisetsa Tempele ea Morena sebōpehong sa eona, ba e matlafatsa. 14Ha ba se ba e qetile, ba tlisa chelete e setseng ho khosi le ho Jehoeada, 'me ka eona ha etsoa thepa ea Tempele ea Morena, le lintho tse sebeletsang, le tsa ho etsa linyehelo, le likhaba, le lintho tse entsoeng ka khauta, le ka silefera. Ka matsatsi 'ohle a ho phela ha Jehoeada, ba 'na ba etsetsa Morena linyehelo tsa secheso ka Tempeleng ea Morena.
15Ha Jehoeada a se a tsofetse, e se e le mobu, a hlokahala a e-na le lilemo tse lekholo le mashome a mararo. 16A epeloa Motseng oa Davida, le likhosi tse ling, hobane o ne a sebelelitse Iseraele, le Molimo, le Tempele ea Molimo hantle.
Bokhopo ba Jōoashe
17Hoba Jehoeada a shoe, mahosana a Juda a tla boka likhomo ho khosi, 'me khosi ea a mamela. 18Mahosana a furalla Tempele ea Morena Molimo oa bo-ntat'a 'ona, a sebeletsa litšoantšo tsa Ashera le melimo ea bohata. Ka baka la tšito ena ea 'ona, khalefo ea Morena ea tlōkōmela sechaba sa Juda le baahi ba Jerusalema. 19Le hoja Morena a ile a ba a rōmela baporofeta ho khutlisetsa sechaba ho eena, ha sea ka sa mamela.
20Moea oa Molimo oa theohela holim'a Sekariea, mora oa moprista Jehoeada, 'me eena a ema har'a sechaba, a re: “Molimo o bua tjena: ‘Ke ba baka la'ng le tlōlang litaelo tsa Morena, le bile le sa atlehe? Ke kahobane le furaletse Morena, 'me le eena o le furaletse.’ ”
21Ka taelo ea khosi ba mo rera, ba 'molaea, ba mo tlepetsa ka majoe a le lebaleng la Tempele ea Morena. 22Jōoashe a se ke a ba a hopola molemo oo Jehoeada, ntat'a Sekariea, a ileng a mo etsetsa oona, eaba o bolaea mora oa Jehoeada. Ha Sekariea a e-shoa, a re: “Morena a ke a le bone, 'me a le otle!”
Qetello ea puso ea Jōoashe
23Ha selemo se il'o fela, mabōtho a Baarame a futuhela Jōoashe. Mabōtho ao a fihla naheng ea sechaba sa Juda le Jerusalema, a bolaea mahosana 'ohle a sechaba, 'me tsohle tseo a li hapileng, a li isa ho khosi ea Damaseka. 24Lebōtho la Arame e ne e le sehlotšoana sa bahlabani, empa Morena a neelana ka lebōtho le leholo la Baiseraele matsohong a Baarame, hobane Baiseraele ba ne ba furaletse Morena Molimo oa bo-ntat'a bona. Ka mokhoa ona ba ahlōla Jōoashe. 25Baarame ba mo siea ba mo ntšitse likotsi tse tšabehang. Bahlanka ba hae ba mo rera, hobane o ne a ile a bolaea bara ba moprista Jehoeada. Ba 'molaela liphateng tsa hae, 'me a shoa. Ba mo epela Motseng oa Davida, empa e seng mabitleng a likhosi.
26Ba ileng ba mo rera ke bana: Sabada, mora oa Shimate, eo e neng e le mosali oa Moamone, le Jehosabada, mora oa Shimerite, eo e neng e le mosali oa Bamoabe. 27Ha e le taba tsa bara ba hae, le tsohle tseo a ileng a li porofeteloa, le tsa ho lokisa Tempele ea Molimo, tsena le ngotsoe Bukeng ea Liketsahalo tsa Likhosi. Amasiea, mora oa hae, a mo hlahlama.
