Jehoshafate o hlōla Bamoabe le Baamone
1Kamora' tsena, Bamoabe, le Baamone, le Bamuene ba bang, ba futuhela Jehoshafate.
2Batho ba bang ba fihla, ba bolella Jehoshafate, ba re: “Lebōtho le leholohali, le tsoang ka nqane ho leoatle, lea tla, le tlil'o u futuhela. Le se le le Hasesone-Tamare, e leng Ene-Gedi.” 3Jehoshafate a tšoha, 'me a ipiletsa ho Morena. A phatlalatsa hore naheng eohle ea Juda ho itingoe lijo. 4Sechaba sa Juda sa khōbōkana ho tla ipiletsa ho Morena. Se ne se e-tsoa metseng eohle ea Juda, ho tla ipiletsa ho Morena.
5Jehoshafate a ema kahar'a sechaba sa Juda le sa Jerusalema, a le Tempeleng ea Morena, kapele ho seotloana se secha. 6A re: “Oho, Morena Molimo oa bo-ntat'a rōna, na hase uena Molimo ea leholimong? Na hase uena ea busang mebuso eohle ea balichaba? Letsoho la hao le matla hoo ho seng ea ka emang kapele ho uena. 7Na hase uena Molimo oa rōna, ea ileng a leleka baahi ba naha ee kapele ho sechaba sa hao sa Iseraele, ua ba ua e nea litlōhōlō tsa Aborahama, motsoalle oa hao, kamehla eohle? 8Sechaba sa hao se ile sa aha naheng ena, sa u hahela Sehalalelo ho eona, hore u tle u khumamelloe teng, 'me sa ba sa re: 9‘Haeba bobe bo ka re oela holimo, eba re ka bolaoa ka sabole, kapa ra ahlōloa, kapa ra oeloa ke lefu la seoa, kapa sekoboto, re tla ema kapele ho Tempele ena, le kapele ho uena, hobane ke moo u khumamelloang teng. Tsietsing ea rōna re tla ipiletsa ho uena, 'me u tla re utloa, u re pholose.’
10“Ha bana ba Iseraele ba ne ba e-tsoa Egepeta, u ne u ba laele hore ba se ke ba futuhela Baamone, le Bamoabe, le lichaba tse tsoang thabeng ea Seire, 'me ba fela ba ba koekoetla, ba se ke ba ba timetsa. 11Empa joale ak'u bone: Ba re putsa ka ho tla re leleka naheng ena ea hao, eo u neng u re nee eona hore e be lefa la rōna. 12Oho, Molimo oa rōna, ak'u ba ahlōle! Re hloka matla a ho loantša lebōthohali lena le re futuhetseng. Ha re tsebe le seo re ka se etsang, empa rōna re tšepile uena.”
13Sechaba sohle sa Juda se ne se eme kapele ho Morena, se e-na le masea a sona, le basali ba sona, le bana ba sona.
14Joale Moea oa Morena oa theohela holim'a Jahaseele, mora oa Sekariea, setlōhōlō sa Benaea, setlōhōloana sa Jeiele, setlōhōtlōhōloana sa Mataneea eo e neng e le Molevi oa lelōkō la Asafo. Oa theohela holim'a hae a ntse a le kahar'a sechaba.
15Eaba Jahaseele o re: “Lōna bohle ba sechaba sa Juda, le lōna baahi ba Jerusalema, le uena khosi Jehoshafate, mamelang! Morena o bua tjena ho lōna: ‘Le se ke la tšaba, leha e le ho nyahama lipelo, ka baka la letšoelehali lena, hobane ntoa ena hase ea lōna, empa ke ea Molimo. 16Hosasane le ba futuhele. Ba tla tla ka tsela e nyolohang ka moepeng oa Sisa, 'me le tla ba fumana moo khohlo e fellang teng, kapele ho lehoatata la Jeruele. 17Ha ho na ho hlokahala hore le loane; le ikemele feela, le tle le bone ha Morena a pholosa sechaba sa Juda, le baahi ba Jerusalema. Le se ke la tšaba, kapa la tšoha; hosasane le ba futuhele, hobane Morena o tla ba le lōna.’ ”
18Joale Jehoshafate a obamela fatše ka sefahleho. Baahi bohle ba naha ea Juda le baahi bohle ba Jerusalema, ba itihela fatše kapele ho Morena, ba mo khumamela. 19Balevi ba morabe oa Kohate, le Balevi ba morabe oa Kora, ba ema, ba rorisa Morena Molimo, ka mantsoe e phahameng.
20Ba tsoha e sa le ka malungoalungoana, ba ea lehoatateng le Tekōoa. Ha ba ntse ba tsamaea, Jehoshafate a ema, a re: “Lōna baahi ba Juda, le lōna baahi ba Jerusalema, 'mameleng! Tšepang Morena Molimo oa lōna, 'me le ke ke la sisinyeha. Tšepang baporofeta ba hae, 'me le tla atleha.” 21Hoba Jehoshafate a rerisane le sechaba, a khethela Morena libini tse neng li tla rorisa Morena li khabile ka tse halalelang, ha li ntse li eteletse lebōtho pele. Li ne li bina, li re:
“Rorisang Morena,
hobane mohau oa hae
ke oa kamehla eohle.”
22Eitse ha libini li qala ho bina, Morena a etsa hore Baamone, le Bamoabe, le ba tsoang thabeng ea Seire, ba neng ba futuhetse naha ea Juda, ba lalloe, 'me ba hlōloe. 23Baamone, le Bamoabe, ba fetohela baahi ba tsoang thabeng ea Seire, ba ba bolaea, ba ba timetsa ho hang. Hoba ba timetse baahi ba Seire, Baamone le Bamoabe ba bolaeana ka bobona.
24Eitse ha ba lebōtho la sechaba sa Juda ba fihla toreng e lehoatateng, 'me ba talima, ba bona letšoelehali e se e le litōpō tse rapaletseng fatše, ho se le ea mong ea phonyohileng. 25Ha Jehoshafate le sechaba sa hae ba il'o hapa, ba fumana maruo a mangata, le liaparo, le lintho tsa bohlokoa. Eaba ba inkela matlotlo ao, 'me a e-ba mangata hoo ba bileng ba sitoa ho a nka kaofela. Khapo e ne e le ngata hoo ba ileng ba nka matsatsi a mararo ba ntse ba e bōkella.
26Ka letsatsi la bone ba khōbōkana ka Khohlong ea Beraka, ba rorisa Morena. Ka baka leo, sebaka seo sa reoa lebitso la Khohlo ea Beraka, 'me ho fihella le kajeno-ea-bokajeno se ntse se bitsoa joalo. 27Joale bohle ba sechaba sa Juda, le baahi ba Jerusalema, ba khutlela Jerusalema ka thabo, ba eteletsoe pele ke Jehoshafate. Ba ne ba thabile, hobane Morena a ne a ile a etsa hore ba hlōle lira tsa bona. 28Ba kena motseng oa Jerusalema, ka Tempeleng ea Morena, ba ntse ba letsa likatara, le liharepa, le literompeta.
29Mebuso eohle ea linaha tseo ea tšaba Molimo, ha e utloa hore Morena o hlōtse lira tsa Iseraele. 30'Muso oa Jehoshafate oa e-ba le khotso, hobane Molimo oa hae a ne a mo neile boiketlo kahohle.
Jehoshafate o qetella ho busa
31Jehoshafate a busa ba naha ea Juda. Ha a qala ho busa o ne a e-na le lilemo tse mashome a mararo a metso e mehlano. A busa ka lilemo tse mashome a mabeli a metso e mehlano, a le Jerusalema. Lebitso la 'm'ae e ne e le Asuba, morali oa Shilehi. 32Jehoshafate a tsamaea mehlaleng ea ntat'ae Asa, a se ke a kheloha, a mpa a khahlisa Morena. 33Leha ho le joalo, libaka tsa borapeli tseo ho rapelloang melimo ea bohata ho tsona, ha lia ka tsa felisoa, hobane sechaba se ne se e-s'o ka se ikemisetsa ho sebeletsa Molimo oa bo-ntat'a sona.
34Liketso tse ling tsa Jehoshafate, ho tloha qalong ho isa qetellong, li ngotsoe Bukeng ea Jehu, mora oa Hanani, eo litaba tsa hae li ngotsoeng Bukeng ea Likhosi tsa Iseraele.
35Kamora' tsena, Jehoshafate, khosi ea Juda, a etsa selekane le Akasiea, khosi ea Iseraele, ea neng a le khopo-khopo. 36Jehoshafate a etsa tumellano le Akasiea hore ba hahe likepe tse tla ea Tarashishe. Likepe tseo tsa haheloa motseng oa Esione-Gebere. 37Joale Eleesere, mora oa Dodaoa, ea tsoang Maresha, a porofetela Jehoshafate bobe bo tla mo hlahela, a re: “Kahobane u entse selekane le Akasiea, Morena o sentse mosebetsi oa hao.” Kahoo likepe tsa hae tsa pshatleha, tsa sitoa ho ea Tarashishe.
