Puso ea Jehoshafate, khosi ea Juda
1Jehoshafate, mora oa Asa, a hlahlama ntat'ae, 'me a imatlafatsa, hore a se ke a futuheloa ke Iseraele. 2A bea mabōtho a hae metseng eohle e hahelelitsoeng e naheng ea Juda. A hloma liahelo tsa mabōtho naheng ea Juda le metseng ea naha ea ba morabe oa Efraime, eo Asa, ntat'ae, a neng a ile a e hapa.
3Morena a ba le Jehoshafate, hobane a ne a ile a tsamaea mehlaleng ea pele ea Davida, ntat'ae-moholo, a se ke a sebeletsa bo-Baale, 4a mpa a sebeletsa Molimo oa ntat'ae, a bōlōka litaelo tsa hae, a se ke a etsisa Baiseraele. 5Ka baka leo, Morena a tsitsisa 'muso oa hae. Bohle ba sechaba sa Juda ba tlisetsa Jehoshafate limpho, 'me a rua haholo, a tlōtleha. 6A ba motlōtlō ho sebeletsa Morena. A ba a felisa le libaka tseo ho rapelloang melimo ea bohata ho tsona, a tlosa le litšoantšo tsa Ashera naheng ea Juda.
7Ka selemo sa boraro sa puso ea hae, a rōmela mahosana a hae, e leng Bene-Haile, le Obadiea, le Sekariea, le Netanele, le 'Mikiea, ho ea ruta metseng ea Juda. 8A ba rōmela ba e-na le Balevi bana: Shemaea, le Netaniea, le Sebadiea, le Asaele, le Shemiramote, le Jehonathane, le Adoniea, le Tobiea, le Tobe-Adoniea, le baprista Eleshama le Jehorame. 9Ba ruta hohle naheng ea Juda, ba nkile Buka ea Molao oa Morena. Ba ea metseng eohle ea Juda ba ntse ba ruta sechaba.
Botumo ba Jehoshafate
10Morena a kenya mebuso eohle e pota-potileng naha ea Juda letsoalo, hoo e sa kang ea loantša Jehoshafate. 11Ba bang ba Bafilesita ba tlisetsa Jehoshafate limpho, ba mo thèlla ka silefera. Maarabia a mo thèlla ka mehlape ea lipheleu tse likete tse supileng le makholo a supileng, le liphooko tse likete tse supileng le makholo a supileng.
12Jehoshafate a 'na a matlafala haholo. A haha liqhobosheane le metse eo ho bōlōkoang lijo le lihlomo ho eona, naheng ea Juda. 13A ba le libaka tse ngata tsa polokelo metseng ea Juda. Jerusalema teng o ne a e-na le bahlabani ba bahale. 14Palo ea bahlabani bana, ho ea ka malapa abo bona, ke ena: Ho ba morabe oa Juda, Adena e ne e le mookameli oa balaoli ba ba sekete; a okametse bahale ba likete tse makholo a mararo. 15E mong e ne e le Jehohanane, eo e neng e le molaoli oa bahale ba likete tse makholo a mabeli le mashome a robeli; 16e mong e le Amasiea, mora oa Sikeri, ea ileng a ithaopela ho sebeletsa Morena. E ne e le molaoli oa bahale ba likete tse makholo a mabeli. 17Ho ba morabe oa Benjamine e ne e le Eleada oa mohale, ea neng a laola bahlabani ba likete tse makholo a mabeli, ba hlomelang ka lithèbè le ka liqha. 18E mong e ne e le Jehosabada, ea neng a laola bahlabani ba likete tse lekholo le mashome a robeli, ba malala-a-laotsoe. 19Banna bana bohle ba ne ba sebeletsa khosi, ntle ho bao khosi e neng e ba beile metseng e hahelelitsoeng e neng e le naheng eohle ea Juda.
