Asa o tšoenyana le Baiseraele
1Ka selemo sa mashome a mararo a metso e tšeletseng sa puso ea Asa, Basha, khosi ea Iseraele, a futuhela naha ea Juda, 'me a haheletsa motse oa Rama, hore a thibele bohle ba eang kapa ba tsoang naheng ea Asa, khosi ea Juda.
2Asa a nka silefera le khauta e neng e bōlōkiloe ka letlōleng la Tempele ea Morena, le ka letlōleng la ntlo ea khosi. Tsena a li rōmela ho Bene-Hadade, khosi ea Arame, ea neng a ahile Damaseka, 'me a re: 3“Rōna le uena re na le selekane, joalokaha bo-ntat'a rōna ba ne ba e-na le sona. Joale ke u rōmetse silefera le khauta. Tsamaea he, u e'o senya selekane sa lōna le Basha, khosi ea Iseraele, hore a tle a ntlhōkōmōlōhe.”
4Bene-Hadade a ananela mantsoe ao a khosi Asa. A rōmela balaoli ba mabōtho a hae ho futuhela metse ea Iseraele. Ba ripitla motse oa Ione, le oa Dane, le oa Abele-Maime, le metse eohle ea Nafthali e nang le lisiu. 5Eitse ha Basha a utloela taba ena, a khaotsa ho haheletsa motse oa Rama, a tlohela mosebetsi oo. 6Joale khosi Asa a rōmela banna bohle ba Juda; bao ba tla, ba fihla Rama, ba nka majoe le lithupa tseo Basha a neng a haheletsa motse ka tsona, 'me ka tsona a haheletsa motse oa Geba le oa Misepa.
Hanani oa moporofeta
7Ka eona nako eo, Hanani oa moporofeta a fihla ho Asa, khosi ea Juda, a re ho eena: “Kahobane u ile ua tšepa khosi ea Arame, ua se ke ua tšepa Morena Molimo oa hao, lebōtho la khosi ea Arame le u phonyohile. 8Na Bakushe le Balebia e ne e se lebōthohali le nang le likariki tsa ntoa tse ngata haholo, le bahlabani ba bangata, ba palamang? Empa kahobane u ile ua tšepa Morena, o ile a neelana ka bona matsohong a hao. 9Morena o bona tsohle tse lefatšeng, ho matlafatsa le ho thusa ba mo tšepang ka lipelo tsohle tsa bona. Empa mona teng u sebelitse ka bothoto; ka baka leo, ho tloha joale u tla loeba kahar'a ntoa.”
10Asa a halefela moporofeta, a ba a mo kenya chankaneng. O ne a mo halefetse ka baka la polelo ena, 'me ka eona nako eo Asa a phelisa batho ba bang ka thata.
Asa o qetella ho busa
11Liketso tsohle tsa Asa, ho tloha qalong ho isa qetellong, li ngotsoe Bukeng ea Likhosi tsa Juda le tsa Iseraele. 12Ka selemo sa mashome a mararo a metso e robong sa puso ea hae, Asa a jeoa ke lefu la maoto. Le hoja lefu lena la hae le 'nile la ipha matla, ha aa ka a batla thuso ho Morena, o ile a e batla ho lingaka.
13Asa a shoa ka selemo sa mashome a mane a motso o mong sa puso ea hae. 14A epeloa lebitleng leo a ileng a iketsetsa lona, Motseng oa Davida. Ba bea setōpō sa hae holim'a moalo o nonolitsoeng ka tse monko o monate, le ka linōko tsa mefuta-futa, tse tsoakiloeng ke litsebi tsa metsoako ea litlolo. Ba besa tetema ea mollo ho mo tlōtla.
