Asa o etsa liphetoho
1Moea oa Molimo oa theohela holim'a Asariea, mora oa Odede. 2Eaba Asariea o ea khahlanyetsa Asa, 'me o fihla a re ho eena: “Uena Asa, le bohle ba morabe oa Juda le oa Benjamine, 'mameleng! Morena o na le lōna haeba le lōna le e-na le eena. Ha le 'matla le tla mo fumana, empa haeba le mo furalla le eena o tla le furalla. 3E se e le nako e telele Baiseraele ba se na Molimo oa 'nete, ba hloka le moprista ea ba rutang, ba hloka le molao. 4Empa e ile eare ha ba le tsietsing ba khutlela ho Morena Molimo oa Iseraele, ba 'matla, 'me ba mo fumana. 5Mehleng eo batho ba ne ba sa tsamaee ka khotso, hobane baahi bohle ba linaha tseo ba ne ba le har'a meferefere e meholo. 6Lichaba tsa timetsana, le metse ea timetsana, hobane Molimo o ne a ba tliselitse litsietsi tsohle. 7Matlafalang ke hona, le se ke la khathala matla, hobane le tla putsoa.”
8Ha Asa a utloa mantsoe ana, le boporofeta bona ba moporofeta Odede, a tsoha molōta. Naheng eohle ea ba morabe oa Juda le oa Benjamine, le metseng eohle eo a neng a e hapile naheng ea Efraime e maralla, Asa a felisa melimo ea bohata eo e neng e le manyala; a nchafatsa le aletare ea Morena e neng e le lethuleng la Tempele ea Morena.
9A khōbōkanya bohle ba morabe oa Juda le ba morabe oa Benjamine, le bajaki ba neng ba e-tsoa naheng ea ba morabe oa Efraime, le ea ba morabe oa Manase, le ea ba morabe oa Simeone. E ne e ile eare ha ba bona hore Morena Molimo oa hae, o na le eena, ba fallela ho eena ka bongata, ba e-tsoa naheng ea Iseraele.
10Ka khoeli ea boraro ea selemo sa leshome le metso e mehlano sa puso ea Asa, ba khōbōkanela ho eena, Jerusalema. 11Ka eona nako eo ba nyehella Morena ka lipohoana tse makholo a supileng le ka likhutšoane tse likete tse supileng, tseo ba neng ba li hapile. 12Ba etsa selekane sa hore ba tla sebeletsa Morena Molimo oa bo-ntat'a bona, ka lipelo tsohle tsa bona, le ka moea oohle oa bona. 13Ba lumellana hore bohle ba sa tl'o sebeletsa Morena, e ka ba ba baholo kapa ba banyenyane, banna kapa basali, ba bolaoe. 14Ba hlapanyetsa Morena ka litlatse tse kholo, le ka mehoo, le ka literompeta, le ka manaka. 15Bohle ba sechaba sa Juda ba thabela kano eo, hobane ba ne ba ile ba e hlapanyetsa ka lipelo tsohle tsa bona; ba 'matla ka cheseho e kholo, 'me ba mo fumana. Morena a ba nea khotso kahohle.
16Khosi Asa a tlosa Maaka, nkhono'ae, setulong sa bofumahali, hobane o ne a ile a etsa setšoantšo se nyonyehang sa Ashera. Asa a robaka molimo oo oa nkhono'ae, a o thua, a o chesetsa ka molatsoaneng oa Kiderone. 17Le hoja Asa a sa ka a felisa libaka tseo ho rapelloang melimo ea bohata ho tsona, naheng ea Iseraele, empa o 'nile a tšepahala ka pelo ea hae eohle, ka nako eohle ea ho phela ha hae. 18Ka Tempeleng ea Molimo a tlisa lintho tseo ntat'ae a neng a li abetse Morena, le tseo eena a li abetseng Morena, e leng silefera, le khauta, le limpho tse ling.
19Ntoa ea e-ba sieo ho fihlela ka selemo sa mashome a mararo a metso e mehlano sa puso ea Asa.
