1 BATHESALONIKA 3

₁Joale ha re se re sitoa ho iphapanya, re ile ra ikhethela ho sala re le bang Athene. ₂Ra rōma Timothea ngoan'aba rōna, ea sebetsang le Molimo ho phatlalatsa molaetsa o molemo oa Kreste, ho tla le matlafatsa le ho le khothatsa tumelong ea lōna. ₃Ra etsa joalo hore ho se be le ea mong oa lōna ea ka sisinngoang ke matšoenyeho ana, hobane lea tseba hore matšoenyeho ana ke kabelo ea rōna. ₄Ha re sa ntsane re e-na le lōna, re ile ra le bolella e sa le pele hore eka khona re be le matšoenyeho. Hona ho ile ha fela ha etsahala, joalokaha le lōna le tseba. ₅Ka lebaka lena, e ile eare ha ke se ke sitoa ho iphapanya, ka rōma Timothea ho lōna ho ea batlisisa tsa tumelo ea lōna; e se be mohlomong Moleki o le lekile, 'me mosebetsi oa rōna o fetohile lefeela.

₆Hona joale Timothea o khutletse ho rōna a e-tsoa ho lōna, 'me o re tliselitse litaba tse monate tsa tumelo le lerato la lōna. O re kamehla le ntse le re hopola ka thabo, 'me le hlolohetsoe ho re bona, joalokaha le rōna re hlolohetsoe ho le bona. ₇Ka baka leo, bana beso, litsietsing le matšoenyehong a rōna re tšelisehile ke tumelo ea lōna, ₈hobane kaha le tiiselitse ho Morena, rea phela. ₉Joale Molimo re ka mo leboha joang ka baka la lōna, le ka baka la thabo eo le re thabisitseng ka eona pel'a Molimo oa rōna? ₁₀Bosiu le motšeare re rapela re tiile hore re tle re le bone, 'me re tlatsetse moo tumelo ea lōna e haellang teng.

₁₁Joale Molimo, eena eo e leng Ntat'a rōna, le Morena oa rōna Jesu, a ke a re lokisetse tsela ea ho tla ho lōna. ₁₂Morena a ke a eketse, 'me a totise lerato la lōna, hore le ratane, 'me le rate batho bohle, joalokaha le rōna re le rata. ₁₃Ka mokhoa ona a ke a matlafatse lipelo tsa lōna, e tle ere mohla Morena oa rōna Jesu a tlang le bahalaleli ba hae bohle, le halalele, le se ke la nyatseha mahlong a Molimo, Ntat'a rōna.