1Joale banna ba Kiriate-Jearime ba ea, ba nyolla areka ea Morena, ba e isa tlung ea Abinadabe e holim'a leralla; ba halaletsa Eleasare, mora oa hae, hore a bōlōke areka eo ea Morena.
Samuele o busa Iseraele
2Ho tloha mohla areka e khutlelang Kiriate-Jearime ea lula teng nako e telele, ka lilemo tse mashome a mabeli. Bohle ba ntlo ea Iseraele ba labalabela ho sebeletsa Morena. 3Samuele a re ho bohle ba ntlo ea Iseraele: “Haeba le khutlela ho Morena ka lipelo tsa lōna tsohle, lahlang melimo ea balichaba e har'a lōna, le Asetarote. Le lebise lipelo tsa lōna ho Morena, le sebeletse eena feela, 'me o tla le namolela matsohong a Bafilesita.” 4Joale bana ba Iseraele ba lahla bo-Baale le Asetarote, ba sebeletsa Morena feela.
5Samuele a re: “Baiseraele bohle ba bōkane Misepa, 'me ke tla ba rapella ho Morena.” 6Ba kopanela Misepa, ba kha metsi, ba a qhalla kapele ho Morena, ba itima lijo ka letsatsi leo, ba re: “Re sitetsoe Morena!” Samuele a qala ho ba moahlōli oa bana ba Iseraele ha ba le Misepa.
Bafilesita baa hlōloa
7Ha Bafilesita ba utloa hore bana ba Iseraele ba bōkane Misepa, likhosi tsa Bafilesita tsa nyoloha, tsa futuhela Baiseraele. Bana ba Iseraele ba utloa hona, 'me ba tšoha Bafilesita. 8Bana ba Iseraele ba re ho Samuele: “U se ke ua khaotsa ho re rapella ho Morena, Molimo oa rōna, hore a re namolele matsohong a Bafilesita.” 9Samuele a nka konyana e nyanyang, 'me ka eona a etsetsa Morena nyehelo ea secheso. Eaba Samuele o rapella Baiseraele ho Morena, 'me Morena a utloa thapelo ea hae.
10Eare ha Samuele a ntse a etsa nyehelo ea secheso, Bafilesita ba atamela ho tla loantša Baiseraele. Empa ka lona letsatsi leo, Morena a otla Bafilesita ka letōlō le leholo, a ba ferekanya, 'me ba bolaoa ke Baiseraele. 11Banna ba Baiseraele ba tsoa Misepa, ba phalalisa Bafilesita, ba ba bolaea, ba ba ba ea fihla tlas'a Bete-Kare.
12Eaba Samuele o nka lejoe le le leng, o le hloma pakeng tsa Misepa le Shene, o le rea lebitso la Ebenesere, o re: “Morena o re thusitse ho fihlela mona.” 13Bafilesita ba hlōloa, 'me ba se ke ba hlola ba kena naheng ea Baiseraele. Morena a loantša Bafilesita ka matsatsi 'ohle a ho phela ha Samuele. 14Metse eohle eo Bafilesita ba neng ba e hapile ho Baiseraele ea boela ho Baiseraele hape, ho tloha Ekerone ho ea fihla Gate, 'me Baiseraele ba lopolla naha ea bona matsohong a Bafilesita. Joale khotso ea e-ba teng pakeng tsa Baiseraele le Baamore.
15Samuele ea e-ba moahlōli oa Baiseraele ka matsatsi 'ohle a ho phela ha hae. 16Ka selemo le selemo o ne a ee a tsamaee a potoloha ho ea Bethele, le Gilegale, le Misepa, 'me a ahlōlela Baiseraele libakeng tseo tsohle. 17O ne a ee a khutlele Rama, hobane ke moo a neng a ahile teng, 'me a ahlōlele Baiseraele hona teng. Hona moo a hahela Morena aletare.
