Ho oa ha Alekesandere Epifanese
1Khosi Potolemea oa Egepeta a bokella mphi e kholo, e bongata bo kaa ka lehlabathe lebopong la leoatle, a ba a bokella le boieane ba likepe, a leka ho hapa 'muso oa Alekesandere ka maqiti le ho o etsa oa hae. 2A ikela Siria a ntse a bua mantsoe a khotso; 'me baahi ba teng ba mo bulela metse, ba mo khahlametsa; hobane khosi Alekesandere a ne a laetse hore ba mo khahlametse, kaha e ne e le mohoe oa hae. 3Joale eitse ha Potolemea a kene metseng, o ne a siea motseng o mong le o mong lebotho la bahlabani ba balebeli. 4Ha a atamela Ashedode, ba mo bontša tempele ea Dagone e chesitsoeng, Ashedode le mathoko a eona a ripitliloeng. A bontšoa litopo tse rapaletseng hohle, le masalla a ba neng ba chesitsoe ntoeng; hobane batho ba ne ba li bokeletse liqubu tseleng ea hae. 5Ba bolella khosi seo Jonathane a se entseng ba tšepile hore e tla mo nyatsa; empa eona ea itholela feela. 6Jonathane a ea khahlametsa khosi ka tlhompho motseng oa Jopo; ba lumelisana, ba ba ba robala moo. 7Eaba Jonathane o felehetsa khosi ho ea e khutlela nokeng e bitsoang Eleutherose, a nt'o boela Jerusalema. 8Ka tsela ena khosi Potolemea a inkela metse eohle e sikang le leoatle ho ea fihla Selekose e lebopong la leoatle; 'me o ne a ntse a rerela Alekesandere bobe.
9Potolemea a romela maqosa ho khosi Demeteriose ka molaetsa o reng: “Tloo re etse selekane; ke tla u nea morali oa ka u mo nyale, eena eo e neng e le mohats'a Alekesandere, 'me u tla ba khosi ea 'muso oa ntat'ao. 10Ke entse phoso ka ho mo nea morali oa ka, hobane o ile a leka ho mpolaea.” 11Khosi ea etseletsa Alekesandere, hobane eona e ne e khaletse 'muso oa hae. 12Joale Potolemea a mo amoha morali oa hae, a mo nea Demeteriose; a iketsa molichaba ho Alekesandere, 'me bora ba bona bo e-ba pepeneneng. 13Potolemea a kena Antiokia, a ithoesa mofapahlooho oa borena ba Asia; ka hoo a roala mefapahlooho e 'meli, oa Egepeta le oa Asia.
14Khosi Alekesandere o ne a le Silesia ka nako eo, hobane batho ba teng ba ne ba fetohetse 'muso. 15Ha a utloa tse etsahetseng, a ea ho loantša Potolemea. Eo a tla mo khahlametsa ka mphi e kholo 'me a mo hlola. 16Alekesandere a balehela Arabia ho ea fumana tšireletso teng; khosi Potolemea a tlotleha haholo. 17Sabediele oa Moarabia a khaola Alekesandere hlooho, a e romela ho Potolemea. 18Empa khosi Potolemea a shoa matsatsi a mabeli ka morao ho moo, 'me le mabotho a hae a liqhobosheaneng a bolaoa ke baahi ba libaka tsena. 19Ka baka leo Demeteriose a qala ho ba khosi ka selemo sa lekholo le mashome a tšeletseng a metso e supileng.
Jonathane o khahla Demeteriose II
20Matsatsing 'ona ao, Jonathane a phutha banna ba Judea ho futuhela Qhobosheane e Jerusalema, 'me a etsa mechini e mengata ea ntoa bakeng sa morero ona. 21Empa ba bang ba hloileng sechaba sa habo bona, banna ba khopo ruri, ba ea ho khosi 'me ba e bolella hore Jonathane o hlasela Qhobosheane. 22Ha Demeteriose a utloa tsena, a halefa; 'me eare hoba a li tsebisoe, a ea Potolemaise hang-hang. A ba a ngolla Jonathane hore a tlohele tlhaselo eo, a mpe a tle, ba kopane Potolemaise kapele-pele. 23Ha Jonathane a utloa molaetsa ona, a laela hore tlhaselo e tsoele pele. A khetha ba bang ba baholo ba Iseraele le ba baprista ho mo felehetsa, 'me a ipea kotsing. 24A tsamaea a nkile silefera, khauta, liaparo le limpho tse ling tse ngata, a ea ho khosi, motseng oa Potolemaise, a nyehela ka tsona ho khosi; 'me khosi ea khahloa ke eena. 25Le hoja Bajuda ba bang ba khopo ba ile ba mo qosa, 26khosi ea 'na ea etsetsa Jonathane tsohle tseo a neng a li etsetsoa ke likhosi tse busitseng pele ho eona; 'me ea mo phahamisa mahlong a metsoalle ea eona eohle. 27Demeteriose a mo tiisa setulong sa boprista bo boholo, le litlotleng tsohle tseo a neng a se a 'nile a li fuoa pele; a ba a mo fa seemo sa ka pele lenaneng la metsoalle ea khosi.
28Joale Jonathane a kopa khosi hore a lokolle Judea le litereke tse tharo tsa Samaria hore li se ke tsa ntša lekhetho; bakeng sa lona a tšepisa Demeteriose chelete ea litalenta tse makholo a mararo. 29Khosi ea lumela, eaba ea ngolla Jonathane lengolo le hlalosang tseo tsohle, le reng:
30“Khosi Demeteriose o lumelisa ngoan'abo Jonathane le sechaba sohle sa Bajuda. 31Kopi ena ke ea lengolo leo re le ngoletseng mohahabo rona, Lasethenese, re bua ka uena; 'me le uena re u romella lona, hore u tle u tsebe hore na le reng:
32“ ‘Khosi Demeteriose o lumelisa Lasethenese, ntat'ae. 33Sechaba sa Bajuda, bao e leng metsoalle ea rona 'me ba phetha litšoanelo tsa bona ho rona, re ikemiselitse ho se etsetsa molemo ka baka la boithatelo bo botle boo ba re bontšitseng bona. 34Re ba tiisetsa hore naha ea Judea le litereke tse tharo tsa Efraime, Lida le Ramathaime ke linaha tsa bona. Tse tharo tsena, tseo pele e neng e le tsa Samaria, 'moho le libaka tsohle tsa tsona, li ile tsa khomeletsoa ho Judea, ho thusa bohle ba nyehelang mahlabelo Jerusalema; e le sebakeng sa lekhetho la kotulo ea masimong le la litholoana tsa lifate, leo khosi e neng e tloaetse pele ho le amohela ho bona selemo le selemo. 35Tse ling tsohle tseo re nang le tokelo ea ho li amohela, e leng lekhetho la karolo e le 'ngoe ho tse leshome le makhetho a mang, lekhetho la merafo ea letsoai le la mefapahlooho, re tla lokolla bohle ho tsona. 36Ho tsohle tsena tseo re li tšepisitseng, ha ho na letho le tla felisoa, ho tloha kajeno ho ea ho ile.
37“ ‘Ka baka leo, ak'u hlokomele ho etsa kopi ea litaba tsena; e neoe Jonathane, e tle e beoe sebakeng se pontšeng ea batho Thabeng e halalelang.’ ”
Jonathane o thusa Demeteriose II
38Eare ha khosi Demeteriose a hlokomela hore tlas'a puso ea hae naha e khutsitse, 'me ha ho motho ea mo hanyetsang, a qhala mabotho 'ohle a hae, a laela hore mohlabani ka mong a ipoelle ha habo, haese limphi tsa balichaba tse neng li thaothiloe lihleke-hlekeng tsa chaba tseo. Joale mabotho 'ohle ao e neng e le a bo-ntat'ae a qala ho mo hloea. 39Terifone, eo e neng e le e mong oa batšehetsi ba Alekesandere, ha a hlokomela hore mabotho 'ohle a korotlela Demeteriose, a ea ho Imalekuoe, Moarabia, ea neng a ntse a holisa Antiokose, mora ea neng a sa le monyenyane oa Alekesandere. 40A mo kopa ka pheello hore a fane ka Antiokose, e tl'o ba khosi setulong sa ntat'ae; a ba a bolella Imalekuoe tsohle tseo Demeteriose a li entseng, le kamoo mabotho a hae a mo hloileng kateng; 'me a hlola matsatsinyana a mangata moo.
41Jonathane a romela ho Demeteriose molaetsa o kopang hore a tlose Qhobosheaneng ea Jerusalema le liqhobosheaneng tse ling bahlabani ba li lebelang, hobane ba ne ba sa khaotse ho loantša Iseraele. 42Demeteriose a romela ho Jonathane karabo ena, a re: “Ha ke na ho etsa hona feela; empa bakeng sa hao le sechaba sa heno, ha monyetla o hlaha, ke tla le etsetsa tlotla e phethehileng. 43Joale e tla ba hantle ha u ka nthomella bahlabani ba tlang ho nthusa, hobane mabotho 'ohle a ka a nkoenehetse.”
44Jonathane a mo romella likete tse tharo tsa bahlabani ba shahlileng motseng oa Antiokia. Ba ea ho khosi, e ileng ea ba amohela ka thabo ha ba fihla. 45Baahi ba motse oo, ba ka bang likete tse lekholo le mashome a mabeli, ba khobokana har'a motse ka morero oa ho bolaea khosi. 46Empa khosi ea balehela ka tlung ea borena, ha baahi ba motse bona ba ne ba ntse ba tlala-tlala mapatlelong, 'me ba qala ho loana. 47Khosi Demeteriose a bitsa Bajuda hore ba tl'o thusa, 'me ba mo phallela kaofela; eaba ba ikakhela har'a motse, 'me ba bolaea batho ba ka bang lekholo la likete, letsatsing leo. 48Ba chesa motse, ba hapa thepa e ngata, tsatsing leo, ba ba ba pholosa khosi. 49Ha baahi ba motse ba hlokomela hore joale Bajuda ba se ba hapile motse le ho iketsetsa kamoo ba ratang kateng, ba khathala matla, ba ba ba hoeletsa ho khosi ka thapelo e reng: 50“Ak'u re tlisetse khotso! Bajuda ba ke ba khaotse ho re loantša le ho ripitla motse oa rona.” 51Ba lahla lihlomo tsa bona fatše ho etsa khotso. Ka tsela ena Bajuda ba tlotleha mahlong a khosi le mahlong a bohle ba phelang 'musong oa eona; eaba ba khutlela Jerusalema le thepa e ngata. 52Eare ha Demeteriose a se a tsitsitse teroneng ea hae ea borena, 'me naha e khutsitse tlas'a puso ea hae, 53a qala ho koenehela litšepiso tsohle tsa hae. A hlobohana le Jonathane, 'me a se ke a 'museletsa bakeng sa boitelo ba hae, a mpa a mo tuba hampe.
Jonathane o thusa Antiokose VI
54Ka morao ho mona Terifone a tla le moshanyana Antiokose, eo e ileng ea ba khosi, 'me a roala mofapahlooho. 55Mabotho 'ohle ao Demeteriose a neng a a qhalile, a khobokana tlas'a khosi; a loantša Demeteriose, ea ileng a baleha, eaba o hloletsoe ruri. 56Terifone a inkela litlou, a ba a hapa le motse oa Antiokia. 57Mohlankanyana Antiokose a ngolla Jonathane, a re: “Ke u tiisa bopristeng bo boholo, 'me ke u hlomamisa holim'a litereke tse 'ne hore u li okamele; ke bile ke u etsa e mong oa metsoalle ea khosi.” 58A mo romella lipitsa tsa khauta le lijana tsa tafole; a mo fa tumello ea ho noela linoelong tsa khauta, le ho apara seaparo se perese sa borena le ho ba le sepele sa khauta. 59A etsa ngoan'abo Simone molaoli oa naha eohle e tlohang Lihatelong tsa Tire ho ea fihla meeling ea Egepeta.
60Jonathane a tsamaea kahohle mose ho noka ea Jorodane le metseng eohle; 'me mabotho 'ohle a Siria a khobokana ho mo tlatsa ntoeng. Ha a fihla Ashekelone, batho ba motse ba mo khahlametsa ka tlhompho. 61Ho tloha moo a leba Gasa, empa batho ba Gasa ba mo koalla kantle. A thibella motse oo, a chesa mathoko a oona 'me a hapa thepa ea teng. 62Baahi ba Gasa ba rapela Jonathane, 'me eena a etsa khotso le bona; empa a nka bara ba batsamaisi ba bona, a ba romela Jerusalema e le batšoaruoa. A phunyeletsa naha ho ea fihla Damaseka.
63Jonathane a utloa hore balaoli ba Demeteriose ba fihlile Kadeshe, e Galelea, ka mphi e kholo, morero e le ho mo ketola setulong. 64A ea ho ba loantša, a mpa a siea ngoan'abo Simone naheng ea Juda. 65Simone a lara ka pele ho Bete-Sure, a futuhela motse oo matsatsi a mangata, 'me a patela baahi ba oona. 66Bona ba mo kopa ho etsa khotso le bona; a etsa joalo. Joale a ba hleka motseng hoba a o hape, a ba a siea lebotho le lebelang moo.
67Jonathane le mabotho a hae ba lara haufi le Letša la Genesareta. Ha bo e-sa, ba fihla thoteng ea Hasore. 68Eaba mphi ea balichaba e atamela ho mo loantša thoteng eo; athe ba mo beetse mekhahlelo thabeng, empa bona ba tla ho eena ba mo tobile. 69Eare ha ba mekhahlelo ba khoroha 'me ba kena ntoeng, 70bahlabani ba Jonathane ba baleha kaofela; ha se ke ha sala le ea mong haese Matathiase, mora oa Abosalome, le Judase, mora oa Chalaphi, balaoli ba mabotho. 71Jonathane a hahola liaparo tsa hae, a itšela ka mobu hloohong 'me a rapela. 72A reteleha, a boela a hlasela lira, a li hlola 'me tsa baleha. 73Ha babalehi ba mphi ea Jonathane ba bona hona, ba boea sekoele, ba mo thusa ho lelekisa lira ho ea fihla Kadeshe liahelong tsa tsona 'me ba lara teng. 74Tsatsing leo ha e-shoa likete tse ka bang tharo tsa balichaba. Jonathane a boela Jerusalema.
