Elia le baporofeta ba Baale
1Kamora' litšiu tse ngata, ka selemo sa boraro, lentsoe la Morena la fihla ho Elia, la re: “Tsamaea u e'o itlhahisa kapele ho Akabe, 'me ke tla nesetsa lefatše pula.” 2Eaba Elia o ea itlhahisa kapele ho Akabe. A fumana Samaria tlala e le ea boja-likata.
3Eaba Akabe o bitsa Obadiea, eo e neng e le mookameli oa lelapa la Akabe, 'me a hlompha Morena haholo. 4Mohla Jesabele a neng a bolaea baporofeta ba Morena, Obadiea o ne a nke baporofeta ba lekholo, a pata ba mashome a mahlano ka lehaheng le leng, le ba mashome a mahlano ka ho le leng, a ba fepa, a ba fa metsi. 5Eaba Akabe o re ho Obadiea: “Tsamaea le naha, u hlahlobe liliba tsohle le melatsoana eohle; mohlomong re ka fumanela lipere le limmeile joangnyana, li tle li phele, re se shoeloe ke liphoofolo tsohle.” 6Kahoo ba arolelana naha hore ba tle ba e hlahlobe: Akabe a nka tsela ea hae, 'me Obadiea le eena a nka ea hae.
7Ha Obadiea a ntse a tsamaea, a kopana le Elia. Obadiea a mo tseba, eaba o obama kapele ho eena, o re: “Na ke uena Elia, mong'a ka?”
8A mo araba, a re: “Ke 'na. Tsamaea u e'o bolella mong'a hao, hore Elia o teng mona.”
9Eaba Obadiea o re: “Ke u sitetsoe ka'ng, ha e le moo u batla ho neelana ka 'na matsohong a Akabe, hore a mpolaee? 10Ka Molimo ea phelang, ha ho sechaba kapa 'muso oo mong'a ka a sa kang a ea u batla ho oona; ere ha ba re: ‘Ha a eo,’ ebe o hlapantša 'muso oo kapa sechaba seo, hore ruri u fela u le sieo. 11Joale uena u re: ‘Tsamaea u e'o bolella mong'a hao hore Elia o teng.’ 12Etlare hang-hang ha ke khaohana le uena, Moea oa Morena o u nkele moo ke sa tsebeng, 'me ha ke fihla ke bolella Akabe hore u teng, feela a sa u fumane, ebe oa mpolaea, le hoja 'na, mohlanka oa hao, ke hlomphile Morena ho tloha bocheng ba ka. 13Mong'a ka, na ha u e-s'o utloe seo ke neng ke se etse ha Jesabele a ne a bolaea baporofeta ba Morena? Ke ne ke pate baporofeta ba Morena ba lekholo: ba mashome a mahlano ka lehaheng le leng, le ba mashome a mahlano ka ho le leng, 'me ka ba fepa, ka ba fa metsi. 14Empa joale u re: ‘Tsamaea u e'o bolella mong'a hao hore Elia o teng,’ a tle a mpolaee!”
15Eaba Elia o re: “Ka Morena ea phelang, molaoli oa tsohle, eo ke mo sebeletsang, kea u tiisetsa, ke tla ikisa ho eena kajeno.”
16Kahoo Obadiea a ea ho Akabe, a 'molella. Eaba Akabe o ea khahlanyetsa Elia. 17Ha Akabe a bona Elia a re ho eena: “Kajeno re kopane, mohlorisi tooe oa Iseraele!”
18Elia a mo araba, a re: “Ha ke e-s'o hlorise Iseraele, empa ke uena le ba lelapa leno ba hlorisang Iseraele, hobane le furaletse melao ea Morena, 'me uena u sebeletsa bo-Baale. 19Kahoo, mane thabeng ea Karamele, 'memele pitso ea Baiseraele bohle le baporofeta ba Baale ba makholo a mane le mashome a mahlano, le baporofeta ba Ashera ba makholo a mane, ba feptjoang ke Jesabele.”
20Eaba Akabe o mema bana bohle ba Iseraele, o bōkella le baporofeta ba Baale thabeng ea Karamele. 21Elia a fihla ho sechaba sohle, a re ho sona: “Le tla ba bo-temepeli ho fihlela neng? Haeba Morena ke eena Molimo, mo sebeletseng; le teng haeba Baale ke eena Molimo, sebeletsang eena.” Empa sechaba sa khutsa tu!
22Eaba Elia o re ho sechaba: “Ke 'na ke le mong feela ea setseng oa baporofeta ba Morena, athe baporofeta ba Baale bona ba makholo a mane le mashome a mahlano. 23Re tlisetseng lipohoana tse peli, baporofeta ba Baale ba ikhethele e 'ngoe ea tsona, ba e tšelè, ba e bee holim'a patsi e chehileng mollo, ba se ke ba e hotetsa; le 'na ke tla tšela pohoana e 'ngoe, ke e bee holim'a patsi, ebe ha ke hotetse mollo. 24Joale le bitse melimo ea lōna, le 'na ke tla bitsa Morena, 'me molimo ea tla arabela ka ho hotetsa mollo e tla ba ke eena Molimo.”
Sechaba sa arabela kaofela, sa re: “U nepile litaba!”
25Joale Elia a re ho baporofeta ba Baale: “Ha ho qale lōna ho khetha pohoana, le be le e tšelè, hobane le bangata; ebe le bitsa melimo ea lōna, feela le se ke la hotetsa mollo.”
26Eaba ba nka pohoana eo ba e neiloeng, baa e tšela, ba bitsa Baale ho tloha hoseng, ho fihlela har'a mpa ea motšeare, ba ntse ba re: “Oho, Baale, ak'u re arabe!” Empa ha se ke ha e-ba le lentsoe, kapa motho ea arabelang. Ba tlōlaka pel'a aletare eo ba neng ba e hahile.
27Har'a mpa ea motšeare Elia a ba soma, a re: “Hōoeletsang haholo, hobane Baale ke molimo! Mohlomong o sa le boikhutsong, kapa o il'o ithōma, kapa o leetong, kapa mohlomong o robetse, 'me eka khona a tsosoe.” 28Ba hōoa haholo, 'me ka mokhoa oa bona ba itšehaka ka lithipa le ka mahare, ho fihlela mali a bona a phorosela. 29Ba 'na ba palaōla joaloka mahlanya, ho fihlela e e-ba nako ea ho etsa nyehelo ea mantsiboea, empa ha se ke ha e-ba le lentsoe, kapa motho ea arabelang, kapa ea ba natsang.
30Joale Elia a re ho sechaba sohle: “Atamelang koano!” Sechaba sohle sa atamela ho eena. Eaba o tsosa aletare ea Morena e neng e helelitsoe. 31Elia a nka majoe a leshome le metso e 'meli, ho lekanya palo ea merabe ea bana ba Jakobo, eo lentsoe la Morena le neng le fihle ho eena, la re: “Lebitso la hao e tla ba Iseraele.” 32Ka majoe ao a hahela Morena aletare. A cheka mosèlè o pota-potang aletare, o ka lekanang ho tšèla lilethara tse leshome le metso e mene tsa metsi. 33A cheha patsi ea mollo, a tšela pohoana, a bea litho tsa eona holim'a patsi, a re: “Tlatsang linkho tse 'ne metsi, le tšèlè sehlabelo sa secheso le patsi ka 'ona.”
34Eaba o re: “Etsang joalo khetlo la bobeli!” Ba etsa joalo khetlo la bobeli.
A boela a re: “Etsang joalo khetlo la boraro!” Ba etsa joalo khetlo la boraro. 35Metsi a tšoloha le mahlakoreng 'ohle a aletare, le mosèlè ba o tlatsa metsi.
36Ha nako ea ho etsa nyehelo ea mantsiboea ea sehlabelo sa secheso e fihlile, moporofeta Elia a atamela, a re: “Oho, Morena Molimo oa Aborahama, le Isaka, le Iseraele, a ho ke ho tsejoe kajeno, hore u Molimo oa Iseraele, le hore 'na ke mohlanka oa hao, le hore ke entse lintho tsena tsohle ka taelo ea hao. 37Ak'u nkutloe, Morena! Ak'u nkutloe, sechaba sena se tle se tsebe hore uena, Morena, u Molimo, le hore u sokolotse lipelo tsa sona hape.”
38Eaba mollo oa Morena o theoha holimo, o chesa sehlabelo sa secheso, le patsi, le majoe, le lerōle; o mōnya le metsi a neng a le ka moseleng.
39Ha batho bohle ba bona hoo, ba itihela fatše ka lifahleho, ba re: “Morena ke eena Molimo! Morena ke eena Molimo!”
40Elia a re ho bona: “Tšoarang baporofeta ba Baale, le se ke la tlohela le ea mong oa bona a phonyoha!” Ba ba tšoara, Elia a ba theolela ka molatsoaneng oa Kishone, a ba bolaela hona moo.
Komello ea khaotsa
41Eaba Elia o re ho Akabe: “Tsamaea u e'o ja, u noe, hobane ke utloa ho hoasa ha pula ea litloèbèlèlè.” 42Akabe a tsamaea ho ea ja le ho noa. Elia eena a nyolohela tlhōrōng ea Karamele, a fihla a putlama fatše, a kenya hlooho pakeng tsa mangoele.
43A re ho mohlanka oa hae: “Nyolohela holingoana, u akhele mahlo nq'a leoatle.”
A nyoloha, a akhela mahlo, a re: “Ha ho letho.”
Eaba Elia o re: “Boela hape!” A boela hasupa.
44Ka khetlo la bosupa, mohlanka a re: “Ke bona lerunyana le lekaalo ka seatla sa motho le nyoloha leoatleng.”
Elia a re: “Tsamaea u ee ho Akabe, u re: ‘Palama koloi ea hao, u ee hae, esere pula ea u thibella!’ ”
45Ka ho panya ha ntši feela, leholimo la fifala ke maru a matšo, moea oa pukutsa, ha na pula ea litloèbèlèlè. Akabe a palama, a ea Jesereele. 46Morena a matlafatsa Elia, a itlama letheka, a khisa ka sekaja kapele ho Akabe, ho ea fihla Jesereele.
