Moporofeta o khalemela Jeroboame
1Ka taelo ea Morena, moporofeta oa Molimo, ea tsoang naheng ea Juda, a fihla Bethele. A fumana Jeroboame a eme pel'a aletare, a ntse a chesa mokubetso. 2Ho latela taelo ea Morena, moporofeta eo a omanya aletare, a re: “Aletare tooe! Aletare tooe! Morena a bua tjena: ‘Bona, ho tla tsoaloa ngoana tlung ea Davida, 'me lebitso la hae e tla ba Josiea. O tla etsetsa Morena mahlabelo ka baprista ba litempele tseo ho rapelloang melimo ea bohata ho tsona, ba chesetsang mokubetso holim'a hao. Masapo a batho o tla a chesetsa holim'a hao.’ ” 3Ka lona letsatsi leo a ba nea pontšo, a re: “Pontšo ea hore Morena o buile joalo ke ena: Aletare ena e tla peperana, 'me molora o holim'a eona o qhalane.”
4Eare ha khosi Jeroboame a utloa lipolelo tsa moporofeta oa Molimo, tseo a omanyang aletare ka tsona, a mo supa ka monoana, eena Jeroboame a ntse a le aletareng, a re: “Mo tšoareng!” Letsoho leo la hae, leo a neng a supile moporofeta ka lona, la satalla hoo a ileng a sitoa ho le khutlisa. 5Aletare le eona ea peperana, 'me molora o holim'a eona oa qhalana, ho latela pontšo eo moporofeta oa Molimo a ileng a e bolela, ka taelo ea Morena.
6Khosi ea re ho moporofeta oa Molimo: “Ak'u rapele Morena Molimo oa hao, u nthapelle hore letsoho la ka le fole.” Moporofeta enoa oa Molimo a rapela Morena, 'me letsoho la khosi la fola, la e-ba joaloka pele.
7Joale khosi ea re ho moporofeta oa Molimo: “A re ee le uena ha ka, u e'o ja, 'me ke tla u putsa.”
8Moporofeta oa Molimo a re ho khosi: “Leha u ne u ka 'nea halofo ea leruo la hao, ke ne nke ke ka ea. Nke ke ka ja lijo, kapa ka noa metsi sebakeng sena. 9Morena o ntaetse joalo, a re: ‘U se ke ua ja lijo, kapa ua noa metsi, kapa ua khutla ka tsela eo u tlileng ka eona.’ ” 10Ka baka leo, moporofeta a nka tsela esele, a se ke a khutla ka eo a tlileng Bethele ka eona.
Moporofeta oa Bethele oa leqheku
11Ho ne ho e-na le moporofeta oa leqheku, ea neng a ahile Bethele. Bara ba hae ba fihla ba 'molella mesebetsi eohle eo moporofeta oa Molimo a e entseng moo Bethele ka letsatsi leo. Ba 'molella le lipuo tseo a ileng a li bua ho khosi. 12Eaba ntat'a bona o re ho bona: “Moporofeta eo o ile a nka tsela efe?” Bara ba hae ba ne ba ile ba bona hore na moporofeta eo ea tsoang Juda o nkile tsela efe. 13Eaba o re ho bara ba hae: “Nqhaneheleng tonki!” Ba mo qhanehela tonki, 'me a e palama. 14A sala moporofeta eo oa Molimo morao, a mo fumana a lutse tlas'a sefate sa eike, 'me a re ho eena: “Na ke uena moporofeta oa Molimo ea tsoang Juda?”
Eena a re: “E, ke 'na.”
15Moporofeta oa leqheku a re ho eena: “A re ee le uena ha ka, re e'o fumana lijo.”
16Empa moporofeta oa Molimo a re: “Nke ke ka khutla le uena, kapa ka ea ha hao; hape nke ke ka ja lijo, kapa ka noa metsi le uena, sebakeng sena. 17Morena o ile a re ho 'na: ‘U se ke ua ja lijo, kapa ua noa metsi sebakeng seo; le ho khutla u se ke ua khutla ka tsela eo u ileng ua ea ka eona.’ ”
18Moporofeta oa leqheku a re ho eena: “Le 'na ke moporofeta joaloka uena. Ka taelo ea Morena, lengeloi le ile la re ho 'na: ‘Khutlela le eena tlung ea hao, a tle a fumane lijo, a noe metsi.’ ” Empa moporofeta oa leqheku o ne a le leshano. 19Eaba moporofeta eo oa Molimo o khutla le moporofeta oa leqheku. Ha a fihla lapeng a ja, a noa le metsi.
20Ha ba ntse ba e-ja, lentsoe la Morena la fihlela moporofeta enoa oa leqheku ea ileng a khutlisa moporofeta oa Molimo. 21Moporofeta oa leqheku a re ho moporofeta oa Molimo ea tsoang Juda: “Morena o bua tjena: ‘U tlōtse taelo ea Morena, ha ua bōlōka molao oo Morena Molimo oa hao, a u laetseng oona. 22U ile ua khutla, 'me u jele lijo, ua ba ua noa le metsi sebakeng seo ke ileng ka re ho uena ka sona: U se ke ua ja lijo, kapa ua noa metsi. Ka baka lena, setōpō sa hao se ke ke sa epeloa mabitleng a bo-ntat'ao.’ ”
23Kamora' hoba a je lijo, a noe metsi, moporofeta oa leqheku a qhanehela moporofeta eo a ileng a mo khutlisa tseleng, tonki. 24Ha moporofeta eo a ntse a tsamaea, a kopana le tau tseleng, 'me ea 'molaea. Setōpō sa hae sa rapalla kahar'a tsela, tonki ea ema pel'a sona, le tau ea ema pel'a sona. 25Batho ha ba feta ba bona setōpō se rapaletse kahar'a tsela, tau e eme pel'a sona. Ba fihla motseng oo moporofeta oa leqheku a ahileng ho oona, 'me ba pheta taba eo.
26Ha moporofeta oa leqheku, ea ileng a khutlisa moporofeta oa Molimo tseleng, a utloa hona, a re: “Motho eno ke moporofeta oa Molimo, ea ileng a tlōla taelo ea Molimo; ka baka leo, Morena o mo neetse tau e ileng ea mo harola, ea 'molaea, ho latela puo eo Morena a ileng a e bua ho eena.”
27Eaba o re ho bara ba hae: “Nqhaneheleng tonki!” Ba mo qhanehela eona. 28A tsamaea, a fumana setōpō sa moporofeta oa Molimo se rapaletse kahar'a tsela, tonki le tau li ntse li eme pel'a sona. Tau e ne e sa ka ea ja setōpō, kapa ea harola tonki. 29Eaba moporofeta oa leqheku o nka setōpō sa moporofeta oa Molimo, o se belesa holim'a tonki, o khutlela le sona motseng, ho tla llela moporofeta eo oa Molimo, le ho mo epela. 30Setōpō sena a se epela ka lebitleng la hae, 'me ba llela moporofeta, ba re: “Jo! ngoan'eso oee!”
31Kamora' hoba a se epele, a re ho bara ba hae: “Ha ke se ke shoele, le tle le nkepele ka lebitleng leo moporofeta oa Molimo a epetsoeng ka ho lona; masapo a ka le a bee pel'a masapo a hae. 32Mantsoe ao, ka taelo ea Morena, moporofeta oa Molimo, a ileng a omanya aletare e Bethele ka 'ona, le litempele tsohle tseo ho rapelloang melimo ea bohata ho tsona, metseng ea Samaria, ruri a tla phethahala.”
Sebe sa Jeroboame se bolaeang
33Esitana leha hona ho se ho etsahetse, Jeroboame a 'na a tsoela pele mekhoeng ea hae e khopo. Batho ba eisehang har'a sechaba a 'na a ba etsa baprista ba litempele tseo ho rapelloang melimo ea bohata ho tsona. Mang kapa mang ea ratang, a mo etsa e mong oa baprista ba litempele tseo ho rapelloang melimo ea bohata ho tsona. 34Ntho ena ea e-ba sebe sa lelapa la Jeroboame, se ileng sa le felisa, 'me sa le timetsa lefatšeng.
