1Bonang, Ntate o re ratile hakaakang, hore re be re bitsoe bana ba Molimo, 'me re fela re le bona. Ke ka lebaka lena lefatše le sa re tsebeng, hobane ha lea ka la tseba Molimo. 2Baratuoa, joale re se re le bana ba Molimo, empa seo re tlang ho ba sona ha se e-s'o bonahatsoe. Feela rea tseba hore, mohla Kreste a iponahatsang, re tla tšoana le eena, hobane re tla 'mona kamoo a leng kateng. 3Mang le mang ea nang le tšepo ena ho eena, oa itlhoekisa, joalokaha le eena a hloekile.
4Mang le mang ea etsang sebe o tlōla molao; sebe ke ho tlōla molao. 5Lea tseba hore Kreste o tlile ho tlosa libe, 'me ha a na sebe. 6Mang le mang ea phelang ka ho eena, ha a sa etsa sebe, empa ea ntseng a etsa sebe ha a e-s'o 'mone, le ho mo tseba ha a mo tsebe.
7Bana ba ka, ho se be ea le khelosang. Ea etsang tse lokileng o lokile, joalokaha Kreste le eena a lokile. 8Ea ntseng a etsa sebe ke oa Diabolosi, hobane haesale Diabolosi a etsa sebe ho tloha tšimolohong. Seo Mora oa Molimo a se tletseng ke ho felisa mesebetsi ea Diabolosi. 9Mang le mang ea tsoetsoeng ke Molimo, ha a sa etsa sebe, hobane bophelo ba Molimo bo ka ho eena. A ke ke a hlola a etsa sebe, hobane o tsoetsoe ke Molimo. 10Bana ba Molimo le bana ba Diabolosi ba bonahala tjena: Bohle ba sa etseng tse lokileng, kapa ba sa rateng bana babo bona, hase bana ba Molimo.
Ratanang
11Molaetsa oo le o utloileng ho tloha tšimolohong o re re rataneng. 12Re se ke ra tšoana le Kaine, eo e neng e le oa E Mobe, 'me a bolaea ngoan'abo. O ne a 'molaela'ng? Ke hobane liketso tsa hae li ne li le mpe, empa tsa ngoan'abo li ne li lokile. 13Le se ke la makala, bana beso, ha lefatše le le hloile. 14Rōna rea tseba hore re ntšitsoe lefung, ra isoa bophelong, hobane re rata bana babo rōna. Ea se nang lerato o ntse a le lefung. 15Mang le mang ea hloileng ngoan'abo ke 'molai, 'me lea tseba hore ha ho 'molai ea ka bang le bophelo bo sa feleng ka ho eena.
16Re tseba seo lerato le leng sona ka sena: Kreste o re teletse bophelo ba hae; le rōna re tšoanetse ho tella bana babo rōna bophelo ba rōna. 17Ha motho a e-na le maruo a lefatše lena, 'me a bona ngoan'abo a hloka, empa a mo thatafaletsa pelo ea hae, lerato la Molimo le ka ba teng joang pelong ea hae? 18Bana ba ka, lerato la rōna e se ke ea e-ba la mantsoe, kapa la leleme feela; empa e be la liketso le la 'nete. 19Ke ka lona re ka tsebang hore re fela re le ba 'nete, 'me matsoalo a rōna a tla khutsa pel'a Molimo. 20Haeba matsoalo a rōna a re qosa, rea tseba hore Molimo o moholo ho feta matsoalo a rōna, 'me o tseba tsohle.
21Baratuoa, haeba matsoalo a rōna a sa re qose, re ka tla ho Molimo ka sebete. 22Eng le eng eo re e kōpang re tla e fuoa, hobane re bōlōka litaelo tsa hae, 'me re etsa se mo khahlisang. 23Taelo ea hae ke ena: Re lumele lebitsong la Mora oa hae Jesu Kreste, 'me re ratane joalokaha a re laetse. 24Ea bōlōkang litaelo tsa Molimo o phela ka ho Molimo, le Molimo o phela ka ho eena. Ka Moea o Halalelang oo Molimo a re neileng oona, re tseba hore Molimo o phela ka ho rōna.
