Lihlopha tsa baprista
1Lihlopha tsa bara ba Arone ke tsena: Bara ba Arone e ne e le Nadabe, le Abihu, le Eleasare, le Itamare. 2Empa bo-Nadabe le Abihu ba ile ba shoa pele ho ntat'a bona, ba se na bara; kahoo Eleasare le Itamare ea e-ba bona baprista. 3Davida a ba arola lihlopha, ho ea ka mosebetsi oo ba neng ba o abetsoe. Ha a ba arola o ne a thusitsoe ke Sadoke, setlōhōlō sa Eleasare, le Ahimeleke, setlōhōlō sa Itamare. 4Bara ba Eleasare, bao e neng e le lihlooho, ba ne ba le bangata ho feta bara ba Itamare, 'me ba aroloa joalo. Har'a bara ba Eleasare, bao e neng e le lihlooho tsa malapa abo bona, ba ne ba le leshome le metso e tšeletseng, 'me har'a bara ba Itamare bao e neng e le lihlooho tsa malapa abo bona ba ne ba le robeli. 5Ha ho khethoa baprista ba Sehalalelo le baprista ba Tempele ea Molimo har'a litlōhōlō tsa Eleasare le Itamare, ba aroloa ka lōtho, ho se leeme.
6Mongoli ea bitsoang Shemaea, mora oa Netanele, e leng e mong oa Balevi, a ngola mabitso a bona bukeng, moo khosi, le mahosana, le moprista Sadoke, le Ahimeleke, mora oa Abiatare, le lihlooho tsa malapa a baprista le a Balevi, ba leng teng. Ho ne ho ee ho ngoloe lelapa le le leng la Eleasare, ho ngoloe le le leng la Itamare, joalo-joalo.
7Lōtho la pele la ntša Jehoearibe, la bobeli la ntša Jedaea, 8la boraro la ntša Harime, la bone la ntša Seorime, 9la bohlano la ntša Malakiea, la botšelela la ntša Miamine, 10la bosupa la ntša Hakose, la borobeli la ntša Abiea, 11la borobong la ntša Jeshua, la leshome la ntša Shekaniea, 12la leshome le motso o mong la ntša Eleashibe, la leshome le metso e 'meli la ntša Jakime, 13la leshome le metso e meraro la ntša Hupa, la leshome le metso e mene la ntša Jeshebabe, 14la leshome le metso e mehlano la ntša Bilega, la leshome le metso e tšeletseng la ntša Imere, 15la leshome le metso e supileng la ntša Hesire, la leshome le metso e robeli la ntša Hapisese, 16la leshome le metso e robong la ntša Petahiea, la mashome a mabeli la ntša Jehesekele, 17la mashome a mabeli a motso o mong la ntša Jakine, la mashome a mabeli a metso e 'meli la ntša Gamule, 18la mashome a mabeli a metso e meraro la ntša Delaea, la mashome a mabeli a metso e mene la ntša Maasiea.
19Ba ne ba sebeletsa ka Tempeleng ea Morena ka tlhatlhlamano eona ena, ho latela melao eo ba neng ba e laetsoe ke Arone, moholo-holo oa bona, joalokaha Morena Molimo oa Iseraele, a ne a ile a mo laela.
Balevi ba bang
20Bara ba bang ba Levi e ne e le bana: Shubaele e ne e le e mong oa bara ba Amorame; Jehedeea e le e mong oa bara ba Shubaele. 21Har'a bara ba Rehabeea, Jishiea e ne e le letsibolo; 22ho ba Isihare, e mong e ne e le Shelomote; har'a bara ba Shelomote e mong e le Jahate. 23Ho bara ba Heborone letsibolo e ne e le Jeria, oa bobeli e le Amariea, oa boraro e le Jahasiele, oa bone e le Jekameame.
24Ho bara ba Usiele e ne e le 'Mika; ho bara ba 'Mika e le Shamire. 25Ngoan'abo 'Mika e ne e le Jishiea; ho bara ba Jishiea e le Sekariea.
26Bara ba Merari e ne e le Mahele le Mushi; mora oa Jaasiea e le Beno.
27Litlōhōlō tsa Merari tse tsoetsoeng ke Jaasiea e ne e le Beno, le Shohame, le Sakure, le Ibiri. 28Mahele a tsoala Eleasare ea sa kang a ba le bara.
29Mora oa Kishe e ne e le Jerahemeele.
30Bara ba Mushi e ne e le Mahele, le Edere, le Jerimote. Bana e ne e le bona Balevi ho ea ka malapa abo bona. 31Joalokaha bana babo bona, e leng litlōhōlō tsa Arone, ba ile ba etsa lōtho, le bona ba le etsa moo Davida, le Sadoke, le Ahimeleke, le lihlooho tsa malapa a baprista le a Balevi, ba leng teng. Malapa a matsibolo le a likhorula a ne a etsoa ka ho tšoana.
