1 LIKETSAHALO 18

₁Kamora' tsena, Davida a hlōla Bafilesita, a ba busa, 'me a ba amoha Gate le metsana ea eona.

₂A hlōla Bamoabe, 'me Bamoabe ea e-ba bahlanka ba Davida, ba mo thèllang.

₃Ha Hadade-Esere, khosi ea Soba, a ne a il'o hloma puso ea hae pel'a nōka ea Euferatese, Davida a mo hlōla Hamate. ₄Davida a hapa likariki tsa Hadade-Esere tsa ntoa tse sekete, le banna ba lipere ba likete tse supileng, le ba litaaso ba likete tse mashome a mabeli. Lipere tsohle tse hulang likariki tsa ntoa a li khaola mesifa, a siea feela tse lekaneng ho hula likariki tsa ntoa tse lekholo.

₅Ha Baarame ba Damaseka ba e-ea ho ea thusetsa Hadade-Esere, khosi ea Soba, Davida a bolaea banna ba Baarame ba likete tse mashome a mabeli a metso e 'meli. ₆Davida a hloma liahelo tsa mabōtho naheng ea Baarame e Damaseka, 'me Baarame ea e-ba bahlanka ba Davida, ba mo thèllang. Ka mokhoa o joalo, Morena a etsa hore Davida a hlōle hohle moo a neng a futuhela teng.

₇Davida a nka lithèbè tsa bahlabani ba Hadade-Esere tse neng li entsoe ka khauta, a li isa Jerusalema. ₈Ka mokhoa o joalo, le metseng ea Hadade-Esere, e leng Tibehate le Kune, Davida a nka lethose le lengata, leo ka lona Solomone a ileng a etsa tanka ea lethose eo baprista ba tollang ka ho eena, le litšiea, le lintho tsa lethose.

₉Ha Toi, khosi ea Hamate, a utloa kamoo Davida a hlotseng lebōtho lohle la Hadade-Esere, khosi ea Soba kateng, ₁₀a rōmela mora oa hae Hadorame ho Davida, ho ea mo lumelisa, le ho mo lebohela ha a loantšitse Hadade-Esere, 'me a mo hlōla, hobane Hadade-Esere o ne a ile a loantša Toi hangata. Hadorame a isetsa Davida mefuta eohle ea lintho tse entsoeng ka khauta, le ka silefera, le ka lethose.

₁₁Le tsona, khosi Davida a li khethela Morena, hammoho le silefera, le khauta eo a neng a e hapile lichabeng tsena tsohle, e leng Baedomo, le Bamoabe, le Baamone, le Bafilesita, le Baamaleke.

₁₂Abishai, mora oa Seruea, le eena a bolaea Baedomo ba likete tse leshome le metso e robeli, a ba bolaela ka Khohlong ea Letsoai.

₁₃Davida a hloma liahelo tsa mabōtho naheng ea Edomo, 'me Baedomo bohle ea e-ba bahlanka ba Davida, ba mo thèllang. Ka mokhoa o joalo, Morena a etsa hore Davida a hlōle hohle moo a neng a futuhela teng.

₁₄Davida a busa naha eohle ea Iseraele. A ahlōlela sechaba sohle sa hae ka toka le ka 'nete. ₁₅Joabe, mora oa Seruea, ea e-ba molaoli oa mabōtho; Jehoshafate, mora oa Ahilode, eena ea e-ba mongoli oa liketsahalo. ₁₆Sadoke, mora oa Ahitube, le Abimeleke, mora oa Abiatare, bona ea e-ba baprista, 'me Shafesha eena ea e-ba mongoli oa puso. ₁₇Benaea, mora oa Jehoeada, o ne a laola Bakerete le Bapelete; bara ba Davida bona e le batlatsi ba khosi.