SOFONEA 1

₂“Tsohle tse lefatšeng

ke tla li felisa,”

₃“Ke tla timetsa batho,

ke timetse liphoofolo,

ke timetse nonyana

tse fōfang sepakapakeng,

litlhapi tsa leoatle

le tsona ke li timetse.

Ke tla felisa likhopiso

'moho le ba khopo,

batho bohle lefatšeng

le bona ke ba timetse,”

₄“Ke tla otlolla tsoho la ka,

ke le otlollele holim'a Juda,

ke le otlollele le holim'a Jerusalema.

Masalla 'ohle a Baale ke tla a felisa,

ke a felise sebakeng sena,

le baprista ba bohata ke ba felise;

₅bona ba obamang

ba le holim'a matlo,

bona ba obamang,

ba khumamela linaleli,

ba khumamela khoeli,

ba khumamela letsatsi,

bona ba obamang,

ba hlapanye ka bitso la Morena,

empa ba ntse ba hlapanya

le ka Milekome.

₆Batho bana

ke ba furaletseng Morena,

ba mo furalla, ba se ke ba 'matla,

leha e le hona ho ipiletsa ho eena.

₇Khutsang ha le le kapele ho Morena,

kapele ho Morena Molimo,

hobane tsatsi la Morena le atametse.

Morena o s'a lokisitse sehlabelo,

le bamemuoa ba hae

o s'a ba khethile.

₈Mohla Morena a etsang sehlabelo,

ke tla otla mahosana

le bara ba khosi,

le bohle ba apereng meaparo esele.

₉Mohl'a tsatsi leo ke tla otla,

ke otle ba sa hateng

kosene ea monyako,

ke otle ba tlatsang

ntlo ea mong'a bona,

ba e tlatse

ka tse hapiloeng ka likhōka,

ba e tlatse

ka tse hapiloeng ka bolotsana.

₁₀“Mohl'a tsatsi leo,”

“mokhosi o tla utloahala

Monyakong oa Litlhapi,

seboko se utloahale

se e-tsoa motsemocha,

le molumo o moholo

o utloahale maralleng.

₁₁Bokollang, lōna ba ahileng

tlase ho motse,

hoba bahoebi bohle ba lōna

ba tla felisoa,

bohle ba ananyang ka silefera

ba timetsoe.

₁₂Ka nako eo

Jerusalema ke tla e lekōla,

ke e lekole

ke e khantšitse ka mabone;

ke otle bohle ba lutseng ba iketlile,

ba kang maritsa a veine a qitile,

ba luletseng ho bua ka pelo, ba re:

‘Morena a ke ke be a etsa letho,

a ke ke be a etsa botle

leha e le bobe.’

₁₃Matlotlo a bona a tla lobeloa,

matlo a bona a heletsoe,

e be masupi.

Matlo a bona 'ona ba tla a haha,

empa ha ba ka ke ba lula ho 'ona;

morara le oona ba tla o hloma

empa veine ea oona

ha ba ka ke ba e noa.”

₁₄“Tsatsi le leholo la Morena

le atametse, le tla le potlakile.

Utloang, tsatsi la Morena ke leo!

Mohlabani o tla hōoa a se na tšepo.

₁₅Tsatsi leo ke tsatsi la khalefo,

ke tsatsi la tlokotsi le la mahlomola,

ke tsatsi la timelo le la tšenyeho,

ke tsatsi la lefifi la bo-nka-ntjana,

tsatsi le phetheselang maru,

maru a matšo-matšo!

₁₆Ke tsatsi la lenaka ho houtsa,

ke tsatsi la mokhosi oa ntoa,

ke tsatsi la ho futuhela metse,

la ho futuhela marako

marako a tšireletso!

₁₇Ke tla bakela batho mahlomola,

tsela ba e phōphōletse sa lifofu,

hoba ba entse sebe,

ba sitetsoe Morena.

Mali a bona

a tla tšoloha sa lehlabathe,

mala a bona

a petletsehe sa bolokoe.

₁₈Mohl'a tsatsi leo

la khalefo ea Morena,

silefera ea bona,

esita le eona khauta,

tsena ha li ka ke

tsa tseba ho ba pholosa.

Khalefo ea Morena

e tukang malakabe,

e tla tlōkōma, e chese lefatše lohle.

Baahi bohle ba lefatše

o tla ba timetsa,

a ba timetse hang,

ka ho panya ha ntši.”