Elimeleke o fallela Moabe
1Mehleng ea ha ho ne bo busa baahlōli, naha ea Iseraele ea e-ba le tlala. Monna e mong oa Betlelehema e Juda, a e-na le mosali oa hae le bara ba hae ba babeli, a ea jaka naheng ea Moabe. 2Lebitso la monna eo e ne e le Elimeleke, mosali oa hae e le Naomi, bara ba hae e le Mahelone le Kilejone. E ne e le Baeferata ba tsoang Betlelehema e Juda. Ba fihla naheng ea Moabe, ba aha teng. 3Eaba Elimeleke, mohats'a Naomi, oa shoa, 'me mosali a sala le bara ba hae ba babeli. 4Bara bao ba nyala baroetsana ba morabe oa Moabe; lebitso la e mong e ne e le Orepa, la e mong e le Ruthe, 'me ba phela moo lilemo tse ka bang leshome. 5Bo-Mahelone le Kilejone le bona ba e-shoa, 'me 'm'a bona a sala a se a se na monna le bara ba hae ba babeli.
Naomi o khutlela Betlelehema
6Naomi a utloela hore Morena o ile a etela sechaba sa hae, a se fa lijo, eaba eena, hammoho le lingoetsi tsa hae, o itokisetsa ho tloha naheng ea Moabe. 7Ka baka leo, Naomi le lingoetsi tsa hae tse peli ba tloha moo ba neng ba phela teng. Ha ba le tseleng e eang naheng ea Juda, 8Naomi a re ho lingoetsi tsa hae: “Khutlang, e mong le e mong a boele lapeng habo. Morena a ke a be molemo ho lōna, joalokaha le bile molemo ho 'na le ho ba shoeleng. 9Morena a ke a nee e mong le e mong oa lōna monna le lelapa le tla ba le khotso.” Eaba Naomi oa ba aka, empa bona ba lla haholo.
10Ba re ho eena: “Ruri re tla khutlela le uena sechabeng sa heno.”
11Naomi a re: “Khutlang hle, bana ba ka! Ke hobane'ng ha le rata ho tsamaea le 'na? Na ke sa na le bara ba bang ka pōpelong ea ka, bao e ka bang banna ba lōna? 12Khutlang, bana ba ka; tsamaeang, hobane ke se ke tsofetse haholo hoo nke keng ka hlola ke e-ba le monna. Haeba ke ne nka re ke sa na le tšepo, 'me eba ke nyaloa hona bosiung bona, ke beleha bara, 13na le ne le tla ba emela ho fihlela ba hōla? Na le ne le tla hloboha lenyalo ka baka la bona? Che, bana ba ka, pelo ea ka e bohlōkō haholo ka baka la lōna, hobane Morena o mphuraletse.”
14Ba boela ba lla. Orepa a aka matsal'ae a khutlela ha habo, empa Ruthe eena a imamarela ka eena. 15Naomi a re ho eena: “Bona, ngoetsi eno e khutletse ho ba habo eona, le ho melimo ea eona; le uena khutla, u latele ngoetsi eno.”
16Empa Ruthe a re: “U se ke ua nqobella hore ke khaohane le uena, kapa hore ke se ke ka tsamaea le uena, hobane
“moo u eang teng
ke tla ea teng,
moo u phelang teng
ke tla phela teng;
chaba sa heno
e be chaba sa heso,
Molimo oa hao
e be Molimo oa ka.
17Moo u tla shoela teng
ke tla shoela teng,
'me ke tla epeloa hona teng.
Morena a nkahlōle ka ho fetisa
ha re ka arohanngoa ke ho hong,
haese ke lefu.”
18Ha Naomi a bona hore Ruthe o tsitlellela ho tsamaea le eena, a se ke a hlola a re letho ho eena. 19Ba tsamaea bobeli ba bona, ba ba ba ea fihla Betlelehema. Ha ba se ba fihlile Betlelehema, batho bohle ba motse ba ba bōkanela, basali ba khōtsa, ba re: “Na eo ke Naomi?”
20Empa a re ho bona: “Le se ke la mpitsa Naomi; le mpe le mpitse Mara, hobane Ea Matla 'ohle o nketselitse tse bōhlōkō.
21“Ke tlohile mona ke hafa ka nkatana,
Morena o nkhutlisa ke itlhophere;
joale le ka mpitsa Naomi joang,
athe Morena o ntsoile, o nkahlōtse,
Ea Matla 'ohle
o ntliselitse matšoenyeho?”
22Naomi a khutla tjena naheng ea Moabe, a e-na le Ruthe, ngoetsi ea hae ea ba morabe oa Moabe; ba fihla Betlelehema ha ho qaloa ho hèloa harese.
