Ba shoeleng ka nqeng ea sebe ba phela ho Kreste
1Joale re tla re'ng? Na re tla tsoela pele ho etsa sebe hore mohau o tle o ate? 2Le khale! Rōna ba shoeleng ka nqeng ea sebe, re ka 'na ra phela ho sona joang? 3Kapa ha le tsebe hore rōna bohle ba kolobelelitsoeng ho Jesu Kreste, re kolobelelitsoe lefu la hae? 4Ka kolobetso re epetsoe le eena, ra ba le kabelo lefung la hae, e le hore, joalokaha Kreste a tsohile bafung ka matla a tlōtlehang a Ntat'ae, ka mokhoa o joalo le rōna re tle re phele bophelo bo bocha.
5Ha re se re entsoe ntho e le 'ngoe le Kreste ka lefu le tšoanang le la hae, re tla ba joalo le ka tsoho e tšoanang le ea hae. 6Rea tseba hore botho ba rōna ba khale bo thakhisitsoe le eena, hore boleng ba rōna bo busoang ke sebe bo timetsoe, re tle re se hlole re e-ba makhoba a sebe, 7hobane ea shoeleng o lokolotsoe sebeng.
8Haeba re shoele le Kreste, le teng re lumela hore re tla phela le eena; 9kaha re tseba hore Kreste ea tsohileng bafung ha a ka ke a hlola a e-shoa hape, lefu ha le sa na matla holim'a hae. 10Ho shoeng ha hae, o shoele hanngoe feela ka nqeng ea sebe, empa ho pheleng ha hae, o phelela Molimo.
11Ka mokhoa o joalo le lōna le inke le le ba shoeleng ka nqeng ea sebe, empa le le ba phelelang Molimo ho Kreste Jesu.
12Ha ho le joalo, sebe se se ke sa busa 'meleng ea lōna e shoang, sa etsa hore le mamele litakatso tsa botho. 13Le se ke la hlola le neela sebe litho tsa lōna, hore e be lihlomo tsa ho se loke; le mpe le ineele Molimo le le ba phelang, ba tsohileng bafung; le neele Molimo litho tsa lōna, hore e be lihlomo tsa ho loka. 14Sebe se ke ke sa ba le matla holim'a lōna, hobane ha le sa le tlas'a Molao, empa le tlas'a mohau.
Makhoba a sebeletsang ho loka
15Joale? Na re tla etsa sebe, kahobane re se tlas'a Molao, re mpa re le tlas'a mohau? Le khale! 16Na ha le tsebe hore ha le ineela motho ho ba makhoba a hae le ho mo mamela, le makhoba a eo le mo mamelang; ebang ke sebe se isang lefung, kapa mamelo e isang ho lokeng? 17A ho lebohuoe Molimo, hobane le ne le le makhoba a sebe, empa le mametse ka lipelo tsa lōna tsohle mofuta oa thuto eo le e neiloeng. 18Le lokolotsoe sebeng, le entsoe makhoba a ho loka.
19Ke bua ka mokhoa oa batho ka baka la bofokoli ba lōna ba botho. Joalokaha le ne le neelane ka litho tsa lōna ho ba makhoba a manyala le a bokhopo, hore le be khopo-khopo, ka mokhoa o joalo, kajeno neelanang ka litho tsa lōna ho ba makhoba a ho loka hore le tle le halalele. 20Ha le ne le sa le makhoba a sebe, le ne le sa laoloe ke ho loka. 21Joale ke life tseo le ileng la li kotula nakong eo, ka ho etsa tseo, tse le hlabisang lihlong kajeno? Qetello ea tsona ke lefu. 22Empa kajeno le lokolotsoe sebeng, le entsoe makhoba a Molimo, le kotula tse le halaletsang, 'me qetello ea tsona ke bophelo bo sa feleng. 23Moputso oa sebe ke lefu, empa mpho ea mohau, ea Molimo, ke bophelo bo sa feleng ho Kreste Jesu, Morena oa rōna.
