U se ke ua ahlōla ngoan'eno
1Motho ea fokolang tumelong le mo amohele, empa le se ke la phea khang le eena ka tsa maikutlo a hae. 2E mong, ka tumelo ea hae, o ja lijo tsohle; e mong, ka ho fokola ha tumelo ea hae, o ja meroho feela. 3Ea jang tsohle a se ke a nyelisa ea sa jeng tsohle, le ea sa li jeng a se ke a ahlōla ea li jang, hobane le eena eo Molimo o mo amohetse. 4Uena u mang u ahlōlang mohlanka eo e seng oa hao? Ho tiisetsa kapa ho oa ha hae, ke taba ea mong'a hae. O tla fela a tiisetse, hobane Morena o na le matla a ho mo tiisa.
5E mong o hopola hore letsatsi le leng ke la bohlokoa ho feta le leng; e mong o hopola hore matsatsi 'ohle aa tšoana. Taba-taba ke hore e mong le e mong a kholisehe ka ho tlala hore o nepile. 6Ea hlomphang letsatsi le itseng o le hlomphela Morena; ea jang tsohle o li jela Morena, hobane o leboha Molimo. Ea sa jeng tsohle ha a li jele Morena, 'me le eena o leboha Molimo. 7Ha ho le ea mong oa rōna ea iphelelang, 'me ha ho ea ichoellang, 8hobane ha re phela, re phelela Morena; leha re e-shoa, re shoela Morena. Ka baka leo, leha re phela, kapa re e-shoa, re ba Morena.
9Kreste o ile a shoa, a ba a tsoha bafung ka lebaka lona lena: hore e tle e be Morena oa ba shoeleng le oa ba phelang. 10Joale uena u ahlōlela'ng ngoan'eno? Uena u nyelisetsa'ng ngoan'eno? Bohle re tla ema kapele ho setulo sa kahlōlo sa Molimo, 11hobane ho ngotsoe, ho thoe:
“Ke hlapanya ka 'na,
ho rialo Morena,
mangoele 'ohle
a tla nkhumamela,
'me maleme 'ohle
a tla tlotlisa Molimo.”
12Ka baka leo, e mong le e mong oa rōna o tla ikarabella ho Molimo.
U se ke ua khelosa ngoan'eno
13Ha ho le joalo, re se hlole re ahlōlana; le mpe le ikemisetse hore le se ke la khelosa kapa la lihela ngoan'abo lōna sebeng. 14Ke le oa Morena Jesu, kea tseba, 'me ke kholisehile hore ha ho ntho e ilehang ka boeona, empa ho ea reng ntho ea ileha, ke ho eena feela e ilehang. 15Ha u soabisa ngoan'eno ka lijo tsa hao, ha u sa sebetsa ka lerato. Ka lijo tsa hao, u se ke ua timetsa eo Kreste a mo shoetseng. 16Ka baka leo, seo le reng se molemo ho lōna, le se ke la etsa hore se nyefoloe. 17'Muso oa Molimo hase taba ea lijo le lino, empa ke taba ea ho loka, ea ho ba le khotso, le ea ho thabisoa ke Moea o Halalelang. 18Ea sebeletsang Kreste ka tsena o khahlisa Molimo, 'me o hlomphuoa ke batho.
19Joale a re habeng tsa khotso le tsa ho matlafatsana. 20U se ke ua senya mosebetsi oa Molimo ka taba ea lijo. Ke 'nete, tsohle li hloekile, empa li mpe ho motho ea li jelang ho khelosa. 21Ho molemo ho se je nama, kapa ho se noe veine, kapa ho se etse letho le leng le ka khelosang ngoan'eno.
22Tumelo eo u nang le eona tabeng ea lijo, e tsejoe ke uena le Molimo feela. Ho lehlohonolo motho eo letsoalo la hae le sa mo ahlōleleng seo a reng se lokile. 23Empa ea belaelang ha a e-ja, o ahlōtsoe, hobane ha a je ho ea ka tumelo ea hae. Tsohle tseo motho a li etsang ntle ho tumelo e joalo, ke sebe.
