Bophelo bo bocha ho Kreste
1Bana beso, ka baka la mohau oa Molimo, kea le rapela hore le ineele Molimo, le le sehlabelo se phelang, se halalelang, se mo khahlisang, e leng tšebeletso ea lōna e tšoanelehang. 2Le se ke la tšoana le ba lefatše lena, le mpe le fetohe ka ho nchafala likelellong, hore le tle le iphumanele seo thato ea Molimo e leng sona, e leng sohle se molemo, se khahlehang, se phethehileng.
3Ka baka la nèo ea mohau eo ke e neiloeng, ke bolella e mong le e mong oa lōna hore a se ke a ikhōpōla ho feta tekanyo, a mpe a inahane ka mokhoa o lekaneng, ho ea kamoo Molimo a lekanyelitseng e mong le e mong tumelo ea hae kateng. 4Joalokaha re e-na le litho tse ngata 'meleng o le mong, empa litho tseo tsohle li sa etse mosebetsi o tšoanang, 5ka mokhoa o joalo, leha re le bangata, re 'mele o le mong ho Kreste, e mong ke setho sa e mong. 6Joale re na le lineo tse fapaneng, ho ea ka mohau oo re o neiloeng. Ea neiloeng ho porofeta, a porofete ka ho ea ka tumelo; 7ea neiloeng ho sebeletsa, a sebeletse; ea neiloeng ho ruta, a rute; 8ea neiloeng ho khothatsa, a khothatse; ea fanang, a fane ka matsoho a mabeli; ea okametseng, a okamele ka mafōlōfōlō; ea etsang mohau, a o etse ka thabo.
Melao ea bophelo ba Bokreste
9Lerato le hloke boikaketsi. Hloeang bobe, khomarelang botle. 10Ratanang joaloka bana ba motho, le hlōlisane ha le hlomphana. 11Le se ke la ba botsoa, le mpe le be mafōlōfōlō, le sebeletse Morena ka moea o chesehang. 12Thabang ka baka la tšepo ea lōna, mamellang matšoenyehong, tiisetsang thapelong. 13Kenyang letsoho thusong ea balumeli ba hlokang, thabelang ho amohela baeti.
14Hlohonolofatsang ba le hlorisang; le ba hlohonolofatse, le se ke la ba rōhaka. 15Thabang le ba thabileng, llang le ba llang. 16Utloanang ka ho tlala, le se ke la ikakasa, empa le be metsoalle ea ba eisehang. Le se ke la ipona bohlale.
17Se buseletseng bobe ka bobe; pheellang ho etsa tse ntle mahlong a batho bohle. 18Ha ho ka etsahala, bōlōkang khotso le batho bohle, ho ea kamoo le ka khonang kateng. 19Baratuoa, le se ke la iphetetsa, le mpe le siele khalefo ea Molimo sebaka, hobane ho ngotsoe, ho thoe: “Phetetso ke ea ka, ke 'na ea tla lefeletsa,” ho rialo Morena. 20Empa:
“Ha sera sa hao se lapile,
se fepe;
ha se nyoriloe,
se fe metsi se noe;
ka ho etsa joalo
u se hlabisa lihlong.”
21U se ke ua hlōloa ke bobe, u mpe u hlōle bobe ka botle.
