1Bana beso, takatso ea pelo ea ka, le thapelo eo ke ba rapellang ka eona ho Molimo, ke hore ba pholosoe. 2Ke paki ea bona ea hore ba chesehela Molimo, leha e se ka tsebo ea 'nete. 3Ka ho se tsebe kamoo Molimo a lokafatsang batho kateng, 'me ka ho batla ho thèa ho loka hoo e leng ha bona, ha baa ka ba ikokobetsa tlas'a ho loka ho tsoang ho Molimo, 4hobane Kreste ke eena qetello ea Molao, ho lokafatsa mang le mang ea lumelang.
Ho pholosoa ke ha bohle
5Moshe ha a ngola ka ho loka ho tsoang Molaong, o re: “Motho ea phethang Molao o tla phela ka hona.” 6Empa ha ho buuoa ka ho loka ho tsoang tumelong, ho thoe: “U se ke ua re ka pelong ea hao: ‘Ke mang ea tla nyolohela leholimong?’ ” hore a e'o theola Kreste teng. 7“Kapa: ‘Ke mang ea tla theohela botebong ba lefatše?’ ” hore a e'o nyōlla Kreste bafung. 8Ho thoe'ng hape?
“Lentsoe le haufi le uena,
le molomong oa hao
le ka pelong ea hao,”
e leng lentsoe la tumelo, leo re le phatlalatsang. 9Ha u bolela Morena Jesu ka molomo oa hao, 'me u lumela ka pelong ea hao hore Molimo o mo tsositse bafung, u tla pholosoa. 10Motho o lumela ka pelo hore a tle a lokafatsoe, 'me o bolela tumelo ea hae ka molomo hore a tle a pholosoe, 11hobane Mangolo a re: “Mang le mang ea lumelang ho eena ha a ka ke a hlajoa ke lihlong.” 12Ha ho khethollo pakeng tsa Mojuda le molichaba, hobane Kreste ke eena Morena oa bohle, ea ruisang bohle ba mo rapelang. 13Mang le mang ea tla rapela Morena, o tla pholosoa.
14Ha ho le joalo, ba ka rapela joang eo ba sa lumelang ho eena? Ba ka lumela joang eo ba sa kang ba utloa tsa hae? Ba ka li utloa joang ho se ea li bolelang? 15Ba ka li bolela joang ha ba sa rōngoa? Ho joalokaha ho ngotsoe, ho thoe: “A matle hakaakang maoto a ba phatlalatsang molaetsa o molemo!”
16Empa hase bohle ba mametseng molaetsa o molemo, hobane Esaea o itse: “Morena, ke mang ea lumelang seo a re se bolelang?” 17Joale tumelo re e fumana ka ho utloa, 'me seo re se utloang ke lentsoe la Kreste. 18Empa kea botsa: Na ha baa ka ba utloa? Ba fela ba utloile.
“Lentsoe la bona
le utloahetse lefatšeng lohle,
'me lipolelo tsa bona
li fihlile lipheletsong,
li fihlile pheletsong tsa lefatše.”
19Joale ke re: Na Baiseraele ha baa ka ba utloisisa? Moshe o ne a se a ile a re:
“'Na ke tla le bakela lefufa
ka bao e seng sechaba,
ke tla le halefisa
ka sechaba se sethoto.”
20Esaea eena o bile sebete hoo a ileng a re:
“Ke fumanoe
ke ba neng ba sa mpatle,
ke itšenoletse
ba neng ba sa botse letho ka 'na.”
21Athe ho Baiseraele o itse: “Ke qetile tsatsi lohle ke otlolletse matsoho a ka sechabeng se sa mameleng, se hanyetsang.”
