TŠENOLO 4

₁Kamorao ho tsena ka talima, 'me ka bona monyako o butsoeng leholimong. Lentsoe lane la pele, le neng le bua le 'na, le ka molumo oa terompeta, ka utloa le re: “Nyolohela koano, 'me ke tla u bontša tse tšoanetseng ho etsahala kamorao ho tsena.” ₂Hang-hang ka tlaloa ke Moea oa Molimo. Leholimong ho ne ho beiloe terone, 'me e mong a lutse holim'a eona. ₃Ea lutseng teroneng o ne a bonahala a phatsima joaloka lehakoe la jasepere le la kareneleane, 'me mookoli o neng o pota-potile terone o ne o bonahala o ka lehakoe la emeraleda. ₄Terone e ne e pota-potiloe ke literone tse mashome a mabeli a metso e mene, 'me literoneng tseo ho ne ho lutse baholo ba mashome a mabeli a metso e mene, ba apereng liaparo tse tšoeu, ba roetseng mefapahlooho ea khauta lihloohong. ₅Mahalima, le melumo, le letōlō, li ne li betseha teroneng. Mabone a supileng a ne a tuka kapele ho terone: Ke meea e supileng ea Molimo. ₆Kapele ho terone ho ne ho ka leoatle le kang khalase, le benyang joaloka lehakoe.

Bohareng ba terone, le ho e pota-pota, ho ne ho e-na le libōpuoa tse 'ne tse phelang. Li ne li e-na le mahlo a mangata-ngata kapele le kamorao. ₇Sebōpuoa se phelang sa pele, se ne se tšoana le tau. Sebōpuoa se phelang sa bobeli, se ne se tšoana le pohoana. Sebōpuoa se phelang sa boraro, se ne se e-na le sefahleho se kang sa motho. Sebōpuoa se phelang sa bone, se ne se tšoana le ntsu e fofang. ₈Se seng le se seng sa libōpuoa tseo tse 'ne tse phelang, se ne se e-na le mapheo a tšeletseng, 'me kantle le kahare ho 'ona ho e-na le mahlo a mangata-ngata. Bosiu le motšeare li ne li sa khaotse ho re: