LIPESALEMA 65

₂Molimo, u lokeloa ke thoriso,

e u lokela u le Sione;

likano li phetheloa uena,

₃uena ea utloang thapelo.

Batho bohle ba tla tla ho uena,

₄ba tle ka baka la libe tsa bona.

Ha re imetsoe ke melato,

uena ua re tšoarela.

₅Ho lehlohonolo eo u mo khethileng,

ua mo amohela,

hore a tle a ahe mabaleng a hao.

Re tla khōra tse molemo

tsa Ntlo ea hao,

tse halalelang tsa Tempele ea hao.

₆U re arabela ka liketso tse hlollang,

liketso tse hlollang tsa toka,

uena Molimo, mopholosi oa rōna;

uena u leng tšepo ea bohle

ho isa lipheletsong tsa lefatše,

le lihlekehlekeng tse hōle.

₇Ka matla a hao u hlomile lithaba,

u bontša bonatla ba hao;

₈u khutsisa ho tuluana ha maoatle,

ho tuluana ha maqhubu a 'ona,

le ho luma-luma ha lichaba.

₉Ba ahileng lipheletsong tsa lefatše

ba tšaba lipontšo tsa hao;

u etsa hore bohle ba hōoe ka thabo.

ho tloha bochabela

ho isa bophirimela,

₁₀U etela lefatše, ua le noesetsa,

u le sitsa ka nala;

nōka tsa maholimo li phename,

ho fa batho lijo.

Ka mokhoa oo u lokisa lefatše,

₁₁ka ho kolobisa boleme ba masimo,

ho phōphōtha makoete a 'ona,

ho nolofatsa mobu

ka pula tsa melupe,

le ho hlohonolofatsa

lijalo tsa 'ona.

₁₂U roesa selemo mofapahlooho,

mofapahlooho oa tse molemo tsa hao,

mehlaleng ea hao ke nala feela.

₁₃Makhulo a lehoatata

a tšoetšoetha metsi,

maralla a aparetsoe ke thabo.

₁₄Liphula li aparetsoe ke mehlape,

likhohlo li tletse mabele.

Tsena tsohle li hōoa ka thabo,

lia bina.