LIPESALEMA 55

₂Oho, Molimo, ak'u sekehe tsebe,

u sekehele thapelo ea ka tsebe,

u se ke ua furalla thapeli ea ka.

₃Ak'u 'mamele, u be u nkarabe:

Ke tsielehile, ke sisa pelo,

kea feheloa,

₄ka baka la ho hloliuoa

ke lira tsa ka,

le ka baka la ho hlapaoloa

ke ba khopo.

Ba 'neta ka bokhopo,

ba ntlhorisa ba halefile.

₅Pelo ea ka e uba habohlōkō,

matsoalo a lefu a mpupelitse.

₆Ke kenoe ke letsoalo,

kea thōthōmela,

ke aparetsoe ke tšabo.

₇Ke bile ka re:

“Ke mang ea tla mpha mapheo,

mapheo a kang a leeba,

ke tle ke fofe, ke e'o phomola?”

₈E, nka be ke baleha, ke e-ea hōle,

ke il'o iphelela lehoatateng.

₉Ke ne ke tla potlakela

ho ea fumana tšireletso

meeeng ea litsokotsane le ea lifefo.

₁₀Morena, lobokanya merero

ea ba khopo,

u ferekanye maleme a bona,

hobane 'na ke bona sehlōhō,

ke bona le liqabang motseng;

₁₁li sōlla holim'a marako a motse,

li solla teng motšeare le bosiu,

bokhopo le bobe li kahar'a oona.

₁₂Har'a oona ke timelo feela,

bomènèmènè le mano

li ke ke tsa sutha mabaleng a oona.

₁₃Hoja ke sera se ntlhapaolang,

ke ne ke tla mamella;

hoja ea ntlhoileng

ke eena ea ikhantšetsang 'na,

ke ne ke tla ipatela eena.

₁₄Empa ke uena ea nkentseng joalo,

uena u leng molekane oa ka,

le thak'a ka, le motsoalle oa ka;

₁₅uena eo

re neng re buisana hamonate,

re le sehlopheng

se eang tlung ea Molimo.

₁₆Lefu le ke le ba khaoletse,

ba ke ba theohele Qalong ea Bafu,

ba theohele ba ntse ba phela,

hobane ba ahisane le bokhopo,

'me bo har'a bona.

₁₇Empa 'na

ke tla ipiletsa ho Molimo,

'me Morena o tla mpholosa.

₁₈Hoseng, motšeare le mantsiboea,

ke sisa pelo, kea feheloa,

'me o utloa lentsoe la ka.

₁₉O mpholositse ntoeng,

a mpha khotso,

leha ba mphutuhetseng

ba ne ba le bangata.

₂₀Molimo o tla utloa, a ba kokobetse,

eena eo esaleng a ituletse

teroneng ea hae;

hobane ha ba sokolohe,

ha ba tšabe Molimo.

₂₁Molekane oa ka o futuhetse

metsoalle ea hae,

o robile selekane sa hae.

₂₂Leleme la hae le ne le le monate,

empa bora bo ne bo le teng,

bo le teng ka pelong ea hae.

Mantsoe a hae

a ne a thoba hamonate,

empa e ne e le lisabole tse hlabang.

₂₃Rōlela moroalo oa hao ho Morena,

'me o tla u jarisa;

a ke ke a tlohella ea lokileng

hore a sisinngoe le ka mohla.

₂₄Uena Molimo, u tla ba lihela,

u tla ba lihela mohohlong oa timelo,

batho bao ba ratang ho tšolla mali,

ba ratang le ho thetsa;

ba ke ke ba phela

leha e le halofo ea litšiu tsa motho.

Empa 'na ke tšepile uena.