LIPESALEMA 45

₂Pelong ea ka

ho tletse taba tse monate,

ke bolela

tseo ke li qapetseng khosi,

leme la ka le ka lesiba la sengoli,

siba la sengoli se mahlahahlaha.

₃U motle

ho feta bana bohle ba batho,

molomo oa hao oa khahleha,

hobane Molimo

o u hlohonolofatsa kamehla.

₄Uena mohale,

tlamella sabole ea hao qhōlōng;

ka hlompho le ka botlotlehi ba hao,

₅palama, u hlōle, u loanele 'nete,

le boikokobetso, le ho loka.

Tsoho la hao le letona

le u etsetse liketso tse makatsang.

₆Metsu ea hao e leotsehile,

lichaba li tla oela tlas'a puso ea hao,

lira tsa khosi li tla nyahama pelo.

₇Terone ea hao, Molimo,

ke ea kamehla le mehla,

lere la hao la puso

ke lere la toka.

₈U rata ho loka, u hloile bokhopo.

Kahoo Molimo, Molimo oa hao,

o u tlotsitse ka ole ea thabo,

ho e-na le balekane ba hao;

₉aparo tsa hao tsohle

li nonolitsoe ka 'mira,

le ka lekhala, le ka sente.

Matlung a khabisitsoeng

ka manaka a tlou

ho utloahala harepa tse u thabisang.

₁₀Khosatsana li teng

har'a mafumahatsana,

mafumahatsana a hao a

hlomphehang;

mofumahali o eme

tsohong la hao le letona

o eme a khabile ka khauta ea Ofire.

₁₁Mamela, moroetsana;

bona, u sekehe tsebe;

tela chaba sa heno le lapa leno,

₁₂hore khosi e tle e chachehele botle,

e chachehele botle ba hao haholo.

Kahobane ke eona mong'a hao,

u itihe maotong a eona.

₁₃Ba motse oa Tire

ba tla u nyehella ka limpho,

barui ba balichaba

ba tla batla thuso ea hao.

₁₄Khosatsana e kena e le Seilatsatsi,

aparo tsa eona li hōmiloe ka khauta;

₁₅e isoa ho khosi

e apere tse mahalihali.

Baetsana ba baroetsana

ba tlisoa ho khosi.

₁₆Ba tlisoa ka thabo le nyakallo,

ba kena ka tlung ea khosi.

₁₇Tulong tsa bo-ntat'ao

ho tla lula bara ba hao,

u tla ba bea mahosana naheng eohle.

₁₈Ke tla etsa hore bitso la hao

le hopoloe ke melōko eohle;

ka baka leo, chaba li tla u boka,

li u boke kamehla le mehla.