LIPESALEMA 25

Morena ke u rapela

ka moea oa ka oohle,

₂ke rapela uena Molimo oa ka.

Ke u tšepile,

ke se ke ka hlajoa ke lihlong;

lira tsa ka li se ke tsa ntšeha.

₃Bohle ba u tšepang

ha ba hlajoe ke lihlong,

lihlong li hlaba

ba sa tšepahaleng.

₄Morena, mpontše litsela tsa hao,

u nthute mehlala ea hao.

₅Ntsamaise 'neteng ea hao,

u nthute eona,

hobane uena u Molimo

ea mpholosang;

ke u lebeletse ka matsatsi 'ohle,

ka baka la molemo oa hao Morena.

₆Morena, hopola lerato

le mohau oa hao,

hobane esale u le teng

ho tloha khale.

₇Nteballe libe le litlōlo

tsa bocha ba ka,

nkhopole ka mohau oa hao.

₈Morena o molemo, o lokile;

kahoo o busetsa baetsalibe tseleng.

₉Ba eisehang o ba tsamaisa ho lokeng,

o ruta ba eisehang tsela ea hae.

₁₀Litsela tsohle tsa Morena

ke tsa mohau le botšepehi,

ho ba bōlōkang selekane sa hae

le ho ba bōlōkang litemoso tsa hae.

₁₁Ka baka la lebitso la hao Morena,

ntšoarele molato oa ka,

hobane o moholo.

₁₂Haeba ho teng ea tšabang Morena,

Morena o tla 'montša tsela,

tsela eo a tšoanetseng ho e khetha.

₁₃Eo o tla phela ka boiketlo,

lefatše e tla ba lefa

la litlōhōlō tsa hae.

₁₄Morena ke motsoalle

oa ba mo tšabang,

o ba tsebisa selekane sa hae.

₁₅Mahlo a ka

a talimile Morena kamehla,

hobane ke eena ea tšoasollang

maoto a ka lerabeng.

₁₆Retelehela ho 'na, u nkhauhele,

hobane ke 'notši,

'me ke hlōphehile.

₁₇Felisa matšoenyeho a pelo ea ka,

u 'ntše makaqabetsing a ka.

₁₈Talima ho hlōpheha ha ka

le tsietsi ea ka,

'me u ntšoarele libe tsa ka tsohle.

₁₉Bona kamoo lira tsa ka

li leng ngata kateng,

le kamoo

li ntlhoileng hampe kateng.

₂₀Ak'u baballe bophelo ba ka,

u 'namolele,

ke se ke ka hlajoa ke lihlong,

kaha ke tšabela ho uena.

₂₁Ak'u ntšireletse

hobane ke hloka koli, ke lōkile;

hobane ke u lebeletse, Morena.

₂₂Molimo, ak'u lopolle Iseraele,

u mo lopolle

matšoenyehong a hae 'ohle.