Morena oa rōna o moholo ho melimo eohle
1Haleluja!
Rorisang lebitso la Morena,
mo roriseng,
lōna bahlanka ba Morena,
2ba emang ka Tlung ea Morena,
mabaleng a Ntlo ea Molimo
Ntlo ea Molimo oa rōna.
3Rorisang Morena,
hobane Morena o molemo;
rokang lebitso la hae,
hobane oa rateha.
4Morena o ikhethetse,
a ikhethela lelōko la Jakobo,
e leng Iseraele,
hore e be leruo la hae.
5Ruri kea tseba
hore Morena o moholo,
Morena oa rōna o moholo,
o moholo ho melimo eohle.
6Morena o etsa tsohle
tseo a li ratang,
maholimong le lefatšeng,
maoatleng le malibeng 'ohle.
7Ke eena ea nyollang maru,
a a nyolle lipheletsong tsa lefatše,
ea nesang pula ka mahalima,
ea bulelang lifefo
moo a li koaletseng teng.
8Ke eena ea ileng a bolaea,
a bolaea matsibolo a Egepeta,
ho qala ka a batho
ho isa ho a liphoofolo.
9Ho uena Egepeta,
o ile a rōmela
lipontšo le limakatso, ho Faro
le ho bahlanka bohle ba hae.
10Ke eena ea ileng a timetsa,
a timetsa lichaba tse ngata,
a bolaea likhosi tse matla:
11Sihone, khosi ea Baamore,
le Oge, khosi ea Bashane,
le mebuso eohle ea Kanana.
12A fana ka naha ea bona
hore e be lefa,
lefa la Iseraele sechaba sa hae.
13Morena, lebitso la hao
ke la kamehla eohle;
Morena, u tla hopoloa,
u hopoloe ke melōko eohle.
14Morena o tla ahlōla,
a ahlōlele sechaba sa hae,
'me a qenehele bahlanka ba hae.
15Melimo ea bohata ea balichaba
ke ea silefera le ea khauta,
ke mosebetsi oa matsoho a batho.
16E na le melomo, empa ha e bue;
e na le mahlo, empa ha e bone.
17E na le litsebe, empa ha e utloe;
le ho phefumoloha,
ha e phefumolohe,
18Ba e etsang
ba ke ba tšoane le eona,
ba be joalo bohle ba e tšepang.
19Lōna, ba ntlo ea Iseraele,
bokang Morena;
lōna ba ntlo ea Arone,
bokang Morena;
20lōna ba ntlo ea Levi,
bokang Morena;
le lōna ba tšabang Morena,
bokang Morena.
21Morena a ke a bokoe ke ba Sione,
eena ea ahileng Jerusalema.
Haleluja!
