LIPESALEMA 132

Morena, ak'u hopole Davida,

le ho hlōpheha hohle ha hae,

₂kamoo a neng a hlapanye,

a hlapanyetsa Morena kateng,

a ikana ho Ea Matla,

Molimo oa Jakobo,

₃a re:

“Nke ke ka kena ka tlung ea ka,

kapa ka paqama liphateng tsa ka;

₄mahlo a ka

a ke ke a fumana boroko,

le lintši tsa ka

li ke ke tsa tutubala,

₅ho fihlela

ke fumanela Morena sebaka,

ke fumanela Ea Matla Leaho,

Ea Matla, Molimo oa Jakobo.”

₆Areka re e utloetse Eferata,

ra e fumana masimong a Jaare.

₇A re keneng ka Leahong la hae,

re itihele kapele ho eena.

₈Tloo, Morena,

u ee sebakeng sa hao sa phomolo,

uena le areka

e bontšang matla a hao.

₉Baprista ba hao ba apesoe ho loka,

batšepuoa ba hao ba etse litlatse.

₁₀Ka baka la mohlanka oa hao Davida,

u se ke ua furalla

Motlotsuoa oa hao.

₁₁Morena o ile a hlapanyetsa Davida,

a ke ke a koenehela tšepiso,

tšepiso ena ea 'nete,

a re: “E mong

oa bana ba theka la hao,

ke tla 'mea teroneng ea hao.

₁₂Ha bara ba hao

ba ka bōlōka selekane sa ka,

ba latela litemoso

tseo ke ba neileng tsona,

le bara ba bona ba tla lula teroneng,

teroneng ea hao kamehla.”

₁₃Morena o ikhethetse Sione,

o ratile hore e be leaho la hae;

₁₄a re: “Sena ke sebaka sa ka

sa phomolo sa kamehla,

ke tla aha mona

hobane ke ratile joalo.

₁₅Ke tla hlohonolofatsa Sione ka nala,

mafutsana a eona ke a fepe,

ke a fepe, a khōre.

₁₆Baprista ba eona

ke tla ba apesa pholoho,

batšepuoa ba eona

ba etse litlatse.

₁₇“Teng ke tla bea setlōhōlō sa Davida,

ke se bee hore e be khosi e matla,

ke lokisetse

Motlotsuoa oa ka lebone.

₁₈Lira tsa hae ke tla li apesa lihlong;

athe eena hloohong ea hae

ho tla khanya mofapahlooho oa hae.”