LIPESALEMA 128

Ho lehlohonolo bohle,

bohle ba tšabang Morena,

ba tsamaeang litseleng tsa hae.

₂U tla ja tholoana tsa mosebetsi,

tsa mosebetsi oa matsoho a hao,

u tla ba lehlohonolo,

u be le katleho.

₃Mosali oa hao

o tla ba joaloka morara

morara o behang ka tlung ea hao;

bana ba hao

ba be joaloka mahlōmela,

mahlōmela a mohloaare,

ho pota-pota tafole ea hao.

₄E, motho ea tšabang Morena

o hlohonolofala joalo.

₅Morena a ke a u hlohonolofatse,

a u hlohonolofatse a le Sione,

u tle u bōhe katleho ea Jerusalema

ka litšiu tsohle tsa bophelo ba hao.

₆U ke u bone bana ba bana ba hao.

Khotso e ke e be teng Iseraele.