LIPESALEMA 118

₁Bokang Morena, hobane o molemo;

mohau oa hae

ke oa kamehla eohle.

₂Iseraele a ke a re:

“Mohau oa hae

ke oa kamehla eohle.”

₃Ba ntlo ea Arone ba ke ba re:

“Mohau oa hae

ke oa kamehla eohle.”

₄Ba tšabang Morena ba ke ba re:

“Mohau oa hae

ke oa kamehla eohle.”

₅Ha ke ne ke patisitsoe,

ka ipiletsa ho Morena;

Morena a nkarabela, a ntokolla.

₆Morena o na le 'na,

ha ke tšabe letho;

motho a ka nketsa'ng?

₇Morena o na le 'na,

ke mothusi oa ka,

ke tella ba ntlhoileng.

₈Ho molemo ho tšabela ho Morena,

ho e-na le ho tšepa motho.

₉Ho molemo ho tšabela ho Morena,

ho e-na le ho tšepa mahosana.

₁₀Balichaba

ba ne ba ntikanetse kaofela,

empa ka ba tamukanya

ka lebitso la Morena.

₁₁Ba ntikanela,

ba ntikanela kamahohle,

empa ka ba tamukanya

ka lebitso la Morena.

₁₂Ba mpokanela joaloka linotši,

ba ka malakabe

har'a lihlahla tsa meutloa,

empa ka ba tamukanya

ka lebitso la Morena.

₁₃Ka sutumetsoa haholo

hoo ke batlileng ke e-oa;

empa Morena a nthusa.

₁₄Morena ke matla a ka

le thoko ea ka,

ke eena mopholosi oa ka.

₁₅Metlotloaneng ea ba lokileng,

ho utloahala litlatse tsa tlhōlo,

ho thoe:

“Letsoho le letona la Morena

le sebelitse tse matla,

₁₆letsoho le letona la Morena

lea tlōtleha,

letsoho le letona la Morena

le sebelitse tse matla.”

₁₇Ha nka ke ka shoa,

empa ke tla phela,

ke bolele mesebetsi ea Morena.

₁₈Morena o nkhalemetse,

empa ha aa ka a 'neela lefu.

₁₉Mpuleleng menyako ea Tempele,

ke tle ke kene ka eona,

ke boke Morena.

₂₀Ona ke oona monyako,

monyako oa ntlo ea Morena,

ba lokileng ba tla kena ka oona.

₂₁Kea u boka

hobane u ile ua nkaraba,

u bile mopholosi oa ka.

₂₂Lejoe le lahliloeng ke lihahi

le fetohile lejoe la mantlha;

₂₃ke Morena ea entseng hona,

'me mahlong a rōna ke mohlolo.

₂₄Lena ke lona letsatsi

le entsoeng ke Morena;

a re nyakalleng,

re thabeng ke hona.

₂₅Oho, Morena, ak'u re pholose!

Oho, Morena, ak'u re atlehise!

₂₆Ho bokoe ea tlang

ka bitso la Morena:

Re le hlohonolofatsa

re le ka tlung ea Morena.

₂₇Morena ke Molimo;

oa re bonesetsa.

Tšoarang mahlaku, le koloke,

le be le e'o fihla

manakeng a aletare.

₂₈U Molimo oa ka, kea u boka;

u Molimo oa ka, kea u tlotlisa.

₂₉Bokang Morena, hobane o molemo;

mohau oa hae

ke oa kamehla eohle.