LIPESALEMA 104

Morena Molimo oa ka,

u moholo hakaakang!

U apere tlōtla le botlotlehi,

₂u ipōpile ka leseli

joalokaha eka ke kobo.

U alile maholimo

joaloka lesela la tente,

₃u hahile ntlo ea bokhosi ba hao

kaholimo ho maru.

Maru u a entse kariki ea hao,

u fofa ka mapheo a moea.

₄Meea u e entse barōmuoa ba hao,

mollo oa lehalima

mosebeletsi oa hao.

₅U tiisitse lefatše

holim'a methèo ea lona,

le ke ke la sisinyeha ho isa khale.

₆U le apesitse ka leoatle

joalokaha eka ke ka kobo,

metsi a ne a koahetse lithaba.

₇Eare ha u kharuma, metsi a baleha;

ha letōlō la hao le thoathoaretsa,

a tutumolotseha;

₈a theohela likhohlong,

lithaba tsa hlaha,

a ea moo u a lokiselitseng teng.

₉Ua a sehela moeli

oo a ke keng a o tlōla,

hore a se hlole

a koahela lefatše hape.

₁₀Ua phallisetsa liliba linōkaneng

tse tsoelipanang har'a lithaba;

₁₁metsi a tsona a nooa

ke phoofolo tsa naha,

tonki tsa naha

li itlosa lenyora teng.

₁₂Nonyana tse fofang

li hahetse pel'a tsona,

li letsa meloli

li le makaleng a lifate.

₁₃U nesetsa lithaba pula

u le tlung ea bokhosi ba hao,

lefatše le khotše litholoana,

tholoana tsa mesebetsi ea hao.

₁₄U melisetsa liphoofolo joang,

u li melisetsa le limela

hore li sebelisoe ke motho,

a tle a fumane lijo tsa hae mobung,

₁₅le veine,

ho thabisa pelo ea motho;

le ole,

fahleho sa hae se be moropotsana,

le lijo,

ho matlafatsa 'mele oa hae.

₁₆Lifate tsa Morena

li noesetsoa ke pula,

likedare tsa Lebanone

tse lemiloeng ke eena.

₁₇Linonyana li etsa lihlaha ho tsona,

mekotatsie e phela holim'a lifate.

₁₈Thabeng tse telele

ho phela poli tsa naha,

liqhobo ke setšabelo sa lipela.

₁₉U entse khoeli

ho tšoaea linako tsa selemo,

letsatsi le tseba nako ea lona

nako ea ho likela.

₂₀U tlisa lefifi, ebe e ba bosiu,

libatana tsa meru ebe lia sōlla;

₂₁litaoana li purumele

liphofu tsa tsona,

li batle lijo tsa tsona ho Molimo.

₂₂Ha tsatsi le chaba lia oroha,

ebe li bōtha lilaong tsa tsona.

₂₃Motho eena

o ikela mosebetsing oa hae,

a e'o sebetsa ho fihlela mantsiboea.

₂₄Morena, mesebetsi ea hao

e mengata hakaakang!

Tsohle u li entse ka bohlale,

lefatše le tletse libōpuoa tsa hao!

₂₅Ke leo leoatle, le leholo, le batsi;

ka ho lona ho nyeunya libōpuoa,

libōpuoa tse se nang palo,

libōpuoa tse kholo le tse nyenyane.

₂₆Teng likepe li sesa kahohle,

le leruarua leo u le bōpetseng

ho bapalla ka ho lona.

₂₇Tsohle li lebeletse uena,

hore u li fe lijo ka nako e lokelang.

₂₈Ha u li fa lijo, lia li bōkella;

ha u fuparolla seatla,

li khōra tse molemo.

₂₉Ha u ipata sefahleho, lia tšoha;

ha u li amoha moea oa hao,

lia shoa,

li boele li khutlele lerōleng.

₃₀Ha u rōmela moea oa hao,

lia hloleha,

'me u nchafatse tšobotsi ea lefatše.

₃₁Tlōtla ea Morena e 'ne e be teng,

e be teng kamehla eohle,

Morena a ke a thabele

mesebetsi ea hae;

₃₂eena eo ereng ha a talima lefatše,

lefatše le thōthōmele,

ha a ama lithaba li fōqōhe mosi.

₃₃Ke tla binela Morena

ha ke ntse ke phela,

ke roke Molimo

bophelong ba ka bohle.

₃₄Menahano ea ka e ke e mo khahle;

'na ke thabela Morena.

₃₅Baetsalibe ba ke ba fele lefatšeng,

ba khopo ba se hlole ba e-ba teng.

Boka Morena, uena moea oa ka.

Haleluja!