Bohlale boa rorisoa
1Na ebe bohlale ha bo hōoe?
Kutloisiso eona
ha e phahamise ntsoe la eona?
2Bo eme tseleng tse phahameng,
bo eme mateanong a litsela.
3Bo hōoeletsa
bo le khorong tsa motse,
bo hōoeletsa
bo le monyako oa motse:
4“Banna, mamelang, ke bitsa lōna,
ke ipiletsa ho batho bohle.
5Lōna ba se nang tsebo
ithuteng bohlale!
Lōna lithoto batlang kutloisiso!
6Theang tsebe
ke le bolelle tsa bohlokoa,
ke le phatlalletse tse lokileng.
7Ke tla bua 'nete feela,
hobane bokhopo ke bo hloile.
8Polelo tsohle tsa ka ke tsa 'nete,
thetso le bomènèmènè
ha li eo ho tsona,
9li utloahala tsohle
ho ea nang le kelello,
li nepahetse tsohle
ho ba nang le tsebo.
10Inkeleng thuto ea ka
ho e-na le silefera,
ikhetheleng tsebo ho e-na le khauta.
11“Bohlale bo molemo
ho feta mabenyane a bohlokoa,
ha ho letho le ka bapisoang le bona.
12'Na, Bohlale, ke fana le ka masene,
tsebo le tlhalohanyo
le tsona ke li ruile.
13Ho tšaba Morena
ke ho hloea bobe,
ke hloile boikhōhōmōso,
ke hloile le boikakaso,
boitšoaro bo bobe le leshano
le tsona ke li hloile.
14Boeletsi le ho ba seli
le tsona ke tsa ka,
kutloisiso le matla le tsona ke tsa ka.
15Ke ka 'na
khosi li tsebang ho rena,
le babusi
ba etsang melao e lokileng.
16Ke ka 'na mahosi le mahosana
a tsebang ho busa,
le baahlōli bohle
ba tsebang ho ahlōla.
17Ba nthatang le 'na kea ba rata,
ba mpatlang
bona ba tla mphumana.
18Ho 'na maruo le tlōtla li teng,
maruo a sa feleng le hona ho loka.
19Tholoana ea ka
e khahleha ho feta khauta,
e feta khauta e hloekisitsoeng,
tse fumanoang ho 'na
li feta silefera e hloekisitsoeng.
20Ke tsamaea tseleng ea toka,
tsela ea ka ke tsela ea molao.
21Ba nthatang ke ba abela lefa,
matlōle a bona ke a tlatse,
a be mohlōhlō.
22“Morena o mpōpile
qalehong ea mesebetsi ea hae,
pele ho mesebetsi ea hae,
mesebetsi ea khale-khale;
23ke hloliloe khale,
pele ho mehla eohle,
ke hloliloe tšimolohong,
fatše le e-s'o be teng.
24Ka tsoaloa
pele maoatle a e-ba teng,
liliba tse kollang li e-s'o ka li runya;
25ka tsoaloa thaba li e-s'o ka li thèoa,
ka tsoaloa le maralla a e-s'o be teng,
26pele fatše le e-ba teng
le masimo a lona,
pele rōle la lefatše
le lona le e-ba teng.
27Ke ne ke le teng
ha a bea maholimo bakeng sa 'ona,
a seha moeli oa lōapi,
a o seha holim'a maoatlē;
28ha a etsa lenamōla la maru,
a le etsa sepakapakeng,
a phunya mehloli ea maliba
a e tsitsisa;
29ha a sehela leoatle moeli oa lona,
metsi a se ke a tlōla taelo ea hae;
le ha a rala methèo ea lefatše.
30Ke ne ke le tsoho la hae le letona,
ka matsatsi 'ohle ke mo thabisa,
ke nyakaletse ke le kapele ho eena;
31ke thabetse lefatše e le la hae,
ke thabetse le batho a bo bōpile.
32“Joale, bana ba ka, 'mameleng!
Ho lehlohonolo
ba tsamaeang tseleng tsa ka.
33Mamelang thuto ea ka
le tle le hlalefe,
le se ke la hana ho e mamela.
34Ho lehlohonolo
motho ea 'mamelang,
ea lebelang kamehla
menyakong ea ka,
ea kokomalang thuleng la ntlo ea ka.
35Ea mphumanang o fumana bophelo,
Morena o tla mo rekolohela.
36Ea sa mphumaneng o ipea kotsing,
bohle ba ntlhoileng
bona ba rata lefu.”
