MAELE 25

₂Tlōtla ho Morena

ke ho etsa litaba sephiri,

athe tlōtla ea likhosi

ke ho phenya-phenya litaba.

₃Joalokaha maholimo a phahame,

fatše lona le le tlase,

menahano ea likhosi

le eona e ke ke ea fihleloa.

₄Hloekisa silefera

ka ho e ntša manya,

lelala le tle le tsebe

ho bōpa nkho ka eona.

₅Hleka ba khopo kapele ho khosi,

terone ea eona

e tl'e tsitsisoe ke ho loka.

₆Se ke ua ikakasa kapele ho khosi,

kapa ua lula tulong tsa mahosana;

₇ho molemo ha khosi e re ho uena:

“Nyolohela koano!”

ho e-na le ho tlontlolloa

mahlong a khosana,

mahlong a khosana eo u e bonang.

₈Se potlakele ho isa motho ka khotla,

esere mohaeno a u tlontlolla,

ua qetella

u se na seo u ka se etsang.

₉Ha u tsekisana le mohaeno

buisana le eena,

feela taba tsa e mong

tsona e be pinyane,

₁₀esere ha a utloa a u tlontlolla,

botumo bo bobe

bo se hlole bo u hlakoha.

₁₁Polelo e builoeng ka nako ea eona

e ka apole tsa khauta

ka sejaneng sa silefera.

₁₂Ho khalengoa ke motho ea bohlale,

tsebeng e lethoèthè ke lesale,

ke mokhabo oa khauta

e hloekisitsoeng.

₁₃Joaloka lehloa le pholisang

ka nako ea kotulo,

leqosa le tšepahalang

le joalo ho ba-le-rōmi;

le khatholla pelo ea mong'a lona.

₁₄Motho ea ithorisang

ka limpho tsa molomo,

o joaloka maru

le moea o se nang pula.

₁₅Ho ba le mamello

ho ka sokolla khosi;

polelo e bonolo e felisa manganga.

₁₆Ha u ntšetsa linotši

u li je ka tekanyo;

ha u ka itlōpa tsona,

li tla u hlatsisa.

₁₇Ea ahisaneng le uena

u mo fapohele seoelo,

esere ua mo tena,

a qetella a u hloile.

₁₈Ea etseletsang mohahabo ka leshano

ke koto kapa sabole,

kapa motsu o nchocho.

₁₉Ho tšepa molotsana

nakong ea litsietsi

ho ka leino le bolileng,

kapa leoto le hlotsang.

₂₀Ho binela ea hlomohileng

pina tsa thabo,

ho ka ho hlōbōla kobo

mohla ho batang,

le ho tšèla asene holim'a leqeba.

₂₁Ha sera sa hao se lapile,

u ke u se fepe;

ha se nyoriloe, se fe metsi se noe;

₂₂ka ho etsa joalo

u se hlabisa lihlong,

'me uena Morena o tla u putsa.

₂₃Joalokaha moea oa leboea

e le 'malipulana,

leme le sebang le tsosa khalefo.

₂₄Ho molemo

ho iphelela sekhutloaneng,

kaholim'a marulelo a ntlo,

ho e-na le ho phela

le 'malikomang.

₂₅Taba tse monate

tse tsoang naheng e hōle

li ka metsi a pholileng

'metsong o nyoriloeng.

₂₆Motho ea lokileng,

ea suthelang ea khopo tsela,

ke liba se lukehileng

kapa mohloli o silafetseng.

₂₇Hase hantle ho itlōpa linotši;

ho ipatlela tlōtla

le hona ha ho lokele.

₂₈Motho ea hlōloang

ho bipa khalefo ea hae

o tšoana le motse

o marako a helelitsoeng.