MAELE 16

₁Pelo ea motho e rera merero,

tseo a li buang

li laoloa ke Morena.

₂Ketso tsa motho

li talimeha li lokile ho eena,

empa Morena

o lekola sepheo sa hae.

₃Bea mesebetsi ea hao

atleng tsa Morena,

'me merero ea hao

e tla phethahala.

₄Tsohle Morena o li entse

ka morero oa hae,

le ea khopo

tsatsi la litlokotsi le mo emetse.

₅Motho ea ikhantšang

Morena oa mo nyonya,

ea joalo Morena o tla mo ahlōla.

₆Sebe se hlakoloa

ke lerato le botšepehi;

ea tšabang Morena

bobe o tla bo phema.

₇Eo metsamao ea hae

e khahlang Morena,

Morena o mo phelisa

ka khotso le lira tsa hae.

₈Sejo-senyane se molemo

ha se fumanoe ka toka,

ho e-na le maruo

a fumanoang ka bolotsana.

₉Motho o itherela tsela ea hae,

empa ke Morena ea mo tataisang.

₁₀Liqeto tsa khosi

li tsoa ho Molimo,

ha e ahlōla e ahlōla ka toka.

₁₁Tekanyo tse nepahetseng

ke tsa Morena,

majoe a supang boima

a entsoe ke eena.

₁₂Khosi li nyatsa ketso tse manyala,

ho loka hona ho tsitsisa 'muso.

₁₃Molomo o buang tse lokileng

o thabisa likhosi,

likhosi li rata motho ea buang 'nete.

₁₄Khalefo ea khosi

e tšoana le ea tlisang pehi,

empa ea bohlale

o kokobetsa khalefo.

₁₅Ho thaba ha khosi hoa phelisa,

mohau oa eona

o ka leru la pul'a selemo.

₁₆Ho fumana bohlale

ho molemo ho feta khauta,

ho fumana kutloisiso

ho molemo ho feta silefera.

₁₇Tsela ea ba lokileng

e kheloha bobe,

ea e hlokomelang

o baballa bophelo ba hae.

₁₈Boikakaso bo etella timelo pele,

boikhōhōmōso bo etelle ho oa, pele.

₁₉Ho molemo ho ikokobetsa

u le har'a mafutsana,

ho e-na le ho arolelana khapo

le baikhōhōmōsi.

₂₀Ea elang litaelo hloko oa atleha,

ea tšepang Morena

oa hlohonolofala.

₂₁Ea bohlale

ho thoe o na le kutloisiso,

polelo tse monate tsona

lia kholisa,

₂₂Bohlale ke liba sa bophelo

ho ea nang le bona,

ho ruta lithoto

ke ho itšenyetsa nako.

₂₃Ea bohlale

o hlalefisoa ke pelo ea hae,

le seo a tla se bua

o se rutoa ke eona.

₂₄Polelo tse monate

li ka mahe a linotši,

moeeng lia hlabosa,

li matlafatse 'mele.

₂₅Tsela e teng e bonahalang

e lokile ho mong'a eona,

empa e qetella ka ho isa lefung.

₂₆Sekhothali sea itšebeletsa

se itšebeletsa ka thata,

hobane se lakatsa ho ikhotsofatsa.

₂₇Senokoane se rera bobe,

molomong oa sona

ho tsoa tse chesang sa malakabe.

₂₈Motho ea khopo o luka khotso,

mosebi eena o qabanya metsoalle,

metsoalle ea hlooho ea khomo.

₂₉Motho ea likhōka

o hohela ea ahisaneng le eena,

a mo tsamaise tseleng tse sa lokang,

₃₀Ea robang leihlo o rera bokhopo,

ea petlang melomo

bobe o s'a bo entse.

₃₁Moriri o moputsoa

ke mofapahlooho o khabane,

o fumanoa

ke ea phelang ka ho loka.

₃₂Ea nang le mamello

o molemo ho feta ea likhōka,

ea itšoarang ha a halefile

o feta ea hapang motse.

₃₃Batho ba laola litaba ka lōtho,

empa liqeto tsona ke tsa Morena.