Maele a Solomone
1Ana ke maele a Solomone:
Ngoana ea bohlale
o thabisa ntat'ae,
ngoana ea sethoto
ke masisa-pelo ho 'm'ae.
2Maruo a fumanoeng ka bokhopo
ha a na thuso,
empa toka e lokolla motho lefung.
3Ba lokileng
Morena ha a ba bolaise tlala,
takatso tsa ea khopo oa li nyōpisa.
4Ea phuthileng matsoho
o tla futsaneha,
athe matsoho a khothetseng
a ruisa mong'a 'ona.
5Ea bokellang lijo hlabula
ke ngoana ea bohlale,
ea robalang ha ho kotuloa
o hlabisa lihlong.
6Mahlohonolo a aparela ba lokileng,
polelo tsa ea khopo
li koetlile bosōrō.
7Ho hopoloa ha mofu ea lokileng
ho lehlohonolo,
empa bitso la ea khopo
le ke ke la hopoloa.
8Ea bohlale
o tla mamela molao pelong ea hae,
sethoto se bèbèrang
sona se tla timela.
9Motho oa 'nete
o tsamaea a sireletsehile,
ea se nang 'nete eena o tla senoloa.
10Ea iphapanyetsang phoso
o baka moferefere,
sethoto se bèbèrang
sona se tla timela.
11Polelo tsa ea lokileng
ke liba sa bophelo,
athe tsa ea khopo
tsona li koetlile bosōrō.
12Lehloeo le fehla moferefere,
athe lerato lona
le iphapanyetsa liphoso tsohle.
13Bohlale bo fumanoa lipolelong
tsa ea nang le kutloisiso,
empa thupa e khalema
ea se nang kutloisiso.
14Ba bohlale ba ipokellela tsebo,
empa polelo tsa sethoto
li isa timelong.
15Morui o tšepile maruo a hae,
mofutsana o timetsoa
ke bofuma ba hae.
16Mesebetsi ea ba lokileng
e ba tlisetsa bophelo,
empa ea ba khopo
e ba hulela sebeng.
17Ea mamelang ha a khalengoa
o tseleng ea bophelo,
empa ea sa mameleng,
eena oa kheloha.
18Ea patang lehloeo ke mothetsi,
ea sebang ba bang, eena ke sethoto.
19Ea buang haholo
sebe se teng polelong tsa hae,
ea sa bua-bueng
eena ke motho ea bohlale.
20Polelo tsa ea lokileng
ke silefera e hloekisitsoeng,
pelo ea ea khopo ha e na thuso.
21Polelo tsa ba lokileng
li ruta ba bangata,
thoto tsona li shoa
ke ho hloka kutloisiso.
22Hlohonolo la Morena
le entša motho,
ha ho masoabi ao le a tlisang.
23Sethoto se thabela ho etsa bobe,
ea nang le kutloisiso
o thabela bohlale.
24Se tšajoang ke ea khopo
se tla mo oela holimo,
empa takatso ea ea lokileng
e tla phethahatsoa.
25Sefefo se sheshena ea khopo
se ee le eena,
mothèo oa e lokileng
o hlola kamehla eohle.
26Joalokaha asene
e thellisa meno a motho,
mosi le oona o llisa mahlo a motho,
sekhōba se joalo ho ba se rōmang.
27Ho tšaba Morena
ho lelefatsa phelo ba motho,
empa lemo tsa ba khopo
li tla khutsufatsoa.
28Letšepa la ba lokileng
le hlahisa thabo,
athe la ba khopo lona lea nyamela.
29Tsela ea Morena
ke tšabelo sa ba lokileng,
empa ba khopo bona ea ba timetsa.
30Ea lokileng a ke ke a sisinyeha,
empa ba khopo
ba tla fela lefatšeng.
31Molomong oa ea lokileng
ho tsoa bohlale,
leme le khopameng le tla pōngoa.
32Ea lokileng
o bua puo tse thabisang,
athe ea khopo
o tseba ho sokamisa litaba.
