Ho loka ha sebele
1Joale, bana beso, ke re: Thabang ka ho ba ho Morena. Ha ke tsoafe ho pheta seo ke ileng ka le ngolla sona, etsoe hona ho tla etsa hore le se tsebisise.
2Hlokomelang lintja tseno, hlokomelang bano ba etsang bokhopo, hlokomelang bano ba lebōllo le se nang thuso. 3Ba lebōllo la 'nete ke rōna, ba rapelang Molimo ka moea, ba ithorisang ka Jesu Kreste. Ha rea tšepa tsa botho. 4Le 'na ke ne nka tšepa tsa botho.
Haeba e mong a hopola hore a ka li tšepa, e ne e ka ba 'na oa pele. 5Ke ile ka bōlōtsoa ha ke le matsatsi a robeli. Ke Moiseraele ka tsoalo, oa lelōko la Benjamine, ke Moheberu oa 'makhonthe. Ka nqeng ea Molao ke Mofarisi; 6ka nqeng ea cheseho ke ne ke le mohlorisi oa kereke; ka nqeng ea ho loka ho tsoang Molaong, ha ke nyatsehe.
7Empa tsohle tseo ke neng ke li talima e le phaello, joale ke li nka e le tahlehelo, ka baka la Kreste. 8Ho feta mona ke nka tsohle e le tahlehelo, ha ke li bapisa le seo e leng sa bohlokoa, e leng ho tseba Kreste Jesu, Morena oa ka. Ka baka la hae ke tetse tsohle, 'me ke li nka e le manyala, e le hore ke tle ke rue Kreste, 9ke be ntho e le 'ngoe le eena, e seng ka ho lōka ha ka ho tsoang Molaong, empa ka ho loka ho fumanoang ka tumelo ho Kreste. Ho loka hona ho tsoa ho Molimo, ho theiloe holim'a tumelo. 10Ke batla ho tseba Kreste feela, le matla a tsoho ea hae, ke be le kabelo mahlōkōng a hae, ka ho tšoana le eena lefung la hae, 11ka tšepo ea hore ke tla tsosoa bafung ho isoa bophelong.
Ho mathela pakaneng
12Hase ho re ke se ke fihletse tsena tsohle, kapa ke se ke phethehile, empa ke ntse ke hoatalletse ho li hapa, hobane le 'na Kreste Jesu a se a nkhapile. 13Bana beso, ha ke hopole hore ke se ke li hapile; ke etsa ntho e le 'ngoe feela, e leng ho lebala tseo ke seng ke li fetile, ke mpa ke hahamalla tse kapele. 14Ke mathela pakaneng ho hapa moputso oa pitso ea Molimo, e tsoang holimo, ka Kreste Jesu.
15Joale rōna ba seng ba phethehile, a re inahaneng joalo, 'me haeba ho e-na le moo le sa nahaneng ka ho tšoana, Molimo o tla le senolela. 16Leha ho le joalo, a re tsoeleng pele ka seo re seng re se fihletse.
17Bana beso, bohle le nketsise. Ke le beetse mohlala, kahoo inkeleng oona ho ba o latelang. 18Joalokaha ke le boleletse ka makhetlo, ke boetse ke pheta hape ka likhapha, ke re: Ba bangata ba se ba phela e le lira tsa sefapano sa Kreste. 19Qetello ea bona e tla ba timelo, molimo oa bona ke lijo, ba ithorisa ka tsa bona tse lihlong, ba ikhopolela tsa lefatše lena. 20Ha e le rōna ha habo rōna ke leholimong, moo re lebeletseng Mopholosi oa rōna ho tsoa teng, e leng Morena oa rōna Jesu Kreste. 21O tla fetola 'mele ea rōna e nyelisehang, hore e tšoane le 'mele oa hae o tlōtlehang, ka matla ao a nang le 'ona a ho bea tsohle tlas'a hae.
