LIPALO 31

₁Morena a bua ho Moshe, a re:

₂“Phetetsa bana ba Iseraele ho Bamidiane; kamorao ho moo u tla orosetsoa sechabeng sa heno.”

₃Eaba Moshe o bua ho sechaba, o re: “Hlomellang bahlabani ba lōna ba ee ntoeng, ba futuhele Bamidiane ho phethahatsoe boiphetetso ba Morena ho Bamidiane. ₄Le tla ntša banna ba sekete morabeng o mong le o mong oa merabe eohle ea Iseraele, hore ba ee ntoeng.”

₅Kahoo ha ntšoa likete tsa Baiseraele, sekete morabeng o mong le o mong, 'me ea e-ba leshome le metso e 'meli la likete tsa ba hlomeletseng ntoa. ₆Moshe a ba rōmela ntoeng, e le sekete sa ba tsoang morabeng o mong le o mong; bona le Finiase mora oa moprista Eleasare a ba rōmela ntoeng, Finiase a nkile lijana tsa Sehalalelo le literompeta tse hlabang mokhosi.

₇Ba futuhela Bamidiane joalokaha Morena a ne a laetse Moshe, 'me ba bolaea bohle ba batona. ₈Har'a ba bolailoeng, likhosi tsa Bamidiane tse bolailoeng e ne e le Efi, le Rekeme, le Sure, le Hure, le Reba, e leng likhosi tsa hlano tsa Bamidiane. Le Bileame, mora oa Beore, ba 'molaea ka sabole. ₉Bana ba Iseraele ba hapa basali ba Bamidiane le bana ba bona ba banyenyane; le likhomo tsa bona tsohle, le mehlape ea bona eohle, le thepa ea bona eohle ba e hapa. ₁₀Le metse ea bona eohle eo ba ahileng ho eona, le liahelo tsa bona tsohle ba li chesa ka mollo. ₁₁Ba nka thepa eohle, le khapo eohle ea batho, le ea liphoofolo. ₁₂Joale ba tlisetsa Moshe, le moprista Eleasare, le sechaba sohle sa bana ba Iseraele, bathōpuoa, le khapo, le thepa liahelong, liphuleng tsa Moabe, pel'a Jorodane, mabapa le Jeriko.

₁₃Bo-Moshe le moprista Eleasare, le mahosana 'ohle a sechaba, ba tsoa ho khahlanyetsa mabōtho kathōko ho liahelo. ₁₄Moshe a halefela baokameli ba mabōtho 'ohle, e leng balaoli ba ba likete, le balaoli ba ba makholo, ba neng ba e-tsoa ntoeng.

₁₅Moshe a re ho bona: “Na le tlohetse basali bohle hore ba phele? ₁₆Bonang, ke bona ba entseng hore bana ba Iseraele, ka keletso ea Bileame, ba siteloe Morena, ka taba eane ea Peore, 'me seoa sa oela sechaba sa Morena holimo. ₁₇Ka baka leo he, bolaeang ngoana e mong le e mong e motona; le mosali e mong le e mong ea kileng a robala le monna. ₁₈Empa baroetsana bohle ba e-s'ong ho robale le monna le ipōlōkele bona.

₁₉“Mang kapa mang ea bolaileng motho, le mang kapa mang ea amileng setōpō, o tla lula kantle ho liahelo ka matsatsi a supileng. Ka letsatsi la boraro, le ka letsatsi la bosupa, lōna, le bathōphuoa ba lōna, le tla itlhoekisa. ₂₀Seaparo se seng le se seng, le ntho e 'ngoe le e 'ngoe e entsoeng ka letlalo, le phahlo e 'ngoe le e 'ngoe e entsoeng ka boea ba lipōli, le ntho e 'ngoe le e 'ngoe e entsoeng ka lehong, tsena tsohle le tla li hloekisa.”

₂₁Eaba moprista Eleasare o re ho bahlabani ba tsoang ntoeng: “Ena ke taelo ea molao, eo Morena a e laetseng Moshe: ₂₂Khauta, le silefera, le lethose, le tšepe, le lekapa, le loto; ₂₃le ntho e 'ngoe le e 'ngoe e ke keng ea senngoa ke mollo, tsena tsohle le tla li chesa mollong, 'me li tla hloeka; le be le li hloekise ka metsi a tlhoekiso. Tsohle tse ke keng tsa chesoa mollong le tla li kenya metsing. ₂₄Ka letsatsi la bosupa le tla hlatsoa liaparo tsa lōna, 'me le tla hloeka; kamorao ho moo le tla kena liahelong.”

₂₅Morena a bua ho Moshe, a re: ₂₆“Uena, le moprista Eleasare, le lihlooho tsa malapa a sechaba, balang khapo eo le e fumaneng, ea batho le ea liphoofolo. ₂₇Le arole khapo eo likoto tse peli, le e abele bahlabani ba tsoang ntoeng, le abele le sechaba sohle. ₂₈Bahlabani ba tsoang ntoeng ba ntšetse Morena seabo. Holim'a bathōpuoa ba makholo a mahlano ba ntše a le mong; le pholo e le 'ngoe, le tonki e le 'ngoe, le nku e le 'ngoe, holim'a tse makholo a mahlano. ₂₉U li nke sekotong seo ba se abetsoeng, u li nee moprista Eleasare, e be nyehelo e akhōletsoang Morena. ₃₀Sekotong se abetsoeng bana ba Iseraele u tla nka motho a le mong holim'a bathōpuoa ba mashome a mahlano; le pholo e le 'ngoe, le tonki e le 'ngoe, le nku e le 'ngoe, holim'a liphoofolo tsohle tse mashome a mahlano, 'me u li nee Balevi ba sebeletsang ka Tenteng ea Morena.” ₃₁Bo-Moshe le moprista Eleasare ba etsa kamoo Morena a neng a laetse Moshe kateng.

₃₂Khapo ea tse phelang, tse hapiloeng, ho sa baloe thepa e nkiloeng ke bahlabani, e ne e le linku tse likete tse makholo a tšeletseng, le mashome a supileng a metso e mehlano; ₃₃le likhomo tse likete tse mashome a supileng a metso e 'meli; ₃₄le litonki tse likete tse mashome a tšeletseng a motso o mong; ₃₅le batho ba likete tse mashome a mararo a metso e 'meli, e le baroetsana ba e-s'ong ho robale le monna.

₃₆Sekoto sa bobeli, seo e neng e le sa bahlabani, e ne e le linku tse likete tse makholo a mararo le mashome a mararo a metso e supileng, le makholo a mahlano. ₃₇Seabo sa Morena e ne e le linku tse makholo a tšeletseng le mashome a supileng a metso e mehlano. ₃₈Likhomo e ne e le likete tse mashome a mararo le metso e tšeletseng, 'me ho tsona seabo sa Morena e le mashome a supileng a metso e 'meli. ₃₉Litonki e ne e le likete tse mashome a mararo le makholo a mahlano, 'me ho tsona seabo sa Morena e le mashome a tšeletseng a motso o mong. ₄₀Batho e ne e le likete tse leshome le metso e tšeletseng, 'me ho bona seabo sa Morena e le batho ba mashome a mararo a metso e 'meli.

₄₁Moshe a nea moprista Eleasare seabo seo sa Morena, joalokaha Morena a ne a laetse Moshe.

₄₂Sekoto se abetsoeng bana ba Iseraele, seo Moshe a ileng a se arola ho sa bahlabani ba tsoang ntoeng, ₄₃e leng sekoto se abetsoeng sechaba, e ne e le linku tse likete tse makholo a mararo le mashome a mararo a metso e supileng le makholo a mahlano; ₄₄le likhomo tse likete tse mashome a mararo a metso e tšeletseng; ₄₅le litonki tse likete tse mashome a mararo le makholo a mahlano; ₄₆le batho ba likete tse leshome le metso e tšeletseng. ₄₇Sekotong se abetsoeng bana ba Iseraele, Moshe a nka motho a le mong holim'a ba mashome a mahlano, le phoofolo e le 'ngoe holim'a tse mashome a mahlano, a li nea Balevi ba neng ba sebeletsa ka Tenteng ea Morena, joalokaha Morena a ne a laetse Moshe.

₄₈Joale baokameli ba mabōtho 'ohle, e leng balaoli ba ba likete, le balaoli ba ba makholo, ba atamela ho Moshe, ₄₉ba re ho eena: “Rōna, bahlanka ba hao, re balile bahlabani ba taolong ea rōna, 'me ha ho le ea mong oa rōna ea sieo. ₅₀Re tlisitse linyehelo tsa Morena, tseo e mong le e mong a li fumaneng, tsa lintho tse entsoeng ka khauta: lithōthō tsa maqaqailana, le lipetja, le lireng, le masale, le meqhalaphofo, ho tla iketsetsa tefelo ea sebe kapele ho Morena.”

₅₁Bo-Moshe le moprista Eleasare ba amohela khauta ea bona e entseng mekhabiso eo eohle. ₅₂Khauta eohle ea nyehelo e akhōtsoang, eo ba nyehellang Morena ka eona, e leng e tsoang ho balaoli ba ba likete, le ho balaoli ba ba makholo, e ne e etsa boima ba likilo tse ka bang makholo a mabeli. ₅₃Mohlabani e mong le e mong o ne a inketse khapo. ₅₄Bo-Moshe le moprista Eleasare ba amohela khauta ea balaoli ba ba likete, le ea balaoli ba ba makholo, ba e kenya ka Tenteng ea Morena, e le hore bana ba Iseraele ba 'ne ba hopole Morena.