LIPALO 28

₁Morena a bua ho Moshe, a re: ₂“Laela bana ba Iseraele, 'me u re ho bona: ‘Le hlokomele hore ka linako tse beiloeng le nketsetse nyehelo ea ka ea secheso sa lijo, e le nyehelo e monko o monate, e amohelehang.’

₃“U re ho bona: ‘Ena ke nyehelo ea secheso, eo le tla nyehella Morena ka eona: likonyana tse tona, tse nang le selemo, tse se nang sepha, li be peli ka letsatsi le leng le le leng, e be nyehelo ea kamehla ea secheso. ₄U tla nyehela ka konyana e le 'ngoe hoseng, konyana ea bobeli u nyehele ka eona ka phirimana. ₅Le kilo e le 'ngoe ea phofo e thumisehileng, e lubiloeng ka lethara e le 'ngoe ea ole ea mohloaare o tutsoeng, e le nyehelo ea lijo. ₆Sena ke sehlabelo sa kamehla sa secheso, se ileng sa hlongoa thabeng ea Sinai, e le neyehelo ea secheso, e monko o monate, e etsetsoang Morena. ₇Nyehelo ea seno e tsamaeang le konyana ea pele e tla ba lethara e le 'ngoe ea veine e bohale, tseo u tla li qhatsetsa Morena ka Sehalalelong. ₈Konyana ea bobeli u tla nyehela ka eona ka phirimana, u nyehele ka eona le ka nyehelo ea seno e tsamaeang le eona, e le nyehelo ea secheso e monko o monate, e amohelehang ho Morena.

₉“ ‘Ka letsatsi la Sabatha u tla nyehela ka likonyana tse peli tse tona, se nang le selemo, tse se nang sepha, le ka likilo tse peli tsa phofo e thumisehileng, e lubiloeng ka ole, le ka nyehelo ea seno e tsamaeang le tsona. ₁₀Ena ke nyehelo ea secheso ea Sabatha se seng le se seng, e eketsang nyehelo ea kamehla ea secheso, le nyehelo ea seno e tsamaeang le eona.

₁₁“ ‘Ka letsatsi la pele la khoeli e 'ngoe le e 'ngoe u tla nyehella Morena ka nyehelo ea secheso, e be lipohoana tse peli, le pheleu e le 'ngoe, le likonyana tse tona tse supileng, tse se nang sepha. ₁₂Le ka likilo tse tharo tsa phofo e thumisehiling, e lubiloeng ka ole, e le nyehelo e tsamaeang le pohoana e 'ngoe le e 'ngoe; le ka likilo tse peli tsa phofo e thumisehileng, e lubiloeng ka ole, e le nyehelo ea lijo e tsamaeang le pheleu e 'ngoe le e 'ngoe. ₁₃Le ka kilo e le 'ngoe ea phofo e thumisehileng, e lubiloeng ka ole, bakeng sa konyana e 'ngoe le e 'ngoe e le nyehelo ea secheso e monko o monate, e amohelehang ho Morena. ₁₄Linyehelo tsa lino tse tsamaeang le tsona e tla ba lilethara tse peli tsa veine bakeng sa pohoana e 'ngoe le e 'ngoe, le lethara e le 'ngoe le halofo bakeng sa pheleu e 'ngoe le e 'ngoe, le lethara e le 'ngoe bakeng sa konyana e 'ngoe le e 'ngoe. Ena ke nyehelo ea secheso ea khoeli e 'ngoe le e 'ngoe ea likhoeli tsa selemo. ₁₅Ho tla nyehelloa Morena ka phooko ea nyehelo e tlosang sebe, 'me ho nyeheloa ka tsona e le tse eketsang nyehelo ea kamehla ea secheso, le nyehelo ea seno e tsamaeang le eona.

₁₆“ ‘Ka letsatsi la leshome le metso e mene la khoeli ea pele ke Paseka ea Morena. ₁₇Ka letsatsi la leshome le metso e mehlano la eona khoeli ena ke mokete; ka matsatsi a supileng ho tla jeoa bohobe bo sa lomosoang. ₁₈Ka letsatsi la pele ho tla ba le phutheho e halalelang; le se ke la sebetsa mosebetsi ofe kapa ofe. ₁₉Le tla etsa nyehelo ka mollo, e leng nyehelo ea secheso e etsetsoang Morena, e be lipohoana tse peli, le pheleu e le 'ngoe, le likonyana tse tona tse supileng, tse se nang sepha, tse nang le selemo. ₂₀Nyehelo ea lijo e tsamaeang le tsona e tla ba likilo tse tharo tsa phofo e thumisehileng, e lubiloeng ka ole, e le nyehelo e tsamaeang le pohoana e 'ngoe le e 'ngoe; le likilo tse peli, e le nyehelo e tsamaeang le pheleu. ₂₁Nyehelo ea konyana e 'ngoe le e 'ngoe ea likonyana tse supileng e tla ba kilo e le 'ngoe. ₂₂U nyehele ka phooko e le 'ngoe ho iketsetsa tefelo ea sebe. ₂₃Linyehelo tsena e tla ba tse eketsang nyehelo ea kamehla ea secheso. ₂₄U tla etsa linyehelo tse joaloka tsena ka letsatsi le leng le le leng la matsatsi a supileng, e le linyehelo tsa lijo, tse eketsang nyehelo ea kamehla ea secheso, le nyehelo ea seno e tsamaeang le eona. ₂₅Ka letsatsi la bosupa ho tla ba le phutheho e halalelang, 'me le se ke la sebetsa mosebetsi ofe kapa ofe.

₂₆“ ‘Ka letsatsi la lilopotsiea, ha le nyehella Morena ka nyehelo ea lijo tse ncha, moketeng oa lōna oa libeke, ho tla ba le phutheho e halalelang, 'me le se ke la sebetsa mosebetsi ofe kapa ofe. ₂₇Le tla nyehela ka nyehelo ea secheso, e monko o monate, e amohelehang ho Morena, e be lipohoana tse peli, le pheleu e le 'ngoe, le likonyana tse tona tse supileng, tse nang le selemo. ₂₈Nyehelo ea lijo e tsamaeang le tsona e tla ba phofo e thumisehileng, e lubiloeng ka ole; e be likolo tse tharo bakeng sa pheleu e le 'ngoe; ₂₉le kilo e le 'ngoe bakeng sa konyana e 'ngoe le e 'ngoe ea likonyana tsena tse supileng. ₃₀Ka phooko e le 'ngoe u iketsetse tefelo ea sebe. ₃₁Linyehelo tsena e tla ba tse eketsang nyehelo ea kamehla ea secheso, le nyehelo ea lijo e tsamaeang le eona, 'me u tla nyehela ka tsona, hammoho le nyehelo ea seno e tsamaeang le tsona, li se na sepha.