Barali le bona ke majalefa
1Joale ha atamela barali ba Selofehade, mora oa Hefere, mora oa Gileade, mora oa Mikiri, mora oa Manase, ba morabe oa Manase, mora oa Josefa. Ana ke mabitso a barali bao: Mahela, le Nōoa, le Hogela, le Mileka, le Tiresa. 2Ba ema kapele ho Moshe, le kapele ho moprista Eleasare, le kapele ho mahosana, le kapele ho sechaba sohle, monyakong oa Tente ea Morena, 'me ba re: 3“Ntat'a rōna o ile a shoella lehoatateng. O ne a se sehlopheng sa ba neng ba ikopantse, ba loantša Morena, e leng ba sehlopha sa Kora. Empa o ile a shoa ka baka la sebe sa hae. O ne a se na bara. 4Ke hobane'ng lebitso la ntat'a rōna le ntšoang har'a ba lelapa? Na ke hobane a se na mora? Re neeng lefa joaloka bana babo ntat'a rōna.”
5Moshe a bea taba ea bona kapele ho Morena. 6Morena a bua ho Moshe, a re: 7“Barali ba Selofehade ba nepile. Ba nee lefa joaloka bana babo ntat'a bona; etsa hore lefa la ntat'a bona e be la bona.
8“U bue ho bana ba Iseraele, u re: ‘Ha monna a e-shoa a se na mora, lefa la hae u tla le abela morali oa hae. 9Haeba monna eo a se na morali, lefa la hae u le abele bana babo. 10Haeba a se na bana babo, lefa la hae u le abele bana babo ntat'ae. 11Haeba ntat'ae a se na bana babo, lefa la hae u le abele mong ka eena, ea haufi le eena ka tsoalano, hore a le je. Ona e tla ba molao oa tōka ho bana ba Iseraele, joalokaha Morena a laetse Moshe.’ ”
Joshua o khetheloa ho hlahlama Moshe
12Morena a re ho Moshe: “Hloella thabeng ena ea Abarime, 'me u talime naha eo ke e neileng bana ba Iseraele. 13Kamora' hoba u e bone, le uena u tla orosetsoa sechabeng sa heno, joaloka moholoane oa hao Arone, 14hobane ha sechaba se ne se belaela ka 'na, bobeli ba lōna le ile la mphetohela ha le le lehoatateng la Sine, la hana ho bonahatsa ho halalela ha ka ka metsi, moo sechaba se ntseng se bona.” Metsi ana ke metsi a Meriba e Kadeshe, lehoatateng la Sine.
15Moshe a bua ho Morena, a re: 16“Morena Molimo oa meea eohle, le oa batho bohle, a ke a khethele sechaba sena monna, 17ea tla se etella pele, ea tla tsoa le sona, ea tla khutla le sona, e le hore sechaba sa Morena se se ke sa ba joaloka linku tse hlokang molisa.”
18Morena a re ho Moshe: “Nka Joshua, mora oa Nune, monna ea nang le Moea oa ka, u 'mee matsoho, 19u mo ise kapele ho moprista Eleasare, le kapele ho sechaba sohle, u mo nee litaelo moo se ntseng se bona. 20U mo abele a mang a matla a hao, e le hore sechaba sohle sa bana ba Iseraele se tle se mo mamele. 21O tla ema kapele ho moprista Eleasare, eena a 'motsetse liqeto tsa Morena, ka ho sebelisa lejoe la Urime. Ka taelo ea Joshua bana bohle ba Iseraele ba tla tsoa, 'me ba tla khutla ba e-na le eena, le sechaba sohle.”
22Moshe a etsa joalokaha Morena a mo laetse. A tlisa Joshua kapele ho moprista Eleasare, le kapele ho sechaba sohle, 23a 'mea matsoho, a mo laea, joalokaha Morena a boleletse Moshe.
