Metsi a Meriba
1Ka khoeli ea pele sechaba sohle sa bana ba Iseraele sa fihla lehoatateng la Sine, 'me sechaba sa emisa Kadeshe. Meriama a shoella hona moo, a ba a epeloa hona teng.
2Sechaba se ne se hloka metsi, 'me sa ikopanya ho loantša Moshe le Arone. 3Sechaba sa loantsa Moshe, sa bua, sa re: “Hoja le rōna re hlile ra ichoella ha bana babo rōna ba e-shoa kapele ho Morena! 4Ke hobane'ng ha u tlisitse sechaba see sa Morena lehoatateng lee, hore re tl'o shoela teng, rōna le liphoofolo tsa rōna? 5Ke hobane'ng ha u re ntšitse Egepeta, ua re tlisa sebakeng se sebe see? Ke sebaka se ke keng sa lengoa, ha se na lifeiee, kapa morara, kapa likharenate; ebile ha ho na le metsi a ka nooang!”
6Bo-Moshe le Arone ba tloba sechabeng, ba ea monyakong oa Tente ea Morena. Ba itihela fatše ka lifahleho, 'me tlōtla ea Morena ea iponahatsa ho bona. 7Morena a bua ho Moshe, a re: 8“Nka molamu ona, 'me u bōkanye sechaba, uena le moholoane oa hao Arone. Moo se ntseng se bona, u laele lefika lena hore le kolle metsi. U tla etsa hore lefika le kolle metsi, sechaba sohle, le liphoofolo tsa sona, se tle se noe.”
9Moshe a nka molamu o neng o le kapele ho Morena, joalokaha Morena a ne a mo laetse. 10Moshe le Arone ba bōkanya sechaba sohle kapele ho lefika, 'me a re ho sona: “Mamelang joale, mahlabaphieo ting! Re le ntšetse metsi lefikeng lee?” 11Eaba Moshe o phahamisa letsoho la hae, 'me ka molamu oa hae a otla lefika habeli. Metsi a phorosela a le mangata, 'me sechaba sa e-noa, le liphoofolo tsa sona tsa e-noa.
Kotlo ea Moshe le Arone
12Joale Morena a re ho Moshe, le ho Arone: “Kahobane ha lea ka la lumela ho nkhalaletsa moo bana ba Iseraele ba ntseng ba bona, ka baka lena le ke ke la fihlisa sechaba sena naheng eo ke se neileng eona.”
13Ana ke 'ona metsi a Meriba, moo bana ba Iseraele ba ileng ba loantša Morena, 'me Morena a iponahatsa hore oa halalela.
Iseraele le Edomo
14Moshe, a sa le Kadeshe, a rōmela maqosa ho khosi ea Edomo, a re:
“Ngoan'eno, Iseraele, o re: ‘U tseba litsietsi tsohle tse ileng tsa re hlahela. 15Bo-ntat'a rōna ba ne ba theohele Egepeta, 'me ra phela teng nako e telele. Baegepeta ba ile ba re tuba, ba tuba le bo-ntat'a rōna. 16Re ile ra ipiletsa ho Morena. Morena o ile a re utloa, 'me a rōmela lengeloi, a re ntša Egepeta.
“ ‘Joale re mona Kadeshe, e leng motseng o meeling ea naha ea hao. 17Re kōpa hore u re lumelle re fete har'a naha ea hao. Re ke ke ra tsamaea har'a masimo, kapa har'a lirapa tsa morara; re ke ke ra noa le metsi a liliba. Re tla itsamaela feela 'mileng o moholo oa khosi; re ke ke ra thinyetsa ka ho le letona kapa ka ho le letšehali, ho fihlela re e-tsoa meeling ea hao.’ ”
18Edomo a re ho eena: “Le ke ke la feta har'a naha ea ka, esere ka le futuhela ka sabole.”
19Bana ba Iseraele ba re ho eena: “Re tla itsamaela feela 'mileng o moholo. Haeba re ka noa metsi a hao, rōna le liphoofolo tsa rōna, re tla a lefa. Re ikōpela ho feta ka tsela feela.”
20Edomo a re: “Le ke ke la feta!” Edomo a tsoa motseng, a ba futuhela ka banna ba bangata, ka sekhahla se seholo. 21Ka mokhoa o joalo, Edomo a hanela Iseraele ho feta har'a naha ea hae, 'me Iseraele a mo pota kathōko.
Lefu la Arone
22Sechaba sohle sa bana ba Iseraele sa tloha Kadeshe, sa fihla thabeng ea Hore. 23Morena a bua ho Moshe le ho Arone, ba le thabeng ea Hore, pel'a moeli oa naha ea Edomo, a re: 24“Arone o se a tla orosetsoa sechabeng sa habo, hobane a ke ke a fihla naheng eo ke e neileng bana ba Iseraele, kaha le ile la fetohela taelo ea ka ha le le metsing a Meriba. 25Nka Arone le mora oa hae Eleasare, u ba nyollele thabeng ea Hore. 26Ha u fihla teng u hlobolise Arone liaparo tsa hae, u li apese Eleasare, mora oa hae. Arone eena o tla orosoa, a shoelle hona moo.”
27Moshe a etsa joalokaha Morena a ne a mo laetse. Moo sechaba sohle se ntseng se bona, ba nyolohela thabeng ea Hore. 28Moshe a hlobolisa Arone liaparo tsa hae, a li apesa Eleasare, mora oa hae. Arone a shoella hona moo holim'a thaba. Joale Moshe le Eleasare ba theoha thabeng. 29Ha sechaba sohle se bona hore Arone o shoele, malapa 'ohle a Iseraele a llela Arone ka matsatsi a mashome a mararo.
