LIPALO 17

₁Morena a bua ho Moshe, a re:

₂“Bua le bana ba Iseraele, 'me u nke molamu o le mong lapeng le leng le le leng la bo-ntat'a bona, le ho mahosana 'ohle a bona, ho ea ka malapa a bo-ntat'a bona. E be melamu e leshome le metso e 'meli, u ngole lebitso la monna e mong le e mong holim'a molamu oa hae. ₃Lebitso la Arone lona u le ngole holim'a molamu oa Levi. Mookameli e mong le e mong oa lelapa la bo-ntat'ae a be le molamu o le mong. ₄Melamu ena u e bee ka Tenteng ea Morena, kapele ho areka ea selekane, e leng moo ke kopanang le uena teng. ₅Monna eo ke tla khetha molamu oa hae, molamu oo oa hae o tla fuputsa, o etse lithunthung. Kahoo ke tla felisa ho korotla ha bana ba Iseraele, e le hore ba se ke ba u loantša.”

₆Moshe a bua le bana ba Iseraele, 'me mahosana 'ohle a bona a mo nea melamu ea 'ona; khosana kanngoe molamu o le mong, ho ea ka malapa a bo-ntat'a bona. E ne e le melamu e leshome le metso e 'meli. Molamu oa Arone o ne o le teng kahar'a melamu ea bona. ₇Moshe a bea melamu ena kapele ho Morena, ka Tenteng ea Morena e kentseng areka ea selekane.

₈Hosasane ha Moshe a kena ka Tenteng ea Morena e kentseng areka e selekane, molamu oa Arone, o bakeng sa 'ntlo ea Levi, oa fuputsa, oa etsa lithunthung, oa beha litholoana tse butsitsoeng, tse kang tsa sefate sa perekisi. ₉Moshe a tlisa melamu eohle e tsoang kapele ho Morena, a e bea kapele ho sechaba sohle sa bana ba Iseraele, 'me sa e talima. Monna e mong le e mong a nka molamu oa hae.

₁₀Morena a re ho Moshe: “Khutlisetsa molamu oa Arone kapele ho matlapa a ngotsoeng Molao, molamu oo o bōlōkoe e le khopotso ea bokoenehi ba bana ba Iseraele, le ho felisa ho nkorotlela ha bona, e le hore ba se ke ba e-shoa.” ₁₁Moshe a etsa joalo. A etsa joalokaha Morena a ne a mo laetse.

₁₂Bana ba Iseraele ba bua, ba re ho Moshe: “Bonang rea shoa! Re felile! Bohle re felile! ₁₃E mong le e mong ea atamelang, ea atamelang Tente ea Morena, o tla shoa! Na bohle re fela re tla shoa?”