Nehemia oa reroa
1Joale bo-Sanebalate, le Tobiea, le Gashemu oa Moarabia, le ba bang ba lira tsa rōna, ba utloela hore ke se ke hahile lerako, le hore ha le sa na likheo, le hoja ka nako eo menyako e ne e e-s'o kenngoe mamati. 2Bo-Sanebalate le Gashemu ba nthōmella molaetsa o reng: “Tloo, re tl'o kopana le uena motsaneng o mong oa e phuleng ea Ono.” Empa ba ne ba rerile ho ntlhahisa kotsi.
3Ka ba rōmela maqosa, ka re: “Mosebetsi oa ka o mongata haholo, ka hona ke sitoa ho tla. Ke ka baka lefe ho ka emisoang mosebetsi, ha 'na ke o tlohela, ke theohela ho lōna moo?” 4Ka makhetlo a mane ba 'na ba nthōmella molaetsa ka mokhoa oona ona. Le 'na ka 'na ka ba araba ka mokhoa o tšoanang le oona ona.
5Ka lekhetlo la bohlano Sanebalate a rōma mohlanka oa hae ho ntlisetsa molaetsa o tšoanang le melaetsa ea pele, ka lengolo le sa koaloang. 6Lengolong leo ho ne ho ngotsoe, ho thoe: “Ho ntse ho bueha har'a balichaba mona, 'me le Gashemu o re ke 'nete, hore lōna 'moho le Bajuda, le ntse le rera ho fetohela 'muso. Ke ka lebaka lena le tsosang lerako, e le hore uena u tle u be khosi ea bona, ho latela lipolelo tsena. 7U s'u bile u khethile baporofeta hore ba phatlalatse morero ona oa hao Jerusalema, 'me ba re: ‘Khosi e teng naheng ea Juda.’ Lipolelo tsena li tla fihla tsebeng tsa khosi; ka baka lena, tloo, re tl'o buisana ka taba ena.”
8Eaba ke mo rōmela molaetsa o reng: “Lintho tsena tseo u buang ka tsona ha li eo; ke uena ea iqapelang tsona.”
9Bohle ba ne ba leka ho re tšōsa, ba re: “Ba tla khathala matla, ba nyehlise, 'me mosebetsi o ke ke oa hlola o fela!”
Empa ka rapela, ka re: “Oho, Molimo, ak'u 'matlafatse!”
10Kamora' mona ka ea tlung ea Shemaea, mora oa Delaea, setlōhōlō sa Mehetabela, ea neng a koaletsoe ka tlung, 'me eena a re: “A re e'o kopana ka Tempeleng ea Molimo, re ikoalle kateng, hobane ba tla tla ho tla u bolaea. Ba tla tla bosiu ho tla u bolaea.”
11Empa ka re: “Motho ea kang 'na ke oa ho baleha? Ke mang ea kang 'na, ea ka balehelang ka Tempeleng, ho ipholosa? Nke ke ka ea!”
12Ke ne ke ile ka hlokomela hore ha a ea rongoa ke Molimo, empa o ne a nketsetsa boporofeta bona, hobane a ne a hiriloe ke Tobiea le Sanebalate. 13Ka baka lena, o ne a hiriloe hore a ntšose, 'me ke etse kamoo a buang kateng, ke tle ke etse sebe, ba tle ba ntšenye lebitso. 14Eaba ke re: “Molimo oa ka, ak'u hopole Tobiea le Sanebalate, ka baka la mesebetsi ea bona; u hopole le Nōoadiea, moporofeta enoa oa mosali, le baporofeta ba bang, ba neng ba leka ho ntšosa.”
Lerako lea fela
15Ka letsatsi la mashome a mabeli a metso e mehlano la khoeli ea Loetse, ba qeta ho haha lerako. Le ne le nkile matsatsi a mashome a mahlano a metso e 'meli, le ntse le hahuoa. 16Ha lira tsa rōna tsohle li utloela taba ena, 'me le balichaba bohle ba re pota-potileng ba bona lintho tsena, ba soaba, hobane ba ne ba bone hore mosebetsi ona o entsoe ka thuso ea Molimo oa rōna.
17Ho feta mona, mehleng eo mahosana a Juda a ile a ngolla Tobiea mangolo a mangata, le mangolo a Tobiea a fihla ho mahosana ao. 18Ba bangata, ba naheng ea Juda, ba ne ba entse selekane le Tobiea, hobane e ne e le mokhoenyana oa Shekaniea, mora oa Arake. Mora oa hae, ea bitsoang Johane, o ne a nyetse morali oa Meshulame, mora oa Berekiea. 19Ba ba ba mpolella mesebetsi ea Tobiea e metle, 'me ba 'molella le lipolelo tsa ka. Tobiea a 'na a 'ngolla, ho leka ho ntšosa.
