Morero oa ho thibela khaho ea Tempele oa nyōpa
1Ha Sanebalate a utloa hore re tsosa lerako, a khōbōheloa, a halefa, a soma Bajuda. 2Eaba o bua le bana babo, le bahlabani ba lebōtho la Samaria, o re: “Bajuda baa ba fokolang, ba etsa'ng? Na ba rata ho tsosa lerako lee? Na ba batla ho etsa mahlabelo? Na mosebetsi oo ba tla o qeta ka letsatsi? Na ba tla tsetolla majoe a cheletseng qubung ee ea lesupi?”
3Tobiea oa Moamone, o ne a eme pel'a hae, 'me eena a re: “Lerakonyana lena la majoe, leo ba le hahang, ha phokojoe e ka hloella holim'a lona le ka heleha!”
4Eaba Nehemia o re: “Re utloe, Molimo oa rōna, hobane rea nyelisoa. Ak'u busetse thōhako ena holim'a bona, ba tlatlapuoe, ba isoe naheng ea balichaba e le bathōpuoa. 5U se ke ua ba tšoarela bokhopo ba bona, 'me u se ke ua lebala libe tsa bona, hobane ba u halefisitse kapele ho lihahi.”
6Eaba re ntse re haha lerako, la ba la fihla halofong ea bophahamo ba lona, hobane sechaba seo se ne se hlile se ikemiselitse ho haha.
7Ha bo-Sanebalate, le Tobiea, le Maarabia, le Baamone, le Baashedode, ba utloela hore marako a Jerusalema a ntse a tsosoa, le likheo li ntse li thijoa, ba halefa haholo. 8Ba rera ho futuhela Jerusalema, hore ba tsose moferefere. 9Ka baka la bona ra rapela Molimo oa rōna, ra lebela motšeare le bosiu.
10Baahi ba naha ea Juda ba re: “Batho ba hlekang ba felloa ke matla, empa uluulu e sa le ngata, hoo e re sitisang ho tsosa lerako.”
11Joale lira tsa rōna li ntse li re: “E tla re ba hlokomela, kapa ba bona, re be re se re ikakhetse kahar'a bona, re ba bolaea, re emisa mosebetsi ona.”
12E ile eare ha Bajuda ba neng ba ahile pel'a bona ba fihla, ba bua le rōna ka makhetlo a leshome, ba re: “Ba tla re futuhela ba e-tsoa libakeng tsohle.”
13Ka lebaka lena, ka bea batho kamora' lerako moo le sa leng tlase, ka ba bea ka malapa abo bona, ba tšoere lisabole tsa bona, le marumo a bona, le liqha tsa bona. 14Eaba kea qamaka, ke ema kapele ho mahosana, le kapele ho babusi, le kapele ho sechaba sohle, ke re: “Le se ke la ba tšaba. Hopolang Morena ea matla ea tšabehang, 'me le loanele bana babo lōna, le bara ba lōna, le barali ba lōna, le basali ba lōna, le matlo a lōna.”
15Ha lira tsa rōna li utloa hore re se re tseba morero oa tsona, le hore Molimo o nyōpisitse morero oo oa tsona, eaba rōna bohle re khutlela lerakong, motho ka mong a ba mosebetsing oa hae.
16Ho tloha mohlang oo, halofo ea bahlanka ba ka ea 'na ea sebetsa, empa halofo e 'ngoe eona ea lula e hlometse ka marumo, le ka lithèbè, le ka liqha, e apere liaparo tsa ntoa, tse entsoeng ka tšepe. Babusi ba ne ba eme kamora' sechaba sohle sa Juda, 17e leng se neng se haha lerako. Motho ka mong oa ba neng ba thōtha thepa, o ne a sebetsa ka letsoho le leng, ka le leng a tšoere lihlomo. 18Sehahi ka seng se ne se haha se ntse se leketlisitse sabole qhōlōng, 'me ea letsang lenaka la pheleu eena a eme pel'a ka.
19Eaba ke re ho mahosana, le ho babusi, le ho sechaba sohle: “Mosebetsi ona o moholo, o nametse hōle, 'me re se re qaqōlōhane haholo, ho ea le lerako lena. 20Kae kapa kae, moo le tla utloa lenaka le lla teng, le bōkanele hona teng ho rōna, 'me Molimo oa rōna o tla re loanela!”
21Eaba re ntse re sebetsa, 'me halofo e 'ngoe ea bona e tšoere marumo ho tloha hoseng, ho fihlela ha linaleli li hlaha. 22Ka eona nako eo ka re ho sechaba: “Motho ka mong, le mohlanka oa hae, ba hlole Jerusalema, e le hore ba tle ba re lebele bosiu, 'me motšeare ba sebetse.” 23Ha e le 'na, bana beso, le bahlanka ba ka, le banna ba balebeli, ba neng ba e-na le 'na, ha ho le ea mong oa rōna ea kileng a hlōbōla liaparo tsa hae. Motho ka mong o ne a tšoere lihlomo tsa hae, esita leha a il'o kha metsi.
