NEHEMIA 3

₁Bo-Eleashibe, Moprista e Moholo, le bana babo, e leng baprista, ba haha Monyako oa Linku. Ba o halaletsa, 'me ba kenya le mamati a oona. Ba o hlohonolofatsa ho tloha Toreng ea Mea, ho ea fihla Toreng ea Hananele. ₂Banna ba Jeriko ba haha ba bapile le bo-Eleashibe; Sakure, mora oa Imeri, eena a haha a bapile le banna ba Jeriko. ₃Bara ba Hasena bona ba haha Monyako oa Litlhapi, ba bea maballo a oona, ba kenya mamati a oona, le linotlolo tsa oona, le mekoallo ea oona. ₄Meremote, mora oa Uriea, setlōhōlō sa Kose, a tsosa lerako a bapile le bara ba Hasena. Meshulame, mora oa Berekiea, setlōhōlō sa Meshesabele, eena a le tsosa a bapile le Meremote. Sadoke, mora oa Baana, a le tsosa a bapile le Meshulame. ₅Ba lelapa la Tekōoa ba le tsosa ba bapile le Sadoke. Empa mahosana a bona a se ke a kenya letsoho mosebetsing ona oa Morena oa bona.

₆Monyako oa Khale oona oa tsosoa ke Jehoeada, mora oa Paseea, le Meshulame, mora oa Besodeea. Ba bea maballo a oona, ba kenya mamati a oona, le linotlolo tsa oona, le mekoallo ea oona. ₇Bo-Melatiea oa Gibeone, le Jadone oa Meronote, banna ba tsoang Gibeone le Misepa, ba bapa le bo-Jehoeada, ba tsosa lerako ho ea fihla ha 'musisi oa naha e ka bophirimela ho nōka ea Euferatese. ₈Usiele, mora oa Harahaea, eo e neng e le e mong oa malala a khauta, a tsosa lerako a bapile le bo-Melatiea. Hananiea, e mong oa ba etsang litlolo tse monko o monate, a bapa le Usiele, ba tsosa lerako la Jerusalema ho ea fihla Lerakong le Phatlaletseng. ₉Refaea, mora oa Hure, 'musi oa karolo e 'ngoe ea Jerusalema, a tsosa lerako a bapile le Hananiea. ₁₀Judaea, mora oa Harumafa, a bapa le Refaea, a tsosa lerako moo le tobaneng le ntlo ea hae. Hatushe, mora oa Hashabeniea, a le tsosa a bapile le Jedaea. ₁₁Malakiea, mora oa Harime, le Hashube, mora oa Pahate-Moabe, bona ba tsosa karolo ea bobeli ea lerako, hammoho le Tora ea Libōpi. ₁₂Shalōme, mora oa Haloheshe, 'musi oa karolo e 'ngoe ea Jerusalema, a thusoa ke barali ba hae, ba tsosa lerako ba bapile le bo-Melatia.

₁₃Bo-Hanune le baahi ba Sanōoa ba lokisa Monyako oa Khohlo. Ba o haha, ba kenya mamati a oona, le linotlolo tsa oona, le mekoallo ea oona. Ba haha le lerako sebaka se ka etsang limethara tse makholo a mane le mashome a mane, ho ea fihla Monyakong oa Thōtōbōlō.

₁₄Monyako oa Thōtōbōlō oa tsosoa ke Malakiea, mora oa Rekabe, 'musi oa karolo e 'ngoe ea Bete-Kereme. A o haha, a kenya mamati a oona, le linotlolo tsa oona, le mekoallo ea oona.

₁₅Monyako oa Seliba oa tsosoa ke Shalōme, mora oa Kolohose, 'musi oa karolo e 'ngoe ea Misepa. A o haha, a o rulela, a kenya menyako ea oona, le linotlolo tsa oona, le mekoallo ea oona. A haha le lerako le pota-potileng Letšana la Shela, le pel'a Serapa sa Khosi; a le haha ho ea fihla mehatong e theohang e e-tsoa Motseng oa Davida. ₁₆Nehemia, mora oa Asabuke, 'musi oa karolo e 'ngoe ea Bete-Sure, a latela Shalome; a tsosa karolo ea lerako e tobaneng le mabitla a Davida, ho ea fihla letšaneng, le ho ea fihla Tlung ea Bahale.

₁₇Balevi bana ba latela Nehemia, ba tsosa lerako: Rehume, mora oa Bani, a tsosa lerako; Hashabiea, 'musi oa karolo e 'ngoe ea Keila, a latela Rehume, le eena a tsosa karolo ea hae ea lerako. ₁₈Bana babo bona ba ba latela. Bafai, mora oa Henadade, 'musi oa karolo e 'ngoe ea Keila, le eena a tsosa lerako. ₁₉Esere, mora oa Jeshua, 'musi oa Misepa, a latela Bafai, a tsosa karolo e 'ngoe, e tobaneng le moepa o nyolohelang tlung ea lihlomo, e hukung ea lerako. ₂₀Baruke, mora oa Sabai, a latela Esere; a tsosa karolo e 'ngoe ea lerako ka mafōlōfōlō, ho tloha hukung ea lona, ho ea fihla monyakong oa ntlo ea Moprista e Moholo Eleashibe. ₂₁Meremote, mora oa Uriea, setlōhōlō sa Kose, a latela Baruke. A tsosa karolo e 'ngoe ea lerako, ho tloha monyakong oa ntlo ea Eleashibe, ho ea fihla moo ntlo eo e fellang teng.

₂₂Baprista, e leng banna ba ahileng phuleng ea Jorodane, ba latela Meremote, le bona ba tsosa lerako. ₂₃Bo-Benjamine le Hashube ba latela baprista, ba tsosa lerako moo le tobaneng le ntlo ea bona teng. Asariea, mora oa Maasiea, setlōhōlō sa Ananiea, a latela bo-Benjamine, a tsosa lerako le pel'a ntlo ea hae. ₂₄Binui, mora oa Henadade, a latela Asariea, a tsosa karolo e 'ngoe ea lerako, ho tloha tlung ea Asariea, ho ea fihla hukung ea lerako.

₂₅Palale, mora oa Usai, a tsosa lerako moo le tobaneng le huku, le tora e entseng motsu, e tlung ea khosi, e kaholimo, e neng e le pel'a lebala la chankana. Pedaea, mora oa Paroshe, a latela Palale, a tsosa lerako.

₂₆Basebeletsi ba Tempele, ba neng ba phela Ofele, ba tsosa lerako ka nq'a bochabela, moo le tobaneng le Monyako oa Metsi, le tora e entseng motsu.

₂₇Banna ba Tekōoa ba latela basebeletsi ba Tempele, le bona ba tsosa karolo e 'ngoe ea lerako, e tobaneng le tora e kholo, e entseng motsu, ba ea fihla lerakong la Ofele.

₂₈Baprista ba tsosa lerako le kaholimo ho Monyako oa Lipere; e mong le e mong a tsosa karolo e kapele ho ntlo ea hae. ₂₉Sadoke, mora oa Imere, a latela baprista, a tsosa lerako le tobaneng le ntlo ea hae. Shemaea, mora oa Shekaniea, molebeli oa Monyako o ka Bochabela, a latela Sadoke, a tsosa lerako. ₃₀Bo-Hananiea, mora oa Shelemiea, le Hanune mora oa botšelela oa Salafe, ba latela Shemaea, ba tsosa karolo e 'ngoe ea lerako. Meshulame, mora oa Berekiea, a latela bo-Hananiea, a tsosa lerako moo le tobaneng le kamore ea hae. ₃₁Malakiea, e mong oa malala a khauta, a latela Meshulame, a tsosa lerako ho ea fihla tlung ea basebeletsi ba Tempele, le ho ea fihla tlung ea bahoebi, moo le tobaneng le Monyako oa Balebeli, le ho ea fihla pel'a kamore e kaholimo ho huku ea lerako. ₃₂Pakeng tsa kamore e kaholimo le Monyako oa Linku, malala a khauta le bahoebi ba tsosa lerako hona moo.