Thapelo ea Nehemia
1Tsena ke lipolelo tsa Nehemia, mora oa Hakaleea: Ka khoeli ea Tšitoe, ka selemo sa mashome a mabeli sa puso ea Aretaseresese, khosi ea Peresiea, ke ne ke le motseng oa khosi, oa Shushane. 2Hanani, e mong oa bana beso, a fihla a e-na le banna ba bang ba tsoang Juda. Eaba ke ba botsa taba tse amanang le Bajuda ba ileng ba phonyoha ha ho thōpuoa ba bang; ka ba botsa le tsa Jerusalema.
3Eaba ba re ho 'na: “Masalla a setseng naheng e kamose oane, ha ba bang ba thōpuoa, a har'a litlokotsi tse kholo, le sekhobo. Lerako la Jerusalema le lona le helelitsoe, le mamati a teng a chesitsoe.”
4Ha ke utloa lipolelo tsena ka lula fatše, ka lla, ka ba bofifing ka matsatsi a mangata; ka itima lijo, ka rapela Molimo oa maholimo. 5Eaba ke re: “Oho, Morena Molimo oa maholimo, kea u rapela: Uena Molimo e moholo, ea tšabehang, ea bōlōkang selekane sa hae sa lerato ho ba mo ratang, ba mamelang melao ea hae, 6ak'u thèè tsebe, u mamele, le mahlo a hao a ke a talime, u tle u utloe thapelo ea mohlanka oa hao, eo ke e etsang ke le kapele ho uena, bosiu le motšeare. Ke rapella bana ba Iseraele, e leng bahlanka ba hao, 'me ke bolela libe tsa bona, tseo re u sitetsoeng ka tsona. Esita le 'na, le ba lelapa leso, re entse sebe. 7Re u etselitse bokhopo bo boholo, ha rea bōlōka melao, le litaelo, le likahlōlo tseo u ileng ua li laela Moshe, mohlanka oa hao.
8“Kea u rapela: Ak'u hopole polelo eo u neng u e laele Moshe, mohlanka oa hao, ua re: ‘Haeba le ka etsa sebe, ke tla le hasanya hohle har'a lichaba. 9Empa haeba le ka khutlela ho 'na, 'me la bōlōka melao ea ka, la e phetha, leha eba ke ile ka le hasanyetsa lipheletsong tsa lefatše, ke tla le bokella le le hona moo, ke le khutlisetse sebakeng seo ke se khethileng, hore ke khumamelloe ho sona.’
10“Joale he, bana ke bahlanka ba hao, le sechaba sa hao, seo u ileng ua se lopolla ka matla a hao a maholo, le ka letsoho la hao le matla. 11Oho, Morena, kea u rapela: Ak'u thèè tsèbè u mamele thapelo ea mohlanka oa hao, le thapelo ea bahlanka ba hao, ba chesehelang ho hlompha lebitso la hao. Kea u rapela: Ak'u atlehise mohlanka oa hao, hona kajeno, 'me u etse hore monna enoa a mo hauhele.”
Mehleng eo ke ne ke le moqhatsetsi oa khosi.
