MAREKA 11

₁Ha ba atamela Jerusalema, Bethefage le Bethania, Thabeng ea Mehloaare, Jesu a rōma ba babeli ba barutuoa ba hae, ₂a re ho bona: “E-eang motsaneng o kapele ho lōna, 'me hang-hang ha le kena ho oona, le tla fumana petsana e hōlehiloeng, e e-s'ong ho palangoe ke motho le ka mohla. Le e lokolle, le e tlise. ₃Ha motho a ka re ho lōna: ‘Ke'ng ha le etsa tjee?’ e-reng: ‘Morena oa e hloka, 'me o tla e khutlisetsa koano kapele-pele!’ ”

₄Ba ea, 'me ba fumana petsana e hōlehiloe, kantle, pel'a monyako, tseleng ea motse, 'me ba e lokolla. ₅Batho ba bang ba neng ba eme moo ba re ho bona: “Le etsa'ng na, ha le lokolla petsana eo?”

₆Ba ba araba joalokaha Jesu a ne a ba laetse, 'me bona ba ba tlohela, ba tsamaea. ₇Eaba ba tlisa petsana ho Jesu, ba ala liaparo tsa bona holim'a eona, 'me a e palama. ₈Joale ba bangata ba ala liaparo tsa bona tseleng, ba bang ba rema mahlaku naheng, 'me ba a ala tseleng. ₉Ba neng ba mo eteletse pele le ba neng ba e-tla kamorao, ba hōoa, ba re:

₁₁Eaba Jesu o kena Jerusalema, ka Tempeleng; hoba a qamake kahohle, kaha e ne e se e le nako ea mantsiboea, a tsoa, a ea Bethania a e-na le ba leshome le metso e 'meli.

₁₂Ka la hosasane, ha ba e-tsoa Bethania, Jesu a ikutloa a lapile. ₁₃A sa le hōle, a bona sefate sa feiee se nang le mahlaku, 'me a ea sheba hore na a ke ke a fumana ho hong ho sona. Empa ha a fihla ho sona, a se ke a fumana letho haese mahlaku feela, hobane e ne e se nako ea lifeiee. ₁₄A bua, a re ho sona: “Ho se hlole ho e-ba le ea ka jang tholoana tsa hao le ka mohla!” Barutuoa ba hae ba mo utloa ha a rialo.

₁₅Eaba ba fihla Jerusalema. Jesu a kena ka Tempeleng, 'me a qala ho phahla bohle ba neng ba reka, ba rekisetsa ka ho eona; a phethola litafole tsa baananyi ba lichelete, le litulo tsa ba rekisang maeba, ₁₆'me a se ke a lumella motho ho feta ka Tempeleng a jere letho. ₁₇A ruta, a re ho bona: “Ana ha hoa ngoloa, ha thoe:

₁₈Ha baprista ba baholo le Litsebi tsa Molao ba utloa hona, ba batla hore na ba ka mo timetsa joang. Ba ne ba mo tšaba, kaha letšoele lohle le ne le hlolloa ke thuto ea hae.

₁₉Eare ha e e-ba mantsiboea, Jesu le barutuoa ba hae ba tsoela kantle ho motse.

₂₀Ha ba feta kameso, ba bona sefate sane sa feiee se omeletse ho tloha metsong. ₂₁Petrose ha a hopola, a re ho Jesu: “Moruti, bona sefate sa feiee seo u se rohakileng, se omeletse!”

₂₂Jesu a ba araba, a re: “E-bang le tumelo ho Molimo. ₂₃Kannete kea le bolella hore ha e mong a ka re ho thaba eo: ‘Sutha, u e'o oela leoatleng,’ a se na pelaelo pelong ea hae, a mpa a lumela hore seo a se bolelang se tla etsahala, o tla se etsetsoa. ₂₄Ka baka leo, ke re ho lōna: Tsohle tseo le li kōpang ka thapelo, lumelang hore le se le li amohetse, 'me le tla li etsetsoa. ₂₅Ha le ema ho etsa thapelo, eba le na le lisuoa le motho, le mo tšoarele, e le hore Ntat'a lōna ea maholimong le eena a tle a le tšoarele liphoso tsa lōna. ₂₆Athe ha le sa tšoarele, Ntat'a lōna ea maholimong le eena a ke ke a le tšoarela liphoso tsa lōna.”

₂₇Ba boela ba tla Jerusalema. Eare ha a ntse a tsamaea ka Tempeleng, baprista ba baholo, le Litsebi tsa Molao, le baholo ba tla ho eena, ₂₈'me ba re ho eena: “Ke ka matla afe u etsang lintho tsee? Hona matla a ho li etsa, u a neiloe ke mang?”

₂₉Jesu a re ho bona: “Ke tla le botsa potso e le 'ngoe. Le nkarabe, 'me ke tla le bolella hore na ke ka matla afe ke etsang tsena. ₃₀Na kolobetso ea Johanne e ne e e-tsoa leholimong kapa bathong? Nkarabeng!”

₃₁Ba buisana ba le bang, ba re: “Ha re ka re, ‘E ne e e-tsoa leholimong,’ o tla re, ‘Ke ka baka la'ng le sa kang la mo lumela?’ ₃₂Empa ha re ka re, ‘E ne e e-tsoa bathong,’ ” ba ne ba tšaba letšoele, hobane bohle ba ne ba talima Johanne e le moporofeta oa sebele. ₃₃Ba araba Jesu, ba re: “Ha re tsebe.”

Jesu a re ho bona: “Le 'na ha ke le bolelle hore na ke ka matla afe ke etsang tsena.”